ROMAN 8 - Cho Bible Common Language 2016

Mumcha awn Ghin Nak

¹ Cun ah kya sei Jesuh Khrit ung kawng ät ne om ciah chang gui cu Khanpughi ah shet m’kat nak phiawn nak ci gui.

² Cun ah kya sei Jesuh Khrit ung na kawng ät sak ciah Mumcha ah thukhän naw, katnak la sih nak ah thukhän ung, kei cu na phiawn sak pyi ci nei.

³ Hnicim chang ak tha kä om sei, thukhän naw kä a bi peit hlawt cu Khanpughi naw bi pyi ci nei. Khanpughi naw hnicim chang ung om ciah katnak cu m’kat khai ah A Htapa cu yuk m’kyum lawk ci. Ahtapa cu katnak k’täm ne m’di khai ah, hnicim chang ah mäih ah katnak nupuk nah ne ng’tüi lawk ci.

⁴ Khanpughi naw cun ah abi cu hnicim chang nupuk nak ciah kä kya ne, Mumcha ung ghing ciah, mikmi naw thukhän ah ng’düng sei mi läk vai ah hmawk ah kyak ci.

⁵ Hnicim chang nupuk nah ne ghing ciah chang gui cu, hnicim chang ah ng’yak hlü bängbäng ngaih-tüh ci gui, Mumcha ah m’cäi m’ä ah ghing ciah chang gui cu, Mumcha ah ng’yak hlü bängbäng ngaih-tüh ci gui,

⁶ Hnicim chang ah ng’yak hlü bäng ngaih-tüh ciah chang cu sih nak ung gawk ci, Mumcha ah ng’yak hlü ngaih-tüh ciah chang cu ghin nak la dimdeeih nak gah ci.

⁷ Hnicim chang ah ng’yak hlü bäng ngaih-tüh ciah chang cu Khanpughi ah gaa ah kyak ci, ani naw Khanpughi ah thukhän kä läk hlawt ci, akcang ah kä läk hlawt ci.

⁸ Amät ah hnicim chang ah ng’yak hlü ah läk ciah chang cu, Khanpughi naw kä m’tamkhah hlawt ci.

⁹ Cun ung phi Khanpughi ah Mumcha cu nang mi ung akcang ah om ciah a kyak ung, hnicim chang ah m’cäi ah kä om u ne, Mumcha Theing ah m’cäi ah nami om vai. Bawi Khrit ah Mumcha ah kä om nak ah chang cu Bawi Khrit awn kä ng’phaa ci.

¹⁰ Nangmi ung Bawi Khrit cu akcang ah om ciah a kyak ung, nami pumsa cu katnak awn sik khai ah a kyak tu pang ung phi. Mumcha naw ning ghin sak gui khai, a i ah kya sei ci ung nang mi cu Khanpughi ung ng’düng nak nami gah pyi ciah a kyak ah hmawk ah kyak ci.

¹¹ Bawi Jesuh sih nak ungka thawh ba sak ciah Khanpughi ah Mumcha cu nang mi ung akcang ah om ciah a kyak ung, Bawi Khrit sih nak ung kaa thawh ba sak ciah Bawipa naw, amät ah Mumcha awn sih thei ciah nami pumsacun phi ghin sak khai nei.

¹² Cun ah kya sei phäi nau gui aw, mikmi cu hnicim chang ah ng’yak hlü ah kä mi om ne, Khanpughi ah Mumcha ah m’cäi ah mi om khai nei.

¹³ Nang mi cu hnicim chang ah ng’yak hlü ah nami om ah a kyak ung nami sik khai nei, cun ung phi nami shetkat nak cu Mumcha Theing awn nami sih sak ah a kyak ung ghin nak nami gah khai nei.

¹⁴ Khanpughi ah Mumcha ah lam shüm nak läk ciah chang cu Khanpughi ah Hta ah kyak ci.

¹⁵ Khanpughi ah ning peit gui ah Mumcha naw nang mi cu Khlei-htein ah kä ning k’hmoh gui ci, kyih ah phi kä ning kyihkyawk sak gui ci. Mumcha naw mikmi cu Khanpughi ah hta gui ah na pyang gui sei, Mumcha ah na peit gui ah hlüngtai nak awn Khanpughi cu, “Ka Pa, Ka Pa,” cine khü tu vai ah mi khin tuk ci.

¹⁶ Mikmi cu Khanpughi ah hta gui ah mi kyak ah mawng ang dang vai ah Khanpughi ah Mumcha naw, mi mümcha cu ng’khap püi ci.

¹⁷ Mikmi cu Khanpughi ah hta gui ah mi kyak ci kyasei, ak chang gui ah hmawk ah Khanpughi naw am hnüt ah hrilham cu mi khäm khai. Bawi Khrit ah hmawk ah Khanpughi naw am hnüt ah bäkhäk nak cun phi mi khäm tuk khai. Mikmi cu Bawi Khrit awn a täng ah gein vai nak mi gah ah a kyak ung, ani awn a täng ah bämang nak phi mi gah khai.

Mi Gawk Nak Vai ah Bämang Nak

¹⁸ Tuk bäi chü mi bui aut ah gein vai nak cu, Khanpughi naw a na peit law gui vai ah bämang nak awn kä tutäng khai ciah kei naw ka yum ci.

¹⁹ Khanpughi naw a hta gui am, am dang gui vai ah amawng gui cu, a tüi pyan avan naw ang htei ah ging co ci gui.

²⁰ Khanpughi naw a tüi pyan avan cu alä k’ding ah kyak khai ah m’shetkat ci. Cun ah abi cu khomdek khan ah ng’yak hlü ah kä kyak ci, Khanpughi ah ang yak hlü ah kyak ci. Cun ung phi ngaih u nak om ci;

²¹ Cun ah ngaih u nak cu, kho hnüüp ät ung a tüi pyan gui naw khihpawn didap nak ungka phyawng ne, Khanpughi ah hta gui awn a täng ah bämang lünlawi nak ami gah vai ah hmawk ah kyak ci.

²² Mi van naw mi hmat yawp ah tuhbäichü a khin ung, a tüi pian gui avan cu, nau poi m’neh ah mäih ah nat nak om ci.

²³ A tüi pyan ah khomdek khan bäng ah kä kyak ciah, Khanpughi naw ak htük bäih ah a peit ah Mumcha gah ciah mikmi cun phi, Khanpughi ah hta ah kyak nak vai la, mi pumsa avan hun nak a gah nak vai cu, mi ging ne mi geinvai ci.

²⁴ Mikmi cu ngaih u nak awn hun nak mi gah ci. Cun ah mi ngaih u cu mikmi naw kä mi hmuk ci, mi hmuh ah a kyak ung cun cu akcang ah mi ngaih u ah kä kyak ci. Mik awn hmuh ei cu a u naw ngaih u khai ang!

²⁵ Mikmi naw kä mi hmuh cu m’lung üp ne mi ngaih u ne, hnimgei nak awn mi ngäng ci.

²⁶ Acun sang ung Mumcha naw ak tha ken ciah mikmi cu nam htei gui khai ah gawk lawk ci. Mikmi naw a i chaa taigü vai kä mi hmat ci; m’gawng shai awn kä pyein thei vai ah ak aw awn, Mumcha amät naw, mikmi ah hmawk ah Khanpughi ah na ng’yoih pe gui ci.

²⁷ Chang gui ah m’lung kyong hmu thei ciah Khanpughi naw Mumcha ah m’lung ngaih cun phi hmat yawp ci. A i ah kya sei ci ung Mumcha naw Khanpughi ah ang yak hlü ah, ak chang gui ah phäh ah ang yoih ah hmawk ah kyak ci.

²⁸ Khanpughi m’hni u sei ang yak hlü ah a khü gui ah chang gui naw, ami bilawh nak ungka ng’dang lawk khai ah, Khanpughi naw ngahmi awn a täng ah a bilawh cu mi hmat ci.

²⁹ Khanpughi naw a ghü ah chang gui cu, A hta ah mäih ah ami kyak vai ah m’cha ne m’hnüt ne om sak gui ci. A hta cu ng’phäi nau gui akda ung, ang vai pi ah a kyak vai ah hmawk ah cun ah a ciah kyak ci.

³⁰ Cun ah kya sei Khanpughi naw ghü ne ak pai gui cu khü gui ci; a khü gui ah chang gui cu amät ung chang düng ah k’bäi gui netah, amät ah bäkhäk nak cun phi gah sak gui ci.

Bawi Khrit Jesuh ung Khanpughi ah M’hni Nak

³¹ Shin ah a mawng gui avan cu teng ah a kyak ung, Khanpughi cu mik mi lam ah a om ung a u naw na hnu ng’tuk püi gui hning khai ang!

³² Khanpughi naw amät ah Htapa cu kä ng’vang nah ne, chang van ah hmawk ah pe ne, na küikyan gui ci nei. A Htapa hngaw mikmi ah hmawk ah pek ciah Khanpughi naw, a päng avan cu, kä ng’vangca ah kä na pe gui ne kä om khai nei.

³³ Khanpughi naw a ghü ah chang gui cu a u naw m’kat gui khai ang! Ngahmi ung katnak kä om ciah Khanpughi amät naw m’dang pyi ci nei.

³⁴ Cun ah kya sei ngami cu a u naw kä m’kat gui hlawt ci. Sih nak bäng ah kä kyak ciah sih nak ungka tho ba ciah Jesuh Khrit naw Khanpughi ah ak pat lam ah ngoh netah, mikmi ah hmawk ah ng’hui ng’paa ne om ci.

³⁵ Cun ah kya sei a u naw mikmi cu Bawi Khrit ah m’hni nak awn nam chaa gui hlawt khai ang! Zaica nak, cümbawng nak, k’dukdeiu nak, cawigha nak, pyamthaam nak, gaa kyih nak la sih nak; cun gui naw Bawipa ah m’hni nak awn nam chaa gui hlawt khai maa!

³⁶ Cacim Theing ung; “Bawipa ah Hmawk ah Kei mi cu, ak hnüüp pum ung, sih nak gaa awn kami ng’aut ci nei; Ngawn vai ah ami k’bäi ah htome ah mäih ah, Chang naw kei mi cu na ngai gui ci nei”, ciah om ciah mäih ah kyak ci.

³⁷ Kä ng’chaa bäng ah kä kyak ciah, acun ah mawng gui avan awn ng’aut law nak ung, mikmi nam hni gui ciah Bawipa naw khüt sei, näng nak cu mi gah ci.

³⁸ Cun ah kya sei, a i naw phi mikmi cu Bawipa ah m’hni nak awn kä nam chaa gui hlawt khai: sih nak la ghin nak ka phi kya, khan chang gui la khankho uk ne hlüngtai ci gui ah phi kya, tuh chü mawng nak ah phi kya, ngawi ah ma nak vai ah phi kya,

³⁹ m’dek ah khan ah phi kya, m’dek ah kaa ah phi kya, kho ah kaa ung a tüi sho avan naw phi kya; a i naw phi mi Bawipa Jesuh Khrit awn Khanpughi naw ana peit gui ah m’hni nak awn kä nam chaa gui hlawt khai, cicu kei naw akcang ah ka hmat ci nei.