SAM 109 - Cho Bible Common Language 2016

Khüikha ciah Chang ah Ng’shawk chaak nak

¹ O Khanpughi, ka ning m’taam ci nei; kä om düüt-en ä!

² Changshe gui la chang om kaa gui naw na ng’tuk püi ci gui nei. Ngami naw kei ah mawng ami hleei pyen u ne,

³ Kei ah mawng akshe ah pyen u ne, amawng kä om ciah na ng’tuk püi ci gui nei.

⁴ Kei naw m’hni gui ngä sei phi, na ng’tuk püi ci gui, cun ung phi kei naw ka taigü pe gui ci.

⁵ Ngami naw akni cu akshe awn na thung u ne, m’hni nak cu gen nak awn sah ci gui.

⁶ Ka ga cu thu m’chak khai ah m’gak ci cu ghü ä, ani cu amät ah ga awn di sak ä.

⁷ Ani cu ami m’chaa law ung, a katnak dang sä; a taigü nak cu cheishoh nak ah kya sä!

⁸ Ani ah a ghin nak cu ng’pyi ge sä; abi lawh phi chang a hei naw lak pe sä!

⁹ A hta gui phi hmei hta ah kya u sä, a chu phi hmeinu ah kya sä!

¹⁰ A hta gui cu a im kaa ah kya ne, ng’zoi ne, ei u sä; shekak ciah ami om nak ungka, püi gui u sä!

¹¹ A khawh avan cu a phu suk ci naw la yawp sä, Abi phung cu chang hei gui naw gah yawp u sä.

¹² Ani cu a u naw phi kä m’gein en sä, a hnu ah a nawng ah hmei hta gui phi a u naw kä m’htei en sä.

¹³ A hta ng’shon avan si sä, Ng’shon ba ung ani ah ming cu m’hnih u sä.

¹⁴ Bawipa naw apupa ah shet nak cu shüm ne, anu ah katnak cu kä m’gein en sä.

¹⁵ Bawipa naw ami katnak cu angtäi ah shüm pe gui sä, cun ung phi ami mät läi cu m’hni gui yüm yüm sä!

¹⁶ Cun ah chang cu m’gein nak vai kä ngai tüh ci, ani naw dukdeiu nah ne ngawn gui ci.

¹⁷ Ani cu ng’plah hlük ci kya sei, ani cu phlah u sä! Hriham pek vai thüi nak ci kya sei, a u naw hriham kä pe-en sä!

¹⁸ Ani naw sui sui ah mäih ah ang plah cu sui sä; amät ah ng’plah cu amät ah pumsa ung tui ah mäih ah lut ba ne, a guh ung shitui ah mäih ah lut ba sä!

¹⁹ A cun gui naw sui ah mäih ah shung u ne, m’ciu vawp ah mäih ah vet u sä!

²⁰ Bawipa, ka ga gui, akshe ah ng’thu ne na hnu ng’tuk püi ci gui cu, a cun ah mäih ah m’kyuk gui ä!

²¹ Cun ung phi uk ciah ka Bawipa, na shaitak ah mäih ah kei cu na m’htei ä, Na m’hni nak däm ci kyasei na gung ä.

²² Kei cu dukhaih ne ka gen vai ci; ka m’lung kyong cu nak ci nei.

²³ Khomü hun püpüi ah mäih ah kei cu ka ng’kawn ci nei; m’kyit zoop ah mäih ah ka ng’plon ci gui.

²⁴ A ei kaa ah om ng’ä sei, ka m’khuk cu ng’tum ci, ka vun la ka guh bäng om ba ci.

²⁵ Chang gui naw ami na hmuh ung na gaih tuk ci gui, nakshe na ne ami lu tum ci gui.

²⁶ O Bawipa, ka Khanpughi, na m’htei ä; ng’täi ciah na m’hni nak am na m’htei ä!

²⁷ Kei na hun ciah na kyak cu ka ga gui am hmat sak ä.

²⁸ Ngami naw na plah u sä, cun ung phi nang naw hriham na na pek khai. Na dukdeiu nak ci gui cu hnim gui u sä, kei, na na changshäm cu ka yei khai nei.

²⁹ Ka ga gui cu thui ng’a nak naw shung gui sä; lü ng’a nak cu sui nu ah mäih ah sui u sä.

³⁰ Kei naw Bawipa cu angtäi ah ka m’hlüngtai khai nei, chang gui ah ng’bum nak ung ka m’taam khai nei,

³¹ a i ah kyasei ci ung, ani naw dukhaih ci gui cu shungvong gui ne, sihnak ah ami m’kyuk nak gui ungka hun gui ci.