SAM 111 - Cho Bible Common Language 2016

Bawipa M’Taam Nak

¹ Bawipa cu m’taam nei! Ka m’lung avan awn Bawipa cu akchang gui ah ng’bum nak ung ka m’hlüngtai khai.

² Bawipa ah abi gui cu cäi aih vai kyak ci nei! Ani ung tuihlim ci phung naw a cun ah mawng gui cu hmuhmat hlük ci gui.

³ Ani ah bi phung cu m’tamkhah nak la hlüngtai nak awn be ci; ang düng nak cu ng’täi ci.

⁴ Bawipa naw cäicat vai ah a hnünthawh gui cu kä na m’hnih sak gui ci; Ani cu lo’dük nak chimgein nak ah kyak ci.

⁵ Ani kyih aa ci gui cu tu m’bei gui ci; ani naw ang thumkhän cu kä m’hnih phung ci.

⁶ Ani naw kho hei chang gui ah kho cu ak chang gui am pe ne, a huham cu m’dang ci.

⁷ Ani cu a bi nak phung ung bekhüt ne ng’düng ci; ang thu pyen gui phung cu khäng ci.

⁸ Cun gui cu kä pyi hlawt ci, cun gui cu ng’düng nak la bä nak awn a pek ah kyak ci.

⁹ Ani naw a chang gui cu phyawn sak gui ne, ng’täi ciah thumkhän cu be püi gui ci. Theingcim ne m’gäi cicu ani nei!

¹⁰ Khanpughi kyih aa nak cu cüivai nak ah lam ah kyak ci; Ani ah thumkhän läk ciah chang phung-am gei ciah m’khoi cha nak cu pek ci. Ani cu angtäi sei m’taam nei.