RUT 3 - Cho Bible Common Language 2016

Ruth naw Acei tuba vai Hmuk ci

¹ Api shou hta khäta Naomi naw Rutha am, “Kei naw na cei vai cu ka ning shui pek khai nei, cun ung nang cu na mät ah im lo awn na om khai.

² A hnumi gui awn a täng ah abii na bi nak tu ah shin ah chang Baoz cu mi mätyah ah kyak ciah na hmat vai. Tuhbäi na ngaih vai, tuhmühun ani cu htang m’häi ne om khai.

³ Cun ah kyasei tui na ng’si vai, ang ui na ng’hluk vai, aknipi na suisak vai, cun kawn ah htang am häi nak ah na hteh vai, cun ung phi kä a ei awk yawp pha ah chuih ama ah kä na ng’dang vai.

⁴ Ani ah ih nak cu na m’htei vai, ani a ih kawn ah hteit ne, yih m’hü neta a khaw pei ah na ng’yän vai. Ani naw a i ah kyak vai cu pyen lawk khai” cik ci.

⁵ Ruth naw, “Na pyen päng ah ka bik khai nei” cik ci.

⁶ Cun kawn ah Ruth cu htang m’häi nak ah hteit neta, a cei ah nu ah m’cäi ah mäih ah bik ci.

⁷ Boaz cu ei aw yawp neta, aknep ah ip ci. Ani cu htang pum ah pei ah hteit ne ng’yän ne ip ci. Ruth cu adüm ah ang ghit ah hteit ne a yih khuih m’hü neta a khaw pei ah ng’yän ci.

⁸ Khawmü sangung ani cu akten ah ng’shüm law ba ne, ng’hlat law ne, a khaw pei ah ip ciah hnumi cu hmu law neta,

⁹ “Nang a u ang?” cine ng’shik ci. Ani naw kei cu Ruth nei, nang cu ka ning mätyah ah na kyak ci, nang cu kei na na m’htei khai ah chang ah na kyak ci, cun ah kyasei kei cu na ng’pui khah püi ä” cik ci.

¹⁰ Ani naw, “Bawipa naw hriham ning pe sä, nang naw tuhbäi ung bä ciah kyong khui mah nak cu, na cei ah nu ah khan ah na bi ah ta, bä pi khai ah na m’dang ci nei. Nang naw ak pyam amg mang hmaw chang akda om sei phi, a u kä na cei nak ci.

¹¹ Ruth, tuhbäi kä na ng’ä vai. Na k’thäh phung kei naw ka bik khai; shin ah gawnu ung chang avan naw, nang cu hnumi kiom ah ning hmat ci gui nei.

¹² Na pyen cu hman ci, kei cu na mätyah akcang, ning m’htei khai ah chang ah ka kyak ci. Cun ung phi kei ah mä ng’en tuba ciah pami tumat om ci.

¹³ Tuhmü shin ung na om vai, ngawi ung kho ngawi ani naw a ning m’htei hning vai la kä cun ah ani cu mi shui khai. Ayum ah a kyak ung bä khai, nik khai. Kä a yum ah a kyak ung ghing ciah Bawipa ah am hni ah bi vai cu ka bik khai. Tuhbäi shin ung ng’yän ne ngawi ung kho ngawi güt na om vai” cine pyen nak ci.

¹⁴ Ani cu a khaw pei ah ng’yän tuk ci, cun ung phi ami hmuh khin vai ah khaw kä a dei pha ung, ani cu tho lawk ci; a i ah kyasei ci ung ani cun ung a ih tu cu chang naw a hmat vai ah Boaz naw kä ng’ya hlük ci.

¹⁵ Boaz naw ani am, “Na suinu cu la ne phah ä” cik ci. Acun ah cuun khäta, htang them thum thun ne akphleing ung taih pe sei, ani cu gawnu kyong ah hteit ba ci.

¹⁶ Ani cu im ah gawk ba khäta cei ah nun aw, “A i hawkcha nei a kyak, ka hta hnumi aw?” cik ci. Boaz naw ani ah hmawk ah a bi gui cu Ruth naw m’thein tuk ci.

¹⁷ Ani naw, “Kei ka yüng ah ka law ba vai cu ani naw kä m’hni ciah pyen ci. Cun ah kyasei shin ah htahg avan cu ana peik ah kyak ci” cik ci.

¹⁸ Naomi naw ani am, “Ruth, tuhbäi m’lung sau ne na om vai, a i ah a mawng kä a ng’hlan law ba ah chuih na om vai, shin ah mawng kä a bi yawp pha ah chuih Boaz cu kä ng’düm khai nei” cik ci.