ROMAN 9 - Cho Bible Common Language 2016

Khanpughi La Ak Chang Gui

¹ Kei naw akcang ka pyein cu; kei ung Bawi Khrit om ci kya sei kei kä ka hleei ci. Mumcha Theing ah uknak awn om ciah kam lung kyong naw kei kä ka hleei ah mawng cu dang sak ci.

² Kei cu ang htei ah ka thüi ci. Kam lung kyong ah angtäi sei yaica nak om ci.

³ Ka chang gui, ka k’chi ng’chüng gui ah hmawk ah Khanpughi ah m’kyuk nak la Bawi Khrit awn ng’pai nak phi ka aut hlük ciah m’lung om ci nei.

⁴ Ngahmi cu Khanpughi ah chang ah kyak ci gui; Khanpughi naw ngahmi cu a hta ah pyang gui ne abämang nak cu hmuh sak gui ci: Bawipa naw ngami awn thukhän bik ci, ngah mi am thukhän pe gui ci; Ngah mi naw akcang ah khawihnah ci gui; Ngami naw Khanpughi ah shaitaak gah ci gui;

⁵ Ngah mi cu mingthang ciah Hebru hta ng’shon ah kyak ci gui. Bawi khrit cun phi hnicim chang pumsa ung ngah mi ah pakhui ah kyak ci. Ang tüi avan uk ciah Ka Khanpughi cu angtäi sei hlüngtai nak om sä! Amen.

⁶ Khanpughi ah shaitaak cu yu kyavük düt ciah ka pyein ah kä kyak ci; a i ah kya sei ci ung Israel chang gui bäng Khanpughi ah chang gui ah kä kyak ci, chang khui hei gui phi Khanpughi ah chang gui ah kyak ci.

⁷ Abraham ah hta ng’shon avan cun phi Khanpughi ah hta gui ah kä kyak ci gui. Khanpughi naw, “Nang cu Isaak bäng awn vah na ng’shon ba khai, ciah shaitaak ka ning pek ci,” cine Abraham cu kyak nak ci.

⁸ Abraham ah hta ng’shon avan cu Khanpughi ah hta gui ah kä kyak ci, Khanpughi ah shaitaak awn ng’tüi lawk ciah chang gui cun vah, Abraham ah hta ng’shon akcang ah kyak ci gui.

⁹ Khanpughi naw, “A khin a khüm law ung kei ka lawk khai, Sarah cu k’pami hta ah hta lawk khai nei,” cine Abraham am shaitaak nak pek ci.

¹⁰ Cun kawn ah Rebekka ah hta goi cu Mi pughi Issak awn ani hta goi ah kyak ci.

^11-12 Ngahni kä ng’tüi law pha ni ne, ak ni ak kaa kä a ni bilawh pha ung Khanpughi naw, Rebekka am, “Na hta ng’vai pi naw, ak hmaw pi cu hnün thawh pek khai nei,” cine kyak nak ci. Cun ah a pyein cu Khanpughi naw amät ah ng’yak hlü ah a hta tumat a ghü a mawng cu am dang ah kyak ci. Khanpughi naw cun ah abi cu, chang ah bilawh nak teng ne a ghü ah kä kyak ci, amät ah m’hni ah ghü ne a khü ah kyak ci.

¹³ Cacim theing ung; “Kei naw Jakob cu ka m’hni ci, Cun ung phi Esau cu ka gen ci,” ciah om ci.

¹⁴ Cun ung Khanpughi kä taga ciah mi pyein khai ang! Cun ah kä kyak ci.

¹⁵ Khanpughi naw Moses am, “Kei naw ka chimgein hlü cu ka chimgein khai, Kei naw kam hteihtang hlü cu kam hteihtang khai,” cine kyak nak ci.

¹⁶ Cun ah kya sei Khanpughi ah ghü nak cu, chang ah ng’yak hlü la bilawh nak awn ah kä kyak ci, Khanpughi ah chimgein nak awn ah kyak ci.

¹⁷ Khanpughi naw Egypt ghangpughang Pharaoh am, “Kei naw nang ghangpughang ah ka ning m’düih cu, nang awn ka hlüngtai nak cu m’dang ne, m’dek ah khan avan ung kei ah ka hluicang nak cu a gawk vai ah hmawk ah kyak ci,” ciah a kyak nak cu cacim theing ung om ci.

¹⁸ Cun ah kya sei Khanpughi naw ak chimgein hlü cu chimgein ne, a lingkeng sak hlü cu lingkeng sak ci.

Khanpughi ah M’lung She Nak La Chimgein Nak

¹⁹ “Cun ah a kyak ung Khanpughi naw a i chaa chang gui cu m’kat gui khai ang! A u naw Khanpughi ah ng’yak hlü cu hnu ng’tuk püi hlawt khai ang!” cine na ng’shi hlük ciah chang om khai nei.

²⁰ Teih püi aw, nang cu a u ah kya ne, Khanpughi cu, cuk chaa na ng’shi hning vai ang! A tüi sho ah chang naw, tüi sho ciah Bawipa cu, “A i ah kya sei, nang naw kei cu shin chaa ah na na tüi sho ang,” cine ng’shi hning khai ang!

²¹ K’am sheh ci naw k’am m’dek cu amät ah ng’yak hlü ah piang hning ciah kä kya ne ang! Ani naw k’am m’dek tumat awn, akni akshe, am hni ah sheh hning ciah kä kya ne ang!

²² Khanpughi ah bi cu a shin ah mäih bä ah kyak ci. Khanpughi naw am lung k’she nak cu ng’dang sak ne, a hlüngtai nak cu ang thang vai ah ng’ya hlük ci. Cun ung phi am lung k’she nak ung di maih ci gui ah khan ah ang htei ah hnimgein nak om ci.

²³ Cun kawn ah Khanpughi cu ak chimgein gui ah chang gui naw, chünla ciah a bämang nak ami hmuh vai ah ng’ya hlük ci. Cun ah chang gui cu Khanpughi ah bämang nak ami gah tu vai ah Khanpughi naw a pyan tham gui ah kyak ci.

²⁴ Mikmi cu Khanpughi ah na khü ah chang gui ah mi kyak ci. Khanpughi naw mikmi a na khü nak gui ung, Jew chang gui ung kaa bäng ah kä kyak ciah, chang khui hei gui ungka phi khü gui ci.

²⁵ Hosea ah ca guk ung Khanpughi naw; “Kei ah ka chang ah kä kyak ci gui cu ka chang ah ka khü gui khai; Kä ka m’hni ah changpakhui gui cu, Ka m’hni ah changpakhui ah ka khü gui khai;

²⁶ “A i kho ah phi nang mi cu kei ah chang ah kä nami kyak khai, ci ne a kyak nak gui ah chang gui cu, Ghing ciah Khanpughi ah hta gui nei, ciah khü gui vai nei,” ci ne pyein ci.

²⁷ Israel chang gui ah mawng cu Isaiah naw, “Israel chang gui cu, tuinu kem ah laigin k’chü ah ami da ung phi, ngami ung kaa chang api naw vah hun nak cu gah khai gui.

²⁸ A i ah kya sei ci ung Khanpughi naw khomdek khan ah chang gui cu, ang ghit ah m’khoi m’chaa gui khai, ciah mawng ah kyak ci,” ci ne pyein ci.

²⁹ Cun kawn ah Isaiah naw, “Hlüngtai pi k’bäih ciah Khanpughi naw, mi pakhui kä a maih vai ah mi hta ng’shon gui cu kä a nam gein gui vaisü ung, mikmi cu Sodom la Komorrah ah mäih ah mi kyak khai süte,” cine a pyein ah mäih ah kyak ci.

Israel Gui ah Hmawk ah Paul ah Taigü Nak

³⁰ Kei mi ah pyein hlü cu shin ah kyak ci, Khanpughi ah ma ah ng’düng vai ah kä k’tha nak ciah khui hei chang gui cu, ami yum nak awn Khanpughi ung ng’düng nak gah ci gui.

³¹ Cun ung phi Khanpughi naw a ghü ah chang gui cu, Khanpughi ah ma ah ng’düng nak vai ah thukhän cu shui u ne phi kä hmuk ci gui.

³² A i ah kya sei ci ung ngami cu Khanpughi ami yum nak ung kä ng’düi u ne, ami mät ah bilawh nak ung ami ng’düih ah phäh ah kyak ci. Cun ah kya sei ngami cu cacim theing ung om ciah lung ung ng’vawn ne ng’täng ci gui.

³³ Cacim Theing ung; “Teng vä, chang gui naw ami ng’vawn nak vai ah, lung tumat cu Zion m’htung khan ah ka m’shän khai nei, Chang gui cu cun ah lung ung ng’vawn ne ng’täng khai gui nei. Cun ung phi Lung ah kyak ciah Bawi Khrit yum ciah chang gui cu, a i yah ung phi ami thüisei nak kä om khai nei,” ciah om ci.