SAM 106 - Cho Bible Common Language 2016

Bawipa naw a Chang gui ah Khan ah Ani nak

¹ Bawipa cu m’taam nei! Bawipa cu m’hlüngtai vä, Ani cu nik ci, am hni nak cu ng’täi ci nei.

² Küikyang ciah abi gui avan cu a u naw pyen hning khai aw? A u naw bä khai ah m’taam hning khai aw?

³ A thumkhän läk ne, angtäi se ng’düng nak bik cicu yeikyai nak om ci nei.

⁴ Bawipa, na chang gui na m’htei gui yah ung na shüm ä; Ngami na hun nak gui ung na hun to ä.

⁵ Na chang gui ah bä mang cu na hmuk sak ä, Na pakhui ah yeikyai nak cu na k’pai toä, cun ung nang ah shon lam ung kei ka ng’häh leh khai nei.

⁶ Keimi cu kami pupa gui ah mäih ah katnak kami bik ci; kami shekak ci, kami cheishoh ci.

⁷ Egypt kho ah om tuk ciah kami pupa gui naw, cäcat vai ah Khanpughi ah bi gui cu kä hmat ci gui; Ani naw am hni nak akda vei am dang gui cu m’hnih yawp ci gui, Tuisen tuinu pei ah am gäipi cu hnu ng’tuk püi ci gui.

⁸ Cun ung phi a shaitak ah mäih ah hun gui ci, dämduh ciah a huham am dang nak ah kyak ci.

⁹ Ani naw tuisen tuinu cu ng’thu khän ne tawk sei, tuinu cu kawi ci, akchang gui cu kho k’hu ung ng’kah püi gui ci.

¹⁰ Ani naw ami gen nak gui ungka hun gui ne, ami ga gui ah kut ungka gung gui ci.

¹¹ Cun ah kya sei, ami ga gui cu tui naw hteh gui ci, Tumat phi kä pawih ba ci gui.

¹² Cun kawn ah a chang gui naw a shaitaak cu yum u ne, ng’äi awn ani cu m’taam ci gui.

¹³ Cun ung phi a ni ah bi cu ngami naw ang ghit ah m’hnih ci gui, ani ah m’cäi m’ä nak kä ging ling ne bilo ci gui.

¹⁴ Ngami cu ng’yak hlü aih nak awn be u neta, bungpuk ah Khanpughi cu m’nüm ci gui;

¹⁵ Cun ah kyasei ani naw ami ng’zoih cu pe gui ci, cun ung phi geinvai ne gaw pai nak cu tüih gui ci.

¹⁶ Bungpuk ah Moses la Bawipa ah changshäm theing Aaron ah khan ah ngami cu m’thüi ci gui.

¹⁷ Cun kawn ah khomdek cu aang ne, Dathan cu m’zaw ne, Abiram la akyong ungka gui cu lin gui ci,

¹⁸ Läk law tu gui ci gui ah khan ah mei cu kya law ne, cun ah changshe gui cu ui gui ci.

¹⁹ Ngami naw Sinai m’htung ah seipat hta gup cu ghui awn pyang u neta, cun ah gup cu khawihnah ci gui;

²⁰ Ngami naw Khanpughi bämang nak cu, khu ei ciah sei ah gup awn m’thawng ci gui.

²¹ M’gäi ne abi nak awn Egypt kho ah ka hun gui ciah Khanpughi cu m’hnih ci gui.

²² A cau ah abi gui cu cäicat vai ah kyak ci nei! Tuisen tuinu ah abi gui cu ngaih khit vai ah kyak ci nei!

²³ Khanpughi naw a chang gui cu m’di gui khai ah pyen khäta, a ghü ah ak changshäm Moses naw, ng’düi law ne pyen tu ba sei, Am di nak gui vai ah am lungshe nak cu k’üüp ci.

²⁴ Cun kawn ah ngami cu Khanpughi ah shaitak kä yum ci gui ah kya ne, khoding kho cu hnu nak ci gui.

²⁵ Ngami cu ami phung kyong ah om u ne, kä yei u ne, Bawipa cu kä ngai ci gui.

²⁶ Cun ah kyasei ani naw khen ne a taam gui cu; Ani naw ngami cu bungpuk ah sih sak gui ne,

²⁷ ami hta ng’shon gui cu chang khuihei gui ah ng’lung ah püüi sak gui khai, a khaw hei ah sih sak gui khai.

²⁸ Cun kawn ah Peor ung Khanpughi ah chang gui cu Baala khawihnah ci gui ung ng’dawn tu u ne, sik ciah khanpughi gui ah ghu tha nak cu ei tuk ci gui.

²⁹ Ngami naw ami bilawh awn Khanpughi ah m’lungshe nak cu thüngphyong sak u sei, Ami ng’lung ah leigai payak ci.

³⁰ Cun ung phi Phinehas naw ng’düi law ne changshe gui cu m’kyuk sei, leigai cu ng’düm ci.

³¹ Shin ah mawng cu angtäi ah yei na ne shüm vai kyak ci, shin cu ngawi yä a khin ung phi shüm lä vai kyak ci.

³² Meribah tui pei ah chang gui naw Bawipa cu m’lungshe sak u sei, Ngami ah hmawk ah Moses naw khüikha nak ci.

³³ Ani cu m’thüi aih u khäta, ani naw kä ng’düm phung ne kä ngaih-tüh ling ah ng’thu pyen ci.

³⁴ Ngami naw Bawipa ah thumkhän ah mäih ah kä si u ne; chang pahei gui cu kä ngawn ci gui,

³⁵ Cun ung phi ngami awn ng’chu ng’la u ne, akshe ami yum nak cu läk tuk ci gui.

³⁶ Khanpughi ah chang gui naw a gup cu khawihnah ci gui, a cun naw ngami cu di sak gui ci.

³⁷ Ngami naw ami hta pami la hnumi gui cu khanaan ah gup am ap ne ghutha nak ci gui.

³⁸ Ngami naw cun ah akat nak kä om ciah ak hmaw gui cu ngawn u khäta, kho avan cu chang ngawn ah si awn be ci.

³⁹ Ngami cu ami mät ah bi awn ami mät kä ng’ciim sak u ne, Khanpughi ung kä bekhüt ci gui.

⁴⁰ Cun ah kyasei Bawipa cu ak chang gui ah khan ah m’lungshe ne, m’shemshai na gui ci.

⁴¹ Ani naw chang khuihei gui ah huham ung ap gui sei; ngami cu ami ga gui naw uk gui ci gui.

⁴² Ngami cu ami ga gui naw shedam na gui sei, ami ka ah gawk yawp ci gui.

⁴³ A chang gui cu Bawipa naw akda vei gung gui ci, cun ung phi ngami naw hnu ng’tuk püi nak vai ghü u ne, katnak ung thuuk law pi sei ng’hnim ci gui.

⁴⁴ Cun ung phi Bawipa naw ami m’lau cu ng’ya gui ne, ami geinvai cu hmu gui ci.

⁴⁵ Ngami ah hmawk ah a thukhän cu shüm ba ne, däm ciah am’hni nak awn m’düm gui ci.

⁴⁶ Ngami pha ne chum gui ci gui cu ng’zuu ne ami thüi vai ah ani naw bik ci.

⁴⁷ O Bawipa kami Khanpughi, na hun gui ä, chang khuihei gui ah ng’lung ungka na k’plawk ba gui ä, cun ah kyasei keimi cu yeikyai ne, nang ming theing kami m’taam khai.

⁴⁸ Israel Khanpughi, Bawipa cu m’taam vä; Tuhbäi ung tün ne, ngawi yä m’taam vä! Chang avan naw, “Amen” ci sä! Haleluyah. Bawipa cu m’taam vä!