SAM 103 - Cho Bible Common Language 2016

Khanpughi ah M’hni nak

¹ O Ka mumcha, Bawipa cu m’taam khah ä! Ka ghin nak avan, aming theing cu m’taam khah ä!

² Ka mumcha, Bawipa cu m’taam khah ä, a i hlawk ah m’gein nak a om cu kä m’hnih en ä.

³ Ani naw ka katnak gui avan cu na m’gein sei ne, ka nat nak gui avan cu na gai sak ci.

⁴ Ng’phuh hmun ungka na k’plawk ba ne, m’hni nak la m’gein nak hriham na pek ci.

⁵ Ani naw ka ghin nak cu akni bäng awn nak’be sei, kei cu nong ne om ne hmu kiung ah mäih ah ka khüighat ci.

⁶ Bawipa naw ami shedam nak gui lam ah om ne m’khoi m’chak ci, ngami am ami chaw phi pe gui ci.

⁷ Ani naw a pawng püi gui cu Moses am m’dang ne, m’gäi ciah a hnün thawh nak gui cu Israel chang gui am hmuh sak gui ci.

⁸ Bawipa cu chimgein nak la m’hni nak awn be ci, a yäi ah kä m’lungshe ci, ng’täi ciah m’hni nak awn be ci.

⁹ Ani naw a phlüit ta a u kä m’kat ci, ani angtäi sei kä m’lungshe ci.

¹⁰ Ani naw mi shetkat ah mäih ah kä na m’kyuk gui ci, mi katnak la mi cheishoh ah mäih ah kä na thung gui ci.

¹¹ Khomdek ah khan ah khankho a hang hlüng ah mäih ah, Ani chang m’sui ci gui ah khan ah am hni nak cu dämduh ci.

¹² Hni law kho cawi la hni kyak kho cawi ah ng’shawng ah mäih ah, Ani naw mi katnak cu na ng’shawng sak gui ci.

¹³ Ami pa naw a hta gui cu am hni gui ah mäih ah, Bawipa naw amät chang m’sui cicu m’hni gui ci.

¹⁴ A i awn ana pyan gui cu ani naw hmat ci; mikmi m’vut ah mi kyak cu ani naw shüm ci.

¹⁵ Mikmi ah ghin nak cu khu m’ghaw ah mäih ah kyak ci. Mikmi cu bung ah chei pai ah mäih ah däm ng’ghaw ne, mi m’guh pai ci;

¹⁶ Cun cu kho naw akhi ung ng’kawn ne maih sei — a u naw kä hmu ba ci.

¹⁷ Cun ung phi Bawipa m’taam ciah chang ah hmawk ah, ani ah m’hni nak cu kä ng’pyi hlawt ci, Ani ah ni nak cu hta ng’shon avan ung khäng lä ci.

¹⁸ Cun cu ang thum’khän ung düng ciah chang la a thumkhän bekhüt ne läk ciah chang gui ah kyak ci.

¹⁹ Bawipa naw a mang kiang cu khankho ah k’süm ci; Ani cu avan ah khan ah ghangpughang ah kyak ci.

²⁰ Bawipa cu m’taam vä, nangmi khüighat ne m’gäi ciah khanchang gui, a thumkhän nami läk ci, a pyen phung nami ngai ci nei.

²¹ Nangmi khankho huham gui, nami van naw, Ak changshäm ah nami kyak ci, Ang yak hlü nami bik ci naw, Bawipa cu m’taam vä!

²² A uk nak hmun avan ung ka, a tüisho avan naw Bawipa cu m’taam vä. Ka mümcha, Bawipa cu m’taam ä!