SAM 105 - Cho Bible Common Language 2016Khanpughi La A Chang gui 1 Bawipa cu m’hlüngtai vä, A dämduh nak cu ng’shäu vä; changpakhui van am ani ah bi cu m’thein ä. 2 Bawipa m’taam ne ng’äi vä; cäicat vai a bi gui cu pyen vä. 3 Ani ung mi ng’khäm ci kyasei yei vä; Ani khawihnah ci gui yeikyai vä. 4 Bawipa naw a ning m’htei gui vai ah a pei ah hteit vä; ang däih ah khawihnah vä. 5-6 Nangmi, Abraham akchang shäm ah ning shon gui; nangmi, Jakob akchang gü ah ning shon gui. Khanpughi naw cäiaih vai gui a bi cu shüm vä, m’khoi m’cha nak a ning pek gui cu hmat vä, 7 Bawipa cu mi Khanpughi; A thumkhän cu m’dek khan van ah hmawk ah kyak ci. 8 Ani naw a thumkhän cu angtäi sei k’paang khai, a shaitak cu ng’shon tämkäp ah hmawk ah kyak ci. 9 Abraham aw yum nak ani bi la Issak am shai a taak cu k’pang khek khai. 10 Bawipa naw Jakob awn thumkhän bik ci, cun cu a ngawi ah phi kä maih khai. 11 Ani naw, “Kei naw Kanaan kho cu ka ning pek khai, cun cu na kho ah kyak khai” cik ci. 12 Khanpughi ah chang gui cu ken ci gui, Kanaan kho ah om k’tu ah kyak ci gui. 13 Ngami cu kho tumat ungka naw a hei kho ah, uknak tumat ungka naw a hei uk nak ah püi ne hteit ci gui. 14 Cun ung phi Khanpughi naw a u am phi kä shedam na sak gui ci; Ani naw shungvong gui ci ghangpughang gui am’cäi gui cu: 15 “Ka ghü ah ka changshäm gui cu kä nami hnim gui vai; ka prophet gui cu kä nami tawn en vai.” 16 Bawipa naw ami kho ung kho zaw sak ci, ami ei avan maih sak ci. 17 Cun ung phi ani naw chang tumat tüi law ma ci. Cun cu khlei hteim vai ami yawih ah Joseph ah kyak ci. 18 A khaw cu m’si gui awn khit ne, a gawn ung m’si gui ami m’awi ah kyak ci, 19 A ng’thu pyen kä be pha ah chuih, Bawipa ah thu naw ani cu düng sak ci. 20 Cun kawn ah Egypt ghangpughang naw ani cu chah ba ci, pakhui gui uk ci naw ani cu m’hlawt ci. 21 Ani naw ak chang bawi gui k’thäh gui khai la, akho avan uk khai ah m’düih ci, 22 ghangpughang ah bawi gui ah khan ah huham mah nak la akchang vai gui m’shümthein nak ah huham cu ap ci. 23 Cun kawn ah Jakob cu Egypt ah hteit ne, acun ah kho ah om tuk ci. 24 Bawipa naw akchang gui cu hta hmaw akda pe gui ne, ami ga ah mä khüighat pi khai ah pyang gui ci. 25 Egypt chang gui naw akchang gui ami gen gui vai ah bi ne, a changshäm gui ami thei leh nak gui vai ah bik ci. 26 Cun kawn ah a ghü ah ak changshäm Moses la Aaron cu tüi goi ci. 27 Ngami naw Khanpughi ah m’gäi ne abi cu bi ni ne, Egypt kho ah cäi aih vai gui m’dang ci goi. 28 Khanpughi naw ziin ah mü nak cu cun ah kho ah yuk chah lawk ci, cun ung phi Egypt chang gui naw a ng’thumkhän kä ngai ci gui. 29 Ani naw ami tuinu gui avan si ah kyak sak ne, nga gui phi avan gawn ci. 30 Ami kho avan k’u bäng ah ng’pek ne; mang im ung phi k’u be ci. 31 Khanpughi naw k’thäh gui sei, kho avan ung k’pi la k’pikhai bäng ah ng’hlom ci. 32 Kho k’aa ah hnün ung gäi la lailäp cu kho avan ung ani naw yuk chah ci; 33 Ani naw ami sapyit ng’shun gui la thei ghing gui avan cu yuk m’di ne, shing ghing gui avan ci hnet yawp ci. 34 Ani naw k’thäh khäta, kä khei taai vai ah m’kha gek gui cu law u ne, 35 Kho avan ung ami geit avan cu ei u ne, pümhtang avan phi ei yawp ci gui. 36 Ani naw Egypt chang gui ah kyong ung htahtük phung cu ngawn gui ci. 37 Cun kawn ah Israel chang gui cu thawh law püi gui ci; Ngami naw ngui la ghui phui ci gui, ami van cu gai ne khüighat ci gui. 38 Egypt chang gui naw ngami cu kyih gui u ne ta, ami hteh ba ah hmawk ah yei ci gui. 39 Khanpughi naw a chang gui ah khan ah ng’mei ng’von sak ne, mü ah dei gui khai ah mei pe gui ci. 40 Ngami naw ng’zoi u sei, shihmuk kha tüih law gui ne, ami phü vai ah khan kho m’htut pe gui ci. 41 Ani naw lung song cu k’hmawng sei, tui lut law ne, kho ng’gau khaw ah tuinu ah mäih ah long ci. 42 Ani naw a changshäm Abraham am ng’ciim ciah a shaitak cu shüm ba ci. 43 Cun ah kya ne, ani naw a ghü ah chang gui cu tho ne hteh püi ba gui sei, Ngami cu yei ne, ng’äi ne m’lau ci gui. 44 Ani naw chang khuihei gui ah khaw cu ngami am pe gui ne, ami kho hmun phi lak sak gui ci, 45 Cun ah kyasei a chang gui naw ang thumkhän cu ngai u ne, ang thumkhän avan cu ami läk vai ah kyak ci. Haleluyah. Bawipa cu m’taam vä. |
Cho Bible Common Language © Bible Society of Myanmar, 2016.
Bible Society of Myanmar