RUT 4 - Cho Bible Common Language 2016

Baoz naw Ruth cu Ng’pui khah püi ci

¹ Boaz cu gawnu m’kawt pei ng’hmuh nak ahhmun ung hteit ne ngok ci. Elimelek ah mätyah ang een pi, Boaz ah pyen ah chang cu law khäta, Boaz naw khü ne, “Ka teihpüi aw, shin ung law ne ngo law ä” cik ci. Cun ah kyasei ani law ne ngo law tuk ci.

² Cun kawn ah Boaz naw gawnu ung chang ang vai gui chang sing gha cu khü guii sei acun ung ngo law tuk ci gui. Ngami cu ngo u khäta

³ Ani naw a mätyah gui am, “Tuhbäi Naomi cu Moab khaw ah ka law ba ci, ani naw mi mätyah Elimelek ah lo cu yoi ba hlük ci.

⁴ Cun cu nang naw nang bä khai ah ka ngai ci. Tuhbäi na ng’yak hlü ah a kyak ung, shin ung ngok ciah chang ah ma ah na hleih vai, kä nba ng’yak hlü ah a kyak ung, acun ah na pyen vai, nang ning tawi ne hleih khin khai cu kei ah ka kyak ci” cine pyen ci. Cun ah chang naw, “Kei naw ka hleih khai nei” cik ci.

⁵ Boaz naw, “Bä khai, nang naw Naomi ah lo cu na hleih ah a kyak ung Moab hmeinu Ruth phi na hleih vai, cun ah lo cu sik ciah chang ah kyong khui ung om khai” cik ci.

⁶ Cun ah chang naw shin ah lo hleih nak vai ka ngaih-tüh nak cu ka nawng khai nei. Shin ah a mawng cu ka mät ah hta gui naw pakhui kä ami m’düng nak vai ah kya hning ci nei. Nang naw na hleih vai, kei naw kä ka hleih khai” cik ci.

⁷ Cun yah ung hleih nak, ng’thawng nak a khänhtek nak vai ah hleih ciah chang naw yawi ciah chang am, phahnak suut ne pe man ci, cun cu Israel chang gui naw saksi dang khai ah ami bi nak ah thungyo ah kyak ci.

⁸ Cun ah kyasei cun ah chang naw Boaz am, “Nang naw na hleih vai” cine Boaz am a kyak nak yah ung, a phahnak suut ne Boaz am a pek ah kyak ci.

⁹ Boaz naw ang vai gui lacun ung om ciah chang gui ah ma ah, “Tuhngawi nangmi cu saksi ah nami kyak ci, Elimelek la a hta goi, Chilion la Mahlan ah khawh avan cu, kei naw Naomi ah kut ungka ka hleih ba ci nei.

¹⁰ Moab hnumi, Mahlon ah hmeinu, Ruth phi kei ah chu ah kyak ci nei. A shin naw sik ciah chang kyong khui ung khawhcham cu ng’khäm sak ne, a chang gui la apigaw cu ani ah kyong khui naw pakhui m’düng khai nei. Nangmi cu tuhngawi shin ah saksi ah nami kyak ci nei” cik ci.

¹¹ Cun ung angvai gui la chang gui naw, “Ä, keimi cu saksi ah kami kyak khai nei. Bawipa naw na chu cu, Rachela la Leah cu Jakob awn akda ah ami hta ah mäih ah akda ah hta sak sä. Nang cu Ephrath pahta ung bühmang ne Bethlehem ung na mingthang sä.

¹² Shin ah hnumi awn nani hta ah Bawipa naw a ning pek ah a hmaw gui naw Judah la ak chu Tamar ah hta Perez ah kyongkhui ah mäih ah na kyong khui pyang u sä” cik ci gui.

Boaz la Ahtangshon gui

¹³ Cun ah kyasei Boaz naw Ruth cu a im ah hteh püi ne chu nak ci. Ani cu Bawipa naw hriham pe sei, käumah ne pami hta ah hta ci.

¹⁴ Hnumi gui naw Naomi am, “Bawipa cu m’tam nei, ani naw tuhngawi nang ning m’htei khai ah na hta ah hta cu ning pek ci nei. Cun ah a hmaw cu Israel ung a mingthang sä.

¹⁵ Na hta ah chu naw ning m’hni ci nei. Htapami sing chih ata bä pi ciah ani naw bi pyi ci nei. Ani naw tuhbäi na hta ah hta cu ning pe pyi ci nei, ani naw ghin nak akthai la nag hi law ung m’lung üp nak cu ning pek khai nei” Cik ci gui.

¹⁶ Naomi naw cah a hmawhta cu la ne k’pawm ne om püi ci.

¹⁷ Ami pei leng ah hnumi gui naw a hmaw ah ming cu Obed ah sui ci gui. Ngami naw chang pang ah ma ah, “Naomi ah phäh ah hta pami ng’tüi pyi ci nei” cik ci gui. Obed cu Jesse ah pa ah kia lawk ci, Jesse cu David ah pa ah kya lawk ci.

^18-22 Shin cu Perey ungka naw David ungkhut ciah htashon ah kyak ci: Perey ah hta Heyron, Heyron ah hta Ram, Ram ah hta Amminadab, Amminadab ah Nashon, Nashon ah hta Salamon, Salamon ah hta Boaz, Boaz ah hta Obed, Obed ah hta Jesse, Jesse ah hta David ah kyak ci.