SAM 107 - Cho Bible Common Language 2016

CA UK A HMA NAK ( Sam 107—150 ) Khanpughi ah Ni nak M’taam nak

¹ “Bawipa cu m’hlüngtai vä, ani cu ni aih ci; am hni nak cu ng’täi ci nei!”

² Aning hun gui ah chang avan naw Bawipa cu m’taam ba mä vä. Ani naw nami ga gui ungka ning gung gui ne,

³ A kho hei ah ka, a khei, a kyang, a htum a siip ah ka ning law püi ba gui ci.

⁴ Am shah cu bung hmu puk ah püi ne om u ne, ami om nak vai ah mang gaw lam cu kä hmat ba ci gui.

⁵ Ngami cu ei ah cawi, tui ah gha u ne, ami ngaih u vai a i kä om ba ci.

⁶ Ami gein vai nak ungka naw Bawipa cu khü u sei, ami yaica nak ungka ani naw hun gui ci.

⁷ Ani naw ami om nak vai ah mang gaw ah düng ciah lam ung hteh püi gui ci.

⁸ Bawipa ah ng’täi ciah am hni nak la ngami ah hmawk ah cäicat vai gui abi ah phäh ah m’hlüngtai u sä.

⁹ Ani naw tui gha ci tui tu ne, ei cawi ci phi akni awn be sak ci.

¹⁰ Am shah cu mü, hmüp khui ah om u ne, gui awn khit ne, thawng ung yaica ci gui,

¹¹ cun cu m’gäi ciah Khanpughi ah a thumkhän hnu ng’tuk püi ne, am cäi kä ami ng’yak ah hmawk ah kyak ci.

¹² Ngami cu bi bi aih ne, ng’yai ci gui; Ngami cu zu ng’kia vu u sei, m’htei gui khai kä om ci.

¹³ Ami gein vai nak ungka naw Bawipa cu khü u sei, ami yaica nak ungka ani naw hun gui ci.

¹⁴ Ani naw amü, a hmüp nak ungka k’plawk ba gui ne, ami khih nak gui cu ci pit yawp ci.

¹⁵ Ng’täi ciah am hni nak la ngami ah hmawk ah cäicat vai gui abi ah phäh ah Bawipa cu m’hlüngtai u sä.

¹⁶ Ani naw kyei m’kawt gui cu k’cheiuh yawp ne, m’si ng’vong gui phi gäi ci.

¹⁷ Am shah gui cu ami katnak la ami omshe ah hmawk ah gu ne geinvai ci gui;

¹⁸ Ngami cu ei kä hnga päng ba u ne m’htei pei ung ngok ci gui.

¹⁹ Ami geinvai nak ungka naw Bawipa cu khü u sei, ami yaica nak ungka ani naw hun gui ci.

²⁰ Ani naw a thukän awn gai sak gui ne, ng’cim hmun ungka hun gui ci.

²¹ Ng’täi ciah am hni nak la ngami ah hmawk ah cäicat vai abi ah phäh ah Bawipa cu m’hlüngtai u sä.

²² Ngami naw yeikyai ne vawih peh u ne, ani ah bi gui avan cu yei nak ng’äi awn pyen u sä.

²³ Am shah cu tuinu ah khan ah h tinpaw am hteit u ne, tuinu ung ami hnun m’gin ci gui.

²⁴ Ngami naw Bawipa naw a i hlawk ah abi hning la tuinu ah khan ah cäicat vai a hnünthawh cu hmuk ci gui.

²⁵ Ani naw m’tho sei pui kho khi ne, tuinu ng’hnawk ci.

²⁶ Htinpaw gui cu kho khi ung, khan ah hang zong u ne, tui a thuuk nak pi ung zu kya ba ci gui. Cun ah kyi ng’ä nak ung htinpaw bik’bi gui cu ami k’tha maih yawp ci,

²⁷ Zu awk tak ciah mäih ah ng’phiu ne ng’vak u ne, ami k’tha a i ah kä mawng ba ci gui.

²⁸ Ami geinvai nak ungka naw Bawipa cu khü u sei, ami yaica nak ungka ani naw hun gui ci.

²⁹ Ani naw puikho khi cu ng’düm sak sei, tui ng’hnawk gui phi dim ci.

³⁰ Kho khi ng’düm sei ngami cu yei ci gui, ani naw ami ng’yak hlü ah tuikem pigaw ah phyawng ne hteh püi gui ci.

³¹ Ng’täi ciah am hni nak la ngami ah hmawk ah cäicat vai gui abi ah phäh ah Bawipa cu m’hlüngtai u sä.

³² Ngami naw a küikyang nak cu chang khli ah ng’lung ah ng’shäu u ne, kongsi ng’vai gui ah ma ah m’taam u sä.

³³ Bawipa naw tuinu gui avan kawi sak ne, tui hta gui avan kä lon ba sak ci.

³⁴ A cun ung om ciah chang gui ah shetkat ah phäh ah ani naw ang lei ni cu m’sii m’dek ah kyak sak ci.

³⁵ Ani naw khoshe kho cu tui gei kho ah thawng sak ne, kho ng’gau kho ung tui ng’züi sak ci.

³⁶ Ani naw cawigha ci gui cu a cun ung om sak gui sei, ngami naw ami om nak vai mang gaw k’süm ci gui.

³⁷ Ngami naw m’shi phu u ne, sapyit geit u ne, am theih pai cu akda ah khäm ci gui.

³⁸ Ani naw a chang gui cu m’shum phyuk gui sei akda ah hta nau ci gui; ami sei mak gui kä ken nin law vai ah cik ci.

³⁹ Khanpughi ah chang gui cu shedam nak la yaica nak awn geinvai ne ami zu ng’kyak yah ung,

⁴⁰ Shedam na gui ci gui cu m’kyuk gui ne, lam kä om ciah bung hmu ah ng’vah sak gui ci.

⁴¹ Cun ung phi du ci gui cu ami khaih nak ungka gung gui ne, htome gui ah mäih ah ami im tung da sak ci.

⁴² Ng’düng ci gui naw shin cu hmu ne yei ci gui, changshe gui ami van cu kä shipdep ci gui.

⁴³ Cüivai ciah chang gui naw shin ah mawng cu ngaih-tüh u sä, Bawipa ah ng’täi ciah am hni nak cu hmat u sä.