ROMAN 4 - Cho Bible Common Language 2016

Thei Tu Vai ah Abraham ah Yum Nak

¹ Cun kawn ah mi pughi Abraham ah mawng cu mi ngaih-tüh khai. Ani ah buiaut law gui cu a i ang!

² Abraham cu amät a bilawh om ih nak awn Khanpughi ung ng’düng ciah a kyak vai sü ung, a ni ung khähghah nak vai om khai sü te; cun ung phi ani cu Khanpughi ah ma ah kä khähghah hlawt ci.

³ Cacim theing ung, “Abraham cu Khanpughi yum ci, a yum nak awn Khanpughi naw, chang düng ah k’bäi ne dou ci,” ciah om ci.

⁴ Chang tumat cu bi bi ne, ng’cheng a gah ah a kyak ung, cun ah ng’cheng cu ghüh ci naw a peit tu düt ah kä kyak ciah, gah khin ne a gah ah kyak ci.

⁵ Chang cu amät ah bilawh om ih düt kä ngaih u ne, Khanpughi yum ne a ngaih u ah a kyak ung, Khanpughi naw ani ah yum nak cu ngaih pe ne, ani cu katnak kä om ciah m’hnüt ne k’bäi ci. A cu chaa ah Khanpughi naw chang cu düng sak ne dou ci.

⁶ Amät ah bilawh nak awn kä kyak ciah Khanpughi naw düng ciah chang ah a dou cu yeikyai nak om ci, ciah mawng cu, David naw;

⁷ “Cheishoh nak ung m’geinsei nak gah ci gui la, Shetkat nak ung hun phiawn nak gah ci gui cu, yeikyai nak om ci!

⁸ A shetkat nak Bawipa naw kä a khei peit ah chang cu yeikyai nak om ci!” ciah guk ci.

⁹ Shin ah David ah pyein ah yeikyai nak cu, vun-ah nak bik ci gui bäng ah gah ah kya ne ang! Cun ah kä kyak ci, vun-ah nak kä bi tuk ci gui naw phi gah tuk ci gui nei. Mikmi naw mi hmuh pyi ah cacim ung, “Abraham cu Khanpughi yum ci, a yum nak awn Khanpughi naw chang düng ah k’bäi ne dou ci.

¹⁰ Cun ah Abraham cu chang düng ah Khanpughi naw k’bäi ne a dou nak ah khin cu, Abraham naw vun-ah nak abi kawn ah ang! Kä a bi pha ung ang! Abi kawn ah kä kyak ci, kä abi pha ung ah kyak ci.

¹¹ Cun ah Abraham cu Khanpughi naw k’bäi ne a dou kawn ah vun-ah nak cu bik ci. Cun ah vun-ah nak abi ah mawng cu, Khanpughi naw Abraham ah yum nak cu hmu netah, vun-ah nak kä abi pha ung, chang düng ah k’bäi ne a dou cu saksi ah ng’dang khai ah am hnüt nak ah kyak ci. Cun ah kya sei Abraham cu vun-ah nak kä abi ung phi, Khanpughi a yum nak awn, chang düng ah k’bäi ne dou nak gah ci gui ah Pa ah kya lawk ci.

¹² Ani cu vun-ah nak bik ci gui ah Pa ah phi kyak ci. Cun kawn ah ani cu vun-ah nak bik ci gui bäng ah kä kya ne, mi pughi Abraham naw vun-ah nak kä a gah pha ung, Khanpughi cu yum ne, ghing ne om te ci gui cu thei tu gui ci gui ah Pa ah phi kyak ci.

Zum Nak awn Khanpughi ah Shaitaak Cu Gah ah Mawng

¹³ Khanpughi naw Abraham la a hta ng’shon am, khomdek khan a van cu na khäm khai cine shaitaak nak pek ci. Cun ah shai a taak cu, Abraham naw thukhän a läk ah hmawk ah kä kyak ci, Khanpughi a yum nak awn ani cu, Khanpughi naw chang düng ah k’bäi ne a dou ah hmawk ah kyak ci.

¹⁴ A vaisü ah thukhän läk ciah chang naw vah shaitaak cu küm sei gah khai ah a kyak läi ung, chang ah yum nak phi a kholä ah kya ne, Khanpughi ah shaitaak phi a kholä ah kyak khai.

¹⁵ Thukhän naw Khanpughi ah m’lung k’she nak cu m’dang ci; cun ung phi thukhän kä a om ung m’shekat nak phi kä om khai kyak ci.

¹⁶ Cun ah kya sei Abraham ah hta ng’shon gui naw Khanpughi ah shaitaak, a phu kä peit ah ami gah vai cu ngaih gep khai ah, Khanpughi naw Abraham ah yum nak ah khan ah shaitaak nak a peit ah kyak ci. Cun ah shaitaak cu thukhän läk ci gui ah hmawk bäng ah kä kyak ci, Abraham ah mäih ah Khanpughi yum ciah chang gui ah hmawk ah phi kyak ci; a i ah kya sei ci ung Abraham cu mi van ah pa ah akyak ah hmawk ah kyak ci.

¹⁷ Cun cu cacim theing ung, “Kei naw nang cu chang pakhui-van ah pa ah ka ning pyang ci nei,” cine a pyein ah mäih ah kya ci. Cun ah kya sei Khanpughi ah shaitaak cu kümbe ci. Khanpughi cu Abraham ah ngaih u, sik ciah chang gui ghin ba sak ci la, kä ng’tüi om man ci gui ng’tüi om sak ciah Khanpughi ah kyak ci.

¹⁸ Abraham cu a khaw m’vui ne a kyak yah ung phi Khanpughi cu yum ne ngaih u ci. Cun ah kya ne ani cu changpakhui avan ah pa ah kya lawk ci. Cacim theing ung, “Nang ah hta ng’shon gui cu aisi k’chü ah püi khai nei,” a ciah mäih ah kyak ci.

¹⁹ Abraham cu a khokum phyaa law pyi sei a pumsa cu ak si ah mäih ah kyak ci, Sarah cun phi kä hta hning khai ah ghi pyi ci, cun ung phi Khanpughi a yum nak cu khäng htek aih ci.

²⁰ Ani cu a yum nak kä ng’hlat phung ci, Khanpughi ah shaitaak phi kä a ngaih gep nak kä om ci; a yum nak naw hlüngtai nak awn be sak sei, Khanpughi cu m’hlüngtai ci.

²¹ Khanpughi naw a shaitaak ah mäih ah bik khai cicu Abraham naw ak be ah yum ci.

²² Cun ah a yum ah hmawk ah Khanpughi naw ani cu, chang düng ah k’bäi ne adou ah kyak ci.

²³ “Khanpughi naw ani cu chang düng ah k’bäi ne dou ci,” ciah thu cu Abraham ah hmawk bäng ah kä kyak ci;

²⁴ Mikmi ah hmawk ah phi kyak ci, a i ah kya sei ci ung, Jesuh mi Bawipa sih nak ungka thawh ba sak ciah Khanpughi cu, mi yum nak awn Khanpughi naw chang düng ah na k’bäi gui ne a na dou gui ah hmawk ah kyak ci.

²⁵ Khanpughi naw Bawipa Jesuh cu mikmi ah katnak ah hmawk ah sih nak ung gawk sak ci, Khanpughi naw mikmi cu chang düng ah k’bäi ne ana dou gui vai ah hmawk ah sih nak ungka thawh ba sak ci.