SAM 102 - Cho Bible Common Language 2016

Cümbawng ciah Chang Nong ah Taigü

¹ O Bawipa, ka taigü na ngaih pe ä, ka kyah ng’ya ne na m’htei ä!

² Ka cümbawng yah ung kä na ng’hlah en ta ä! Ka ning khü cu ngai ne, ang ghit ah na m’shang ä!

³ Ka ghin nak cu mei khu ah mäih ah pyei ne, ka pumsa cu mei ah uih ah mäih ah kyak ci nei.

⁴ Kei cu khu chawng ah mäih ah na dep u sei, Ei ka ei hlü nak phi maih yawp ci nei.

⁵ Kei cu m’lau ne ka ng’hlo ei ci; kei cu ka vun la ka guh bäng om ba ci.

⁶ Kei cu kho ng’gau ung om ciah kha ah mäih ah ka kyak ci. Shet nak ung amät om ciah pängpät ah mäih ah ka kyak ci.

⁷ Ka cimgang ci; kei cu im kiung khan ah amät om ciah kha ah mäih ah ka kyak ci.

⁸ Ak hnüüp pum ung ka ga gui naw nak shedam nak ci gui; Na züigen ciah chang gui naw ka ming mang ne ng’plah ng’taam ci gui.

^9-10 Na m’lungshe la na m’lung thüi ah hmawk ah, m’vut cu ka ei ah kyak ci, ka awk cu ka ng’phlitui awn ng’caw ci. Nang naw na yuk chang ne, na na ghawt ci nei.

¹¹ Ka ghin nak cu mühun k’awi ung püpüi ah mäih ah kyak ci nei; kei cu khu chawng ah mäih ah ka kyak ci.

¹² Cun ung phi nang Bawipa cu angtäi sei ghangpughang ah na yak ci; hta ng’shon van naw ning shüm khai nei.

¹³ Nang cu tho ne, Zion mang gaw cu m’gein law ä; Ani na m’gein nak vai ah khin cu gawk lawk ci; shin cu a khin ni pi ah kyak ci nei.

¹⁴ Na changshäm gui naw ani cu m’hni ci gui, cun ung phi ani cu di pyi ci; Ngami naw ani cu m’gein ci gui, cun ung phi ani she pyi ci.

¹⁵ Chang pakhui gui naw Bawipa cu kyih khai gui; m’dek khan ghangpughang gui naw a huham cu kyih khai gui nei.

¹⁶ Bawipa naw Zion mang gaw a cawh ba ung, a dämduh nak cu ng’leet ba sak khai nei.

¹⁷ Ami nawng ah ak chang gui cu ngai gui ne, ami taigü cu ngaih pe gui khai.

¹⁸ Bawipa ah bi lawh gui cu hta ng’shon gui ah hmawk ah gu ne gim vai, cun ung tuhbäi kä ng’tüi phak ciah chang gui naw phi m’taam tuk khai gui.

¹⁹ Bawipa naw theing ciah hmun akhlüng ungka naw yuk teng lawk ci, Ani naw khankho ah ka naw khomdek cu yuk teng lawk ci.

²⁰ Ani naw thawng kyum gui ah ng’hlo ei cu ng’yak ci, sihnak ah ami m’kyuk gui cu m’hlawt gui ci.

²¹ Cun ah kyasei ani ah ming cu Zion mang gaw ung ng’shäu u ne, ani cu Jerusalem mang gaw ung m’taam khai gui,

²² Cun cu pakhui gui la uknak kho gui atäng ah ng’bum ne Bawipa ami khawihnah nak ah khin ah kyak khai.

²³ Bawipa naw ka nong yah ge ung ka thagui na ken sak ci; ka ghin nak phi na tawi sak ci.

²⁴ O Khanpughi, kä ka ghi pha ung tuhbäi kä na nawt heng en ä. O Bawipa, nang cu angtäi sei na om ci nei;

²⁵ Cau pui pui nang naw khomdek cu na tüisho ci, na mät ah kut awn khankho cu na pyang ci.

²⁶ Ngami cu maih khai gui, cun ung phi nang cu na om lä khai; Ngami ami van cu sui kheei ah mäih ah kyak khai gui, Nang naw na ghawt gui ciah mäih ah kyak khai, Ngami cu a kholä ah kyak khai gui.

²⁷ Cun ung phi nang cu angtäi sei a cun ah na kyak khai, na ghin nak cu kä ng’pyi hlawt khai.

²⁸ Kami hta nau gui cu phyawng ne om khai gui, nang ah shung vong nak ka ah ami hta ng’shon gui cu phyawng m’hteim khai gui.