RUT 2 - Cho Bible Common Language 2016

Ruth naw Boaz ah Lai ah Ng’bi tuk ci

¹ Naomi ung amätyah Baoz ming nak ci om ci, ani cu bühmang ne huham mah ci, acei Elimelek ah kyongkhui chang ah kyak ci.

² Hnü ät ung Ruth naw Naomi am, “Lo ah na hteh sak ä, geit khäm ci gui naw ami hma ah htang vui gui cu ka khä khai nei. Kei awn ng’gui Ne na bi püi khai ah chang cu akcang ah ka hmuk khai nei” cik ci. Naomi naw, “Ka hta hnumi aw hteit ba ä” cik ci.

³ Ruth cu lo ah hteit tu ne, bii bik ci gui ah hnu ah läk tuk ci, ngami naw ami hma shut ah htang vui gui cu shui tuk ci. Cun ah ani ah bi nak tu cu kä ngaih-tüh ah Baoz ah lo ah kya lawk ci.

⁴ Api shou hta khäta Baoz amät naw Bethlehem ah ka gawk law neb ii bik ci gui cu yavaih na gui ne, “Bawipa naw ning om püi gui sä” cik ci. Ngami naw, “Bawipa naw hriham ning pe sä” cik ci gui.

⁵ Baoz naw ami ng’vaihta am, “Shin ah hnumi cu a u ang?” ci n eng’shik ci.

⁶ Cun ah chang naw, “Ani cu a khawhei chang, Moab khaw ah ka Naomi awn ng’gui lawk ci goi nei.

⁷ Ani naw bii bik ci gui ah hnu ah läk ne geit khäm vai ah na k’thäh ci. Ani cu khaw ngawihta ung tün ne bi ne, tuhbäi hta ng’düm ne hnim yii ci nei,” cik ci.

⁸ Boaz naw Rutha am, “Api ka ning m’cäi khai, shin ah lo ah kawn ah a hei ah hteit ne geit kä na khäm tu vai. Shin ung om ciah hnumi gui awn a täng ah na bi tu vai.

⁹ Geit ami khäm nak ah teng gui ne ngami awn a täng ah na om tu vai. Ka chang gui naw kä ami ning shedam nak vai ah ka m’cäi gui khai. Tui na gha law ah a kyak ung tui-um ung than ne ami tha cu na awk vai” cik ci.

¹⁰ Ruth naw ani ah ma ah m’dek ung a hmai gawk khai ah m’khukdong neta, Boaz am, “A i ah kyasei kei na na geing nak aih ang, A i ah kyasei a khaw hei chang cu nam gein aih ang?” cine ng’shik ci.

¹¹ Baoz naw, “Na cei asih kawn ah na cei ah nu ah khan ah na bi cu ka ng’ya pyi ci nei. Nang naw napa la nanu na khawchang nawng ne, kä na hmat man ah chang gui ah ng’lung ah law ne, na om tu cu kei naw ka hmat ci nei.

¹² Na bi lawh ah phäh ah na Bawipa naw ning m’cümhnah sä. Israel Bawipa Khanpughi naw be ciah m’cümhnah ning pe sä, ani ung ng’yii vai ah nang cu na lawk ci nei” cik ci.

¹³ Ruth naw, “Nang naw na na m’gein aih ci nei, bawi aw, kei cu na changshäm tumat hlawk ah phi kä ka kyak pang ung phi, nang naw ang awi gii ah ng’htau ne na na yeikyai sak ci nei” cik ci.

¹⁴ Ei ei law vai kia khäta, Baoz naw Ruth am, “Law ne m’htut cu la neta, antui ung k’phung ä” cik ci. Cun ah kyaisei ani cu bii bik ci gui awn a täng ah ngo tu khäta, Baoz naw m’vapüm hlaw cu pek ci. Ani naw a phü ah ei ci, cun kawn ah phi a ei k’pawih om ba ci.

^15-16 Ani cu htang aat khai ah a hteh kawn ah Baoz naw bii bik ci gui am, “Htang pawk ah ng’yän nak ung ka phi ani naw la sä, a i phi kä nami pyen nak vai. Cun bang ah kä kyak ciah, ah pyi ah htang paw kung ka htang vui gui phi ani naw a kaw vai ah nami chah shut vai nei” cik ci.

¹⁷ Ruth naw khomü hün güt ung lai ah htang vui kawk ne, leh ne k’ceiu neta, htang pye m’ku lei hma gah ci.

¹⁸ Ani naw cun ah htang cu gawnu kyong ah phui neta a i hlawk ah ani naw a shui tu cu acei ah nu am m’hnuh tuk ci. Ani naw a cei ah nu am acita a ei pawih phi thak law tuk ci.

¹⁹ Naomi naw ani am, “Shin ah htang cu a hawi ka na khäm tu ang tuhngawi? A u ah lai ung ang na bi tu? Nang ning ngaih pe thei ciah chang cu Khanpughi naw hriham pe sä!” cik ci. Cun kawn ah Ruth naw Naomi am, ani ah bi nak tu cu, Boaz ming nak ciah chang ah lo ah a kyak ah mawng m’thein tuk ci.

²⁰ “Bawipa naw Boaz cu hriham pe sä, aksi la ak ghing avan ah ma ah Bawipa naw ashaitak cu küm ci nei” cine Naomi naw m’tam ci. Cun kawn ah ani naw, “Shin ah chang cu mikmi ah mätzah tumat ah kyak ci nei, mikmi nam htei gui khai ungka, tumat ah kia ci nei,” cik ci.

²¹ Cun kawn ah Ruth naw, “Ani pi bäih ah ani naw ana pyen nak cu, geit kä ami khäm pha yawp ah chuih abi bi gui awn a täng ah ka bi tu vai ah na pyen nak ci” cik ci.

²² “Naomi naw Ruth am, “Ä, ka hta hnumi, Boaz ah lo ung bik ciah hnumi gui awn a täng ah na bi tu cu akni pi ah kyak khai nei. A hei ah lo ah hteh ung chang gui naw ning gaih m’gin khai gui nei” cik ci.

²³ Cun ah kyasei, Ruth cu ngami awn a täng ah htang m’guh, htang ami khäm yawp güt a täng ah bi tuk ci. Cun kawn ah ani cu acei ah nu awn om lä ci goi.