ROMAN 16 - Cho Bible Common Language 2016

Paul ah Zavaih Nak Thu Gui

¹ Kei naw mi be Phoebe ah mawng cu küikyan ne ka pyein hlük ci. Ani cu Kenkhreae gawnu, khritha bum ung bi bik ci.

² Khanpughi ah chang gui ah mi kyak ci kya sei ani cu Bawipa ah ming awn nami dou vai nei. Nami m’hteihtang tu vai a hlü ah a kyak ung nami m’hteihtang tu vai nei. Ani cu chang akda m’hteihtang tuk ciah teihpüi k’ni ah kyak ci, kei phi nam hteihtang tuk ci.

³ Bawi Khrit Jesuh ah khuut bi nak kami bi ät ciah Pricilla la Aquila cu ka yavaih na goi ci nei.

⁴ Ngah ni cu kei ah hmawk ah ani hnun gui pe ne bi bik ci goi nei. Ngah ni cu kei bäng ah kä kyak ciah khui hei chang khritha bum avan naw yei na goi ci gui nei.

⁵ Ami mät ah im ah ng’bum ne pum ci gui ah khritha bum gui cun phi ka yavaih na gui ci nei. Asia kho ung Bawi Khrit yum law maa ciah ka teihpüi k’ni Epaenetus cun phi khaih na ne, ka yavaih nak ci nei.

⁶ Nang mi ah hmawk ah k’tha nah ne bi bik ciah Mari cun phi yavaih nak nei.

⁷ Andronikas la Juniasr cun phi ka yavaih na goi ci nei. Ngah ni cu kei awn a täng ah thawng kyum ci goi ah Jew chang goi ah kyak ci: ngah ni cu ang düihpüi gui ah ng’lung ah chang khli naw hmat goi sei, kei ah kä yum tu pha ung Khritha ah kya pyi ci goi ah kyak ci.

⁸ Bawipa ung kawng ät ne ka teihpüi k’ni ah kyak ciah Ampliatus phi ka yavaih nak ci nei.

⁹ Bawi Khrit ah khuut a täng ah mi bik ciah Urbanus la ka teihpüi Stachis phi ka yavaih na goi ci nei.

¹⁰ Bawi Khrit ung khäng ciah Apelles la Aristobulus ni kyong cun phi ka yavaih na gui ci nei.

¹¹ Jew chang ah kyak ciah Herodion la Narcissus ni kyong, Khritha phäi nau gui cun phi ka yavaih na gui ci nei.

¹² Bawipa ah khuut bik ci goi ah Tryphaena la Tryphosa la, Bawipa ah hmawk ah akda bik ciah ka teihpüi Persis gui cun phi ka yavaih na gui ci nei.

¹³ M’hlüngtai vai ah Bawipa ah khuut bik ciah Rufus la a hta ah mäih ah angtäi sei nam hteihtang ciah anu ah khan ah ang htei ah ka yavaih ci nei.

¹⁴ Asinchritus, Phlekon, Hermes, Patrobas, Hermas, la ngah mi awn om ci gui ah khritha phäi nau gui avan cu ka yavaih na gui ci nei.

¹⁵ Philolokus la Julia, Nereus la abe, Olympas la ngami awn om ci gui ah Khanpughi ah chang gui avan cu ka yavaih na gui ci nei.

¹⁶ Phäi la nau ah ng’ui ng’hnam ne, tumat la tumat ng’yavaih na tu vä. Bawi Khrit ah Khritha bum avan naw nang mi cu ning yavaih gui ci nei.

Ah Hnu Bäih ah Am Theimkan Nak

¹⁷ Phäi nau gui aw, nang mi naw nami gah ah m’theithang nak gui cu hnu ng’tuk püi ne, chang gui ah m’lung ngaih ng’pai sak ne, chang gui ah yum nak lam hma sak ciah chang gui cu, nami geing nak gui vai nei, ngami cu nami hlawi gui vai nei!

¹⁸ Cun gui cu mi Bawipa Jesuh Khrit ah khuut bik ci gui ah kä kyak ci, a i ei ei ung bä khai ciah ngaih-tüh ne bik ci gui ah kyak ci. Ngami naw tuihlim ciah ng’thu la m’hlüngtai ah k’chiu awn ng’düng ciah chang gui cu m’hleeihlak ci gui nei.

¹⁹ Nang mi naw Thu Ni cu a i hlawk ah nami m’lung ung nami khän htek sak cu chang avan naw hmat ci nei. Cun ah kya sei nang mi ah hmawk ah ang htei ah ka yei ci. Nang mi cu ni kyom nak hmat ne lunglang ciah chang ah kya u ne, shetkat nak phiawn nak ciah nami kyak vai ah ka ng’ya hlük ci.

²⁰ Mi dinggei nak ah ng’yung ah kyak ciah Khanpughi naw Satan cu ang ghit ah m’hnoi ne nami khophaa k’ka ah gawk sak khai nei. Mi Bawipa Jesuh ah m’geinsei nak cu nang mi ah khan ah om sä. (Am shah naw shin ah ca kyawng cu nawng shüt ci.)

²¹ Kei awn a täng ah kani bik ciah Timothi la kei ah mäih ah Jew chang ah kyak ciah Lucius, Jason la Sosipater gui naw phi Khritha yavaih na gui ci gui nei.

²² Kei, Tertius, naw shin ah ca cu läk ne ka guk nei, kei naw phi Khritha yaviah nak cu ka ning m’khäh law gui ci nei.

²³ Kei na khinchah nak ci, khritha gui naw ami pum nak im nak ciah Kaius naw phi ning yavaih na gui ci nei. Gawmang ah nguimküm, Erastus la mi phäi nau Kuartus naw phi ning yavaih na gui ci goi nei.

²⁴ (Mi Bawipa Jesuh Khrit ah m’geinsei nak cu nami van ah khan ah om sä. Amen.)

M’hlüngtai Ne Taigü Nak awn A Khüm Nak

²⁵ Khanpughi ah bämang nak cu mi m’hlüngtai khai nei! Ani naw nang mi ah yum nak cu ning khänhtek sak gui ci nei. Kei naw Bawi Jesuh Khrit ah mawng Thu Ni ka ng’shäu nak ung shin ah ka pyein ci, cau puipui tüi ne ng’thup ne om ciah ng’yih ciah ng’düng nak naw phi acun na m’dang ci.

²⁶ Cun ung phi tuhbäi chü, cun ah ng’yih ciah ng’düng nak cu profet gui ah guk ah cacim ung dang yawp pyi ci nei. Ang täi ah ghing ciah Khanpughi ah thukhän awn, kho avan ung chang avan naw hmat ne, yum ne, ami läk vai ah cun ah ng’düng nak cu ng’shäu ne pyein pyi nei.

²⁷ Tumat bäng nak ciah Khanpughi nah ne, a päng avan lunglang hmuhmat ciah Khanpughi cu, Bawipa Jesuh Khrit awn angtäi sei bämang ne om sä! Amen.