ROMAN 3 - Cho Bible Common Language 2016

¹ Cun ah a kyak ung Jew chang gui cu khui hei chang gui ah mä bä tu ba u ne ang! Ngami naw vun-ah nak ami bi cu, a phuma mä om ne ang!

² A phuma läi cu akda om ci, a htük bäih ah Khanpughi ah ng’thu m’than cu Jew chang gui ung gawk law ma ci.

³ Chang amshah cu pyein ah kä ami om ah a kyak ung, acun ah phäh ah Khanpughi phi pyein ah kä om ciah kya thei khai ang!

⁴ Cun ah kä kyak ci, chang ah hta van a hleeihlak ung phi Khanpughi cu ng’düng khenggeng ne om ci. Cacim ung, “Thu na pyein cu ng’düng bäbä ne, M’khoichaa nak na aut ung phi näng nak om khai nei,” ciah om ci.

⁵ Mikmi ah cheishoh nak naw Khanpughi ah düng nak cu dang sak pi ciah a kyak ung, a i ah mi pyein khai ang! Khanpughi naw mi kat ana m’kat gui cu, Khanpughi cheishoh ciah mi pyein khai ang! (Cun cu chang gui ah thu man düt ah thu ah kyak ci.)

⁶ Cun ah kä kyak ci, Khanpughi kä a ng’düng ah a kyak ung, a i chaa khomdek khan cu m’khoichaa hlawt khai ang!

⁷ A vaisü ah kei ah kä ng’düng nak naw, Khanpughi ah ng’düng nak cu dang sak pi ne, hlüngtai sak pi ciah a kyak ung, a i ah kya sei kei cu shekat ciah chang ah kya ne, hma m’kat nak cu ka gah ang!

⁸ “Ak ni a gawk law vai ah ak she cu mi bi vai,” cine mi pyein khai ang! Acun ah mäih ah kei naw ka pyein ah pyein u ne chang amshah naw ng’thu gu na k’bün ne na katnak ci gui nei. Cun ah chang gui cu ami gah vai ah mäih ah m’khoichaa nak gah khai gui nei.

Ng’düng Ciah Chang Tumat Phi Kä Om Ci

⁹ Cun ah a kyak ung mikmi Jew chang gui cu, chang khui hei gui ah mä mi ni kyom nak tuba ah a mawng om ne ang! A i phi mi nikiom nak tuba kä om ci, Jew chang gui la chang khui hei gui avan cu, katnak ah hlüngtai nak kaa ah mi om ah mawng cu kei naw ka pyein pyi ah kyak ci.

¹⁰ Cacim theing ung; “Ng’düng ciah chang tumat phi kä om ci,

¹¹ Akcang ah hmuhmat ciah chang tumat phi kä om ci, Khanpughi khawihnah ciah chang tumat phi kä om ci.

¹² Chang avan cu lam hma yawp ci gui nei, Chang avan cu a täng ah shekat yawp ci gui nei; Chang k’ni tumat phi kä om ci, tumat hta phi kä om ci nei.

¹³ Ngami ah ami ng’thu m’kha cu, sih nak ng’cim hmun ah kyak ci; Ami m’lei awn thuvi hleeihlak ci gui, Ami m’gawng m’lei cu k’phyu m’äm ah mäih ah am äm om ci:

¹⁴ Ami m’gawng cu shaila ng’plahtang, nget ngawng nak awn be ci,

¹⁵ Ami khawlek cu chang ngawn nak vai ung yangkhai aih ci;

¹⁶ Ami gawk nak päng ah ngami ah kut awn shetkat dimaih nak om ci;

¹⁷ Ngami cu dimdeeih nak ah lam kä hmuk ci gui,

¹⁸ Ngami ung Khanpughi kyih-aa nak ah m’lung api phi kä om ci,” ciah om ci.

¹⁹ Thukhän ung om ciah thu gui phung cu, thukhän ah kaa ah om ci gui ah hmawk ah kyak ci, cicu mi hmat ci. Cun cu hnicim chang gui naw thu m’kha ät phi kä pyein u sei, khomdek khan avan cu Khanpughi ah m’khoichaa nak ung a gawk vai ah kyak ci.

²⁰ Thukhän läk nak awn a u chang phi Khanpughi ah maa ah kä ng’düng hlawt ci; Thukhän cu chang gui ah shetkat nak dang sak ciah kyak ci.

Khanpughi Naw Amät ung Ana Düng Sak Gui ah Mawng

²¹ Cun ung phi Khanpughi ung chang gui ami ng’düng nak vai ah lam cu dang pyi ci nei. Khanpughi ung düng nak cu thukhän nawn na kä kyak ci, cun ah a mawng cu Moses ah Thukhän la puorfet gui naw saksi m’dang ci gui.

²² Khanpughi naw chang gui cu ami yum nak awn, Jesuh Khrit ung düng sak gui ci. Cun cu Khanpughi naw Bawi Khrit yum ciah chang phung ung abi ah kyak ci, a i ah kya sei ci ung, chang gui ung ng’lakmah nak a i kä om ci:

²³ Chang nüng nüng cu shekat u ne, Khanpughi ah bäkhäk nak cu kä gah ci gui.

²⁴ Cun ung phi chang gui hun gui ciah Jesuh Khrit ung, Khanpughi naw, a phu kä peit ah m’gein nak awn chang gui cu düng sak gui ci.

²⁵ Jesuh Khrit ah a sih nak awn chang gui cu, katnak ungka ami phiawn vai ah Khanpughi naw, ani cu chang m’küi nak ah m’hnüt ne k’bäi ci. Chang gui cu ani ami yum nak awn katnak ungka phiawn nak gah ci gui. Khanpughi naw cun ah abi cu, a i chaa ah chang gui ang düng sak gui ah mawng am dang nak ah kyak ci. Yanä akhin ung chang gui ah katnak cu, Khanpughi naw hnimgei nak awn m’düm gui ci.

²⁶ Cun ung phi tuk bäi akhin ung Khanpughi naw, amät ah ng’düng nak cu am dang nak ah, chang gui ah katnak cu, m’hnih sak gui ci. Cunah a bi nak awn Khanpughi naw, amät cu ng’düng ciah a kyak ah mawng la, Bawipa Jesuh yum ciah chang phung ang düng sak ah mawng cu m’dang ci.

²⁷ Cun ah kya sei mikmi mi khähghah nak vai om khai ang! A i kä om ci nei. A i ah kya sei ang! Thukhän mi läk u sei ang! Cun ah kä kyak ci, Khanpughi mi yum ah hmawk ah kyak ci.

²⁸ Chang cu a yum nak bäng awn vah Khanpughi ung ng’düng nak gah ci, thukhän läk nak awn gah ah kä kyak ci, cicu mi hmat ci.

²⁹ Khanpughi cu Jew chang gui ah Khanpughi bäng ah kya ne ang! Chang khui hei gui ah Khanpughi ah kä kya tu ne ang! Akcang ah van ah Khanpughi ah kyak ci nei.

³⁰ Khanpughi cu tumat bäng om ci, Jew chang gui cu ami yum nak awn amät ung düng sak gui khai; acun ah mäih ah chang khui hei gui cun phi ami yum nak awn amät ung düng sak gui khai.

³¹ Cun ah a kyak ung mikmi naw Khanpughi yum nak awn thukhän cu mi nawng en ah kyak khai ang! Cun ah kä kyak ci, thukhän cu mi khän htek sak nak ah kyak ci nei.