SAM 108 - Cho Bible Common Language 2016

Ga m’Khüt nak Vai, Ana m’htei Vai ah Taigü nak

¹ O Khanpughi, kei ka m’lung kyong akbä ah theing ci nei! Ng’äi m’cu ne ka ning m’taam khai nei! Ka mümcha tho law ä!

² Ka tingtäng la ka phyung lawi, Tho law vä! Kei naw nu hni ka m’tho khai nei.

³ O Bawipa, changpakhui gui ah ng’lung ah kei naw ka ning m’hlüngtai khai nei. Chang gui ah ng’lung ah ka ning m’taam khai nei.

⁴ Ng’täi ciah na m’hni nak naw khankho han phlän ci nei, Na bekhüt nak naw khomik han pha ci nei.

⁵ O Khanpughi, Khankho mik ah na dämduh nak dang sak ä, khomdek khan ung na bämang nak be sä.

⁶ Na m’gäi nak awn na hun gui ä; ka taigü na m’shang gui ä. Cun ung na m’hni ah chang gui cu phyawng khai gui nei.

⁷ A theingcim nak ung om neta Khanpughi naw, “Nängnak awn Shekhem gawnu cu ka k’bou khai, Sukkoth kho ng’nawi cu ka chang gui am ka pek khai.

⁸ Kilead cu ka kho, Manasseh phi ka kho; Ephraim cu ka lukhu, Judah cu ka mang shopawng.

⁹ Moab kho cu ka tui ng’si hlüng ah ka mang khai, Edom kho ung ka yung leh khai, kei naw ka khäm ah ka m’dang khai. Philistin kho ah khan ah näng nak awn ka m’lau khai” cik ci.

¹⁰ O Khanpughi, ng’aa ciah mang gaw ah a u naw na hteh püi khai aw. Edom kho ah a u naw lam na m’shüm khai aw?

¹¹ Ak cang ah na na hnu ng’tuk püi gui khai ma? Kami gakap gui awn a täng ah kä na hteit khai ma?

¹² Ga m’khüt nak vai ah na m’htei gui ä; hnicim chang ah m’hteihtang cu a kholä nei.

¹³ Keimi cu Khanpughi awn kami näng khai nei; Ani naw kami ga gui cu hnim gui khai nei.