SAM 104 - Cho Bible Common Language 2016

Tüisho ci M’taam nak

¹ Ka mümcha, Bawipa cu m’taam ä! O Bawipa, ka Khanpughi, Nang cu na dämduh aih ci nei! Nang cu küikyang nak la bäimang nak na sui awi ci;

² Na mät naw na mät cu akdei awn na uk ci. Nang naw khankho cu phung ah mäih ah na ng’shawng sak ci,

³ Na im cu tui ah khan ah na co ci. Kho ng’mei cu ng’se ah mäih ah mang ne khokhi ah ng’phia ung na ng’cum ci.

⁴ Nang naw khokhi cu na ng’shä tüih ah mang ne, lailäp khodei cu na changshäm nak ci.

⁵ Nang naw khomdek cu amät ah phung ung khäng khai ah na k’süm ci, cun cu kä ng’nawn phung khai.

⁶ Nang naw khomdek cu suinu ah mäih ah tuinu awn hlawp ne, khomhtung gui cu tui awn na küm sak ci.

⁷ Nang naw tui gui cu na k’täm ung ngami cu dawng ci gui; Nang ah ng’hawh cu ami ng’yak ung ngami ng’güüt ne dawng ci gui.

⁸ Ngami cu nang naw na pyan nak pek gui ah, m’htung khan phi hang phüm u ne, k’hteng nawi ah phi yu gawk ci gui.

⁹ Nang naw kä ami phlän hlawt vai ah ng’gi lung k’süm ne, khomdek kä ami k’plüm law ba vai ah na shung gui ci.

¹⁰ Nang naw k’hteng ng’nawi gui ung, tui hta gui lon sak ne, m’htung ng’lak gui ung tuinu gui na lon sak ci.

¹¹ Ngami naw tui cu khisa gui am awk sak u sei, ng’se la gui cu ami tui gha diim ci.

¹² A cun ah tui pei ah sing gui ung, kha gui cu ami ng’bu tu ne, ng’ging ci gui.

¹³ Nang naw khomik ung ka, m’htung khan ah kho yuk aa sak ci, khomdek cu na hriham awn be ci.

¹⁴ Nang naw seime ah phäh ah m’ghaw cu thawh sak ci, chang ah mang vai na geit pek ci, cun ah kyasei chang naw sing theih geit hning ci,

¹⁵ Chang cu a pyan ah sing theih tui naw yei sak ne, situi naw hmai kyang sak ci, m’htut naw thagui pek ci.

¹⁶ Lebanon ah m’htai ghing gui naw kho akda aa sak ci cun cu Bawipa amät ah sing ghing, amät ah geit ah kyak ci.

¹⁷ Cun ah sing ghing ung kha gui naw ami ng’bu tuk ci gui; mümbawk gui m’htai ghing tai ung ng’bu ci gui.

¹⁸ Sathai gui cu khomhtung hlüng ah om ci gui, Sa ng’ya gui cu lung k’song kaa ah ng’thup ci gui.

¹⁹ Nang naw cha k’bäi nak vai ah cha cu nei tüi sho li, hni naw a khin a gawk law cu hmat ci.

²⁰ Nang naw khomü cu na pyang ci, mü hmüp ung khisa gui cu avan lut lawk ci gui.

²¹ Phong kawng nong gui cu m’ngaw ne ng’shui ci gui, Ngami cu Khanpughi ah pek gui ah ei shui ci gui ah kyak ci.

²² Hni a luh law ung ngami cu hteit ba ne ami ng’bu ung ip ci gui.

²³ Chang gui cu ami khut bik khai gui ah hteit ci gui, khomü hun güt ung bi bik ci gui.

²⁴ Bawipa, nang naw akchün akda na tüisho ci! A i hlawk ah cüivai ne na pyan gui ang. Khomdek cu na tüisho awn be ci nei.

²⁵ Tuinu cu däm ne ng’shawng ci, a cun ung ak zaw, am kawm, kä khei tai vai ah na tüisho gui cu om ci gui.

²⁶ Ak khan ah htinpaw im gui cu hteit ci gui, a khui ah Leviathan nganu gui gü ci gui. Ngami cu däm chaam ciah tui nga ah na pyan gui ah kyak ci.

²⁷ Ngami ami van naw ami cawi law päng ung ei vai na pe gui khai ah ning ngaih u ci gui.

²⁸ Nang naw pe gui ci sei, ngami naw ei ci gui; Nang naw ei m’bei gui ci sei, ngami cu phü ci gui.

²⁹ Nang naw na ng’hlah taak gui ung ngami cu kyik ci gui; Nang naw ng’ghi nak na laak ung ngami cu sik ci gui, ami ng’tüi nak te ah m’vut ung hteit ba ci gui.

³⁰ Cun ung phi nang naw ng’ghi nak na pek gui yah ung na tüisho gui ah kyak ci. Khomdek am ghin nak akthai na pek ci.

³¹ Bawipa ah bämang nak cu angtäi ah om sä! Bawipa cu a tüisho gui ung yeikyai nak om sä!

³² Ani naw m’dek yuk teng sei, m’dek cu thüng ci, khomhtung gui tawk sei mei ah khü ci.

³³ Ka ghin ah chuih Bawipa am ng’äi ka m’cu khai, ka om ah chuih ng’äi ka m’cu khai, ka Khanpughi ka m’taam ci nei.

³⁴ Kei ah ng’äi awn ani cu yeikyai khai, ka yeikyai nak cu ani ung ka lawk ci nei.

³⁵ Khomdek khan ung chang kaa gui cu m’di gui sä, changshe gui cu kä om ba u sä. Bawipa m’taam ä, ka mumcha! Bawipa m’taam ä!