SAM 10 - Cho Bible Common Language 2016

Taga nak ah Mawng Taigü

¹ A i ah kiyasei na ng’shawng aih ang, Bawipa? Keimi kami khüikha sangung a i ah kyasei na mät na ng’thuh ang?

² Changshe gui cu m’ghä ce u ne, dukhaih cicu dukdeiu nak ci gui; ami cun ung pha gui ci gui.

³ Changshe cu akshe ami ng’yak hlü nak awn khähghah ci gui; Changka gui naw Bawipa cu plah ne, hnung’tuk püi ci gui.

⁴ Changshe naw Bawipa cu a i ah kä sui ci; Chang ah ng’shei u ne, Khanpughi kä hlü ciah ngai ci.

⁵ Changshe cu a päng ung näng ci Khanpughi ah ng’thumcha nak cu kä hmat hlawt ci; a ga gui phi m’lep gui ci.

⁶ Amät ng’htau ne, “Kei kä ka zu ng’kia hlawt khai; kei khuikha nak ung kä ka gawk hlawt khai” cik ci.

⁷ Ang’thu cu ng’plah tang, hleeihlak, shedam nak awn be ci. Ani cu ng’thushe, shai kaa ah thu ghet ci.

⁸ Ani cu pigaw ah amät ng’thup ne, changni cu ng’mün ne ngawn ci. A m’geinka kyak ci gui cu k’tächä gui ci;

⁹ ani cu phongkawng ah mäih ah ang’thup nak ung om ne ng’däät ci. Ani naw dukhaih cicu ngäng ne m’hleei ci. Dukhaih cicu ani naw, a cun ung pha ne hteh püi ci.

¹⁰ A m’gein kaa gui cu, kyu ne ng’zän u sei, k’thamah ci naw m’di gui ci.

¹¹ Changshe naw amät ng’htau pyi ne, “Khanpughi naw a i ah kä na sui ci! Amik m’shing ne, kei cu kä na hmuk ci!” cik ci gui.

¹² O Bawipa, cun ah changshe gui cu m’kyuk gui ä! Geinvai ci gui cu shüm ba gui ä!

¹³ Changshe naw a i cha ah Khanpughi a päipih vai ang, “Ani naw kä na m’kyuk khai” cine, a i ah a kyak vai ang?

¹⁴ Cun ung phi nang naw na hmuk ci; Khüikha ci la gein vai cicu na hmat ci, na m’htei ge khai ah na om ci. A m’gein kaa cicu nang ung ng’ap ci gui, nang naw geinvai cicu angtäi sei na m’htei ci.

¹⁵ Shekha ne cheishoh ci gui ah huham cu cheiuh pe gui ä; A she ami bi cu kä ami bi ba güt m’kyuk gui ä.

¹⁶ Bawipa cu ng’shon ng’län ung ghangpughang ah kya ci, A hei khawihnah ci gui cu akho ung maih sak gui khai.

¹⁷ O Bawipa, ng’neim ci gui ah taigü cu na ngai khai nei; Nang naw thamah nak na pe gui khai.

¹⁸ Nang naw gein vai ci la hmeihta gui ah kyah cu na ng’yak ci, ngami täng ah om ne na m’khoi chak khai, cun ah kyasei m’dek chang naw kyihkyawk vai ah kä yawshe na sak gui khai.