ROMAN 2 - Cho Bible Common Language 2016

Khanpughi ah M’khoi M’chaa Nak

¹ Cun ah kya sei teihpüi aw, nang naw chang ah katnak nam khoichaa ung phi, na mät ah katnak kä nam yih hlawt khai. Nang cu katnak bik ciah chang ah kya lang ne, na paw chang cu nam khoichaa tu ah a kyak ung na mät naw na mät nam kat ciah kyak ci.

² Cun ah mäih ah bik ciah chang Khanpughi naw am kat cu, ng’düng ciah mi hmat ci nei.

³ Cun ung phi teihpüi aw, paw chang m’khoichaa nak ah katnak cu nang na mät naw nam cheishoh pyi ci nei. Nang cu Khanpughi ah m’khoichaa nak na phiawn nak khai ah na ngai ci maa!

⁴ Kä cun ung Khanpughi ah chimgein nak, m’lung sau nak la hnimgei nak gui cu a i ah kä na sui ci maa! Khanpughi naw nang cu nang yu ba vai ah lam ning m’shüm ne, a ning m’gein ah mawng cu, nang naw akcang ah na hmat ci nei.

⁵ Cun ung phi nang cu lingkeng ciah nam lung om ci, Cun ah kya sei, Khanpughi ah m’lung she nak la düng ciah m’khoichaa nak a gawk law hnüüp ung, nang cu nuipai ciah shet m’kat nak na gah khai.

⁶ A cu hnüüp ung Khanpughi naw chang nüng nüng cu amät ah bi lawh a ciah, m’khoichaa nak pek khai.

⁷ Ak ni ah om ne, bämang nak, m’kümtou nak la sih nak kä om ciah ghin nak shui ciah chang gui am, Khanpughi naw angtäi ghin nak cu pek khai.

⁸ Amät ah bä nak vai bäng teng ne, ng’düng nak cu hnu na ne, shet nak lam ah läk ciah chang gui cu Khanpughi ah m’lung k’she nak hmuk khai gui.

⁹ Shetkat nak bik ci gui ah Jew chang gui ung tün ne, khui hei chang gui van ah khan ah yaica nak la nat nak cu om khai.

¹⁰ Cun ung phi ni kyom nak bik ciah Jew chang gui ung tün ne, khui hei chang gui van ah khan ah Khanpughi naw bämang nak, m’kümto nak la dimdeeih nak cu pe gui khai.

¹¹ Khanpughi naw chang nüng nüng cu, kä m’khoi hnga ne, m’khoi m’cha gui khai.

¹² Moses ah thukhän kä hmat ci gui ah chang khui hei gui cu, katnak ami bi ung thukhän ah k’pung ah dimaih ci gui kyak ci. Thukhän hmat ci gui ah Jew chang gui cu, katnak ami bi ung thukhän ah m’khoichaa nak cu gah ci gui.

¹³ Chang cu thukhän ng’yak nak düt awn Khanpughi ah ma ah ng’düng ciah kä kyak ci, thukhän ah pyein läk ciah chang cun vah, Khanpughi ah ma ah ng’düng ciah kyak ci.

¹⁴ Chang pakhui hei gui cu ngami ung thukhän kä a om ung phi, thukhän awn ng’läk khai ah ami om ih ah a kyak ung, ngami cu thukhän läk ci gui ah kyak ci.

¹⁵ Thukhän ah pyein gui cu ami m’lung kyong ung guk ah mäih ah ami om ih naw m’dang ci. Ami m’lung kyong ung phi cun cu ng’düng ci ciah m’dang ci. Ami m’lung ngaih naw ak hngü ät m’kat gui ne, ak hngü ät k’bää gui ci.

¹⁶ Cun ah kya sei, kei naw ka ng’shäu ah Thu Ni ah pyein ah m’khoichaa nak ah kho hnüüp ung Khanpughi naw, Bawipa Jesuh Khrit awn chang gui naw m’yih ne ami ngaih-tüh gui phung cu, m’khoi m’cha ne m’dang yawp khai nei.

Jew Chang Gui La Thukhän

¹⁷ Nang a i hawkcha ang? Nang cu na mät naw, kei cu Jew chang nei cine, thukhän ung khüng ne, Khanpughi awn na khähgah ci.

¹⁸ Nang cu Khanpughi ah ng’yak hlü na hmat ciah kyak ci. Thukhän ah m’theithang nak awn, ng’düng ci la kä cun phi na ghü thei ciah kyak ci:

¹⁹ Nang cu na mät naw na mät, amik m’dauh gui ah lam shüm, hmüp khui ah om ci gui ah ak dei:

²⁰ Chang k’she gui ah lam piang, a i kä hmat ci gui ah ng’thei nak ah ka kyak ci ciah akcang ah na ngai ci. Thukhän cu hmuhmat nak la ng’düng nak ah küm nak ah kyak ciah phi akcang ah na hmat ci.

²¹ Nang naw chang m’theithang lang ne, a i ah kya sei na mät naw na mät kä nam theithang ang! Nang cu chang kä a m’guuk vai ah m’theithang lang ne, a i ah kya sei na mät nam guuk ang!

²² Nang naw chang kä a plet beng vai ah m’theithang lang ne, a i ah kya sei na mät na plet beng ang! Nang cu a gup m’tüih lang ne, a i ah kya sei a gup ah om nak ah Taigüim cu na ng’guhtep tu ang!

²³ Nang cu Khanpughi ah Thukhän ung khähghah lang ne, a i ah kya sei cun ah thukhän cu m’chei m’shoh ne, Khanpughi ah thang nam shet ang!

²⁴ Cacim ung, “Jew chang gui ah om ah chang khui hei gui naw, Khanpughi ah ming cu päipih ci gui nei,” cine om ciah mäih ah kya lawk ci nei.

²⁵ Nang cu thukhän na läk ah a kyak ung, vun-ah nak na bi cu ak küikyang ah kyak ci, cun ung phi nang cu thukhän nam shet ciah a kyak läi ung, vun-ah nak kä na bi tu ling te ung ni pi khai sü ah kyak ci nei.

²⁶ A vaisü ah vun-ah nak kä bi tuk ciah khui hei chang tumat cu, thukhän ah pyein gui avan a läk tu ah a kyak ung, Khanpughi naw vun-ah nak bik ciah chang ah mäih ah dou khai ah kä kya ne ang!

²⁷ Nang mi Jew chang gui cu, gu ne tai ah thukhän la vun-ah nak cu gah tu pang u ne phi, thukhän cu nami m’shet ci nei. Chang khui hei gui cu pumsa awn vun-ah nak kä a mi bi ung phi, thukhän cu läk ci gui nei. Cun ah kya sei nangmi Jew chang gui cu, chang khui hei gui naw nami katnak ning m’khoichaa gui khai gui nei.

²⁸ Cun kawn ah Jew chang ah chang naw ang ngaih phung cu Jew chang ah kä kyak ci. Chang tumat cu vun-ah nak a bi nak düt awn Jew chang ah kä kya lawk ci nei.

²⁹ Jew chang akcang läi cu am lung kyong ah vun-ah nak bi pyi ciah chang ah kyak ci nei. Cun ah chang Jew chang ah kyak sak cicu gu ne tai ah thukhän ah kä kyak ci, Khanpughi ah Mumcha naw vah chang cu am lung kyong ung Jew chang ah kyak sak ci. Ani cu chang ah m’hlüngtai nak gah ciah kä kyak ci, Khanpughi ah m’hlüngtai nak gah ciah kyak ci.