SAM 11 - Cho Bible Common Language 2016

Bawipa ung Ap nak

¹ Bawipa ung phyawn vai ah ka ng’yii ci. A i hawkcha nang naw, shin ah thu na na pyen nak khai ang, “Kha ah mäih ah khomhtung ah zong ä,

² A i ah kyasei ci ung changshe gui naw ami lim’cung ne, ami m’la phun ne changni gui cu kap khai gui ah pawng ci gui nei.

³ Aphung ang yung a shet ah a kyak ung changni gui naw ami bi hning vai kä om khai nei.”

⁴ Bawipa cu a pum im theing ung om ci; Khankho ah amang kyang om ci. Ani naw chang gui ah om nak phung cu teng ne, ami bi law nü cu hmat ci.

⁵ Ani naw akni la akshe cu m’nüm ci; Thukän m’shet cicu am lung avan awn gen ci.

⁶ Ani naw meikcak ang’ai la k’sam mei däi cu changshe gui ah khan ah yuk chah ci; Khokhi ng’hüüt naw ngami cu m’kyuk gui ci.

⁷ Bawipa cu düng ne düng ne bi nak cu m’hni ci; Düng ciah chang gui naw ani ah hmai cu hmuk khai gui.