ROMAN 7 - Cho Bible Common Language 2016

Ng’chulaa Nak awn Am’tumtäng Nak

¹ Phäi nau gui aw, nang mi cu thukhän nami hmat pyi ci kya ne tuk bäi ka pyein vai ah a mawng gui cu nami hmat khai nei. Chang cu a ghin yah ak chuih thukhän ah kyong ung om ci.

² Ceimah pyi ciah hnumi tumat awn m’tumtäng ah a kyak ung, cun ah hnumi cu a cei a ghin yah ak chuih ng’chungla nak ah thukhän ah kaa ah om ci. Cun ung phi a cei a sih ah a kyak läi ung ng’chu laa nak thukhän phiawn nak ciah kyak ci.

³ Cun ah kya sei ani cu a cei ghing ne om lang sei, a hei pami awn ani om ba ah a kyak ung ani cu thuihmai chang ah pyein vai kyak ci. Cun ung phi a cei a sih läi ung, ani cu thukhän phiawn na pyi ci kya sei, a hei pami awn ani ng’chulaa ba ung thuihmai chang ah pyein vai ah kä kyak ci.

⁴ Phäi nau gui aw, shin ah mawng cu nang mi awn phi ng’lüng ci nei. Nang mi cu Bawi Khrit ah pumsa ah nami kya pyi ci kya ne, thukhän ung nami ghin nak cu si pyi ci nei. Khanpughi ah khuut bi nak ung hnüntho ciah mi kyak nak vai ah sih nak ung ka tho ba ciah Bawi Khrit ah chang ah nami kya pyi ci nei.

⁵ Mikmi cu khomdek pumsa ah ng’yak hlü ah ghing ne mi om yah ung thukhän awn lawk ciah shetkat nak hlü ah m’lung naw mi pumsa kyong ah bi bi ne, mikmi cu na sih sak gui ci.

⁶ Yanä na khitpawng gui man ciah thukhän cu mi sih püi pyi ci kya sei, tuk bäi mikmi naw thukhän cu mi phyawn ah pyi ci nei. Tuk bäi mikmi cu gu ne pyan ah thukhän lam k’phyim awn kä kyak ciah, Mumcha ah pyan ah lam k’thai awn Khanpughi ah khuut cu mi bik ci nei.

Thukhän La Kat Nak

⁷ Cun ah a kyak ung thukhän amät cu katnak ah mi pyein khai ang! Cun ah kä kyak ci! Cun ung phi katnak cu a i ang, cicu thukhän naw na hmat sak ci. A vaisü ah, “Chang ah khawh kä ng’yak hlü düt vai,” ciah thukhän naw kä a pyein vai sü ung, ng’yak hlü nak düt ah mawng cu kei naw kä ka hmat khai sü te,

⁸ Kat nak naw mikmi am cun ah thukhän cu na shüm sak gui ne, mi m’lung kyong ah ng’yak hlü nak a hlü hlü cu dang sak ci. Thukhän kä a om ung katnak cu ak si ah kyak ci.

⁹ Kei ka mät phi thukhän cu kä ka hmat man ci, thukhän ka hmat law vai am tün ne, katnak cu kei ung ghing lawk ci.

¹⁰ Cun kawn ah kei cu ka sik ci. Kei naw ka ghing nak vai ah pyein ah thukhän naw kei cu na sih sak ci nei.

¹¹ Kat nak naw lam shui ne thukhän am’dang nak awn kei cu na sih sak ci nei.

¹² Cun ah kya sei thukhän cu theing cim ci, thukhän cu ng’cim ne, ng’düng ne, nik ci.

¹³ Cun ah a kyak ung akni naw kei cu na sih sak ne ang! Cun ah kä kyak ci, Kei na sih sak cicu katnak ah kyak ci, kat na cu kei ah ka nupuk ng’tüipüi ah ang dang vai ah, ak ni cu mang ne kei cu ana sih sak ah kyak ci. Cun ah kya sei katnak a i hlawk ah ashetkat ah mawng cu thukhän awn hmat ah kyak ci.

Chang ah M’lung Ngaih Ang Pai Nak

¹⁴ Thukhän cu mümcha lam ah kyak ciah mi hmat ci, cun ung phi kei cu katnak ah khlei-htein, chang ah hta ah ka kyak ci.

¹⁵ Kei naw a i ka bi cu kä ka hmat ci. A i ah kya sei ci ung, kei naw ka bi hlü cu kä bi phung ne, kä ka ng’yak hlü bängbäng cu ka bik ciah kyak ci.

¹⁶ Kei naw kä ka bi hlü bängbäng te, ka bik ciah a kyak nak awn, thukhän cu ng’düng ciah kak bäi ci.

¹⁷ Cun ah kya sei kei naw ka bilawh gui bik cicu kei akcang ah kä kyak ci; kei ah m’lung kyong ung ghing ciah katnak ah bi ah kyak ci.

¹⁸ Hnicim chang ah ka kyak ciah kei ung akni kä om ciah kei naw ka hmat ci. A i ah kya sei ci ung kei naw akni ka bi hlü ung phi, akni cu kä ka bi hlawt ci.

¹⁹ Kei naw ka ng’yak hlü ah akni cu kä bi hlawt ne, kä ka ng’yak hlü ah akshe bängbäng cu ka bik ci.

²⁰ Kei naw kä ka ng’yak hlü bängbäng ka bi cu, kei ah bi ah kä kyak ci, kei ah m’lung kyong ung ghing ne om ciah katnak ah bi ah kyak ci.

²¹ Cun ah kya sei thukhän ah bi nak ung kei naw ka hmuh cu, Kei naw akni ka bi hlü nak awn, akshe bängbäng ghü ne ka bik ciah kyak ci.

²² Khanpughi ah thukhän cu kei ah m’lung kyong naw yeikyai ne dou ci.

²³ Cun ung phi kei ah pumsa kyong ah kei ah m’lung ngaih ah ng’yak hlü awn ng’kükneet ng’tu ng’aat ciah thukhän ah mawng tumat om ci. Cun cu kei ah pumsa kyong ah hnüntho law ne, kei cu katnak ah thawng khui ah na chum ci.

²⁴ Kei cu ang htei ah kam lung thüi aih ci nei, Kei na sih sak ciah shin ah pumsa ungka a u naw kei cu na hun tuk khai ang!

²⁵ Mi Bawipa Jesuh Khrit awn na hun gui ciah Khanpughi ah m’gein nak cu hlüngtai aih ci nei. Ak hnu ah ka mät ah mawng ka pyein hlü cu, Ka m’lung kyong awn Khanpughi ah khuut ka bi sang ung, ka hnicim chang nak naw katnak ah bi cu ka bik ci nei.