SAM 110 - Cho Bible Common Language 2016

Bawipa La A Ghü ah Ghangpughang

¹ Bawipa naw ka bawipa am, “Ka patlam ah shin ung ngaw ä, Na ga gui cu na kho ka ah kä ka ngon sak pha ah chuih ngaw ä” pyen nak ci.

² Bawipa naw Zion mang gaw ungka naw na uknak huham cu shawng sak khai. “Na ga gui cu uk gui ä” cik khai.

³ Na ga gui na tuk gui hnüüp na chang gui naw ning düih püi khai gui. Khongawi k’siik ung khüi toi ah mäih ah, khom’htung theing ung na chang nong gui naw ning law nak khai gui.

⁴ Bawipa naw ang müi ah shai tak ci, cun cu kä m’hnawn ba khai: “Nang cu Melchizedek ah taigü ng’län ung angtäi sei taigü ah na kyak khai.”

⁵ Bawipa cu nak pat lam ah om ci; ani am lungk’she law ung ghangpughang gui cu hnim gui khai.

⁶ Ani naw pakhui gui cu m’khoi m’cha gui khai, ng’tuk nak ah hmun cu gook awn be sak khai; m’dekhan avan ung ghangpughang gui cu hnim gui khai.

⁷ Ghangpughang naw lam pei ah tuigei cu aw ne, k’thamah ne, näng ne, ng’düi khai.