SAM 112 - Cho Bible Common Language 2016

Chang K’Ni ah Yeikyai nak

¹ Bawipa cu m’taam nei! Bawipa kyih aa ne, ang thumkhän läk ne, lünlawi ciah chang cu yeikyai ci nei.

² Changni ah hta nau gui cu kho avan ung ami huham om khai; Ani ah hta ng’shon gui cu hriham gah khai gui.

³ Ani ah kyongkhui cu bäkhäk bühmang khai, ani cu ngawi yä bä m’cam khai.

⁴ Changni ah hmawk ah a hmüp nak ung akdei cu ng’shü ci, Ngami cu chimgein nak, m’hni nak la düng nak om ciah kyak ci.

⁵ Ng’khai ne chang am k’pu m’hnih thei ciah chang cu yeikyai nak om ci, Ani naw abi lawh phung düngshung sei bik ci.

⁶ Changni cu kä zu ng’kia phung khai; ani cu a phlüt ah shüm vai kyak khai.

⁷ Ani cu thushe ang yak ung phi kä kyih ci; a yum nak cu khüighat ci, Bawipa ung ng’ap ciah kyak ci.

⁸ Ani cu kä ng’ä ci, kä kyik ci; Ani naw a ga gui ah dimaih cu hmu gui ci.

⁹ Ani naw ng’khai ne dukhaih ci gui cu pe taak gui ci, ani ah nibä nak cu kä shum hlawk ci; Ani cu huham ah sei chang m’sui khai gui.

¹⁰ Changshe gui naw cun cu hmu neta, m’lungshe ci gui; Ngami cu thüi ne m’thüi u ne maih khai gui; ami ngaih u nak phi ng’kawn yawp ci.