ROMAN 12 - Cho Bible Common Language 2016

Khanpughi ah Khuut Bi Nak ung Ghin Nak

¹ Cun ah kya sei phäi nau gui aw, Khanpughi naw a nam gein nak gui cu däm aih ci kya sei, kei naw ka ning m’cäi gui hlü cu: Ak ghing ah m’küi m’khän nak ah Khanpughi ung ng’ap u ne, a khuut bi nak ung ngün kyük ne nami yei vai nei. Cun cu nang mi naw nami ng’ap nak cu akcang ah khawihnah nak ah kyak ci nei.

² Khomdek khan ung yodäm nak ung kä nami ng’kü ng’neet tu vai, Khanpughi ung nami m’lung kyong avan ng’thawng sak u ne, m’lung ngaih ak thai awn nami om vai. Cun ung vah ni kyom nak, amät ung yeikyai nak la kümbe nak gui ah Khanpughi ah ang yak hlü cu nami hmat khai.

³ Khanpughi ah na peit ah bä mang nak awn, ak chang sing ka ning m’cäi gui hlü cu; na mi mät ung ng’müi ciah tha ah hlüng pi khai ah m’lung kä nami m’däm vai. Khanpughi naw a ning peit gui ah yum nak ah ayun ak bawng ah ciah, nami mät awn khinkhaa khai ah, nami mät naw nami mät nami m’khoichaa vai nei.

⁴ Pumsa tumat ung ang phyeek akda om ci, cun ah ang phyeek gui päng ung ami bi vai om phäh phäh ci.

⁵ Acun ah mäih ah mikmi cu mi da ung phi, Bawi Khrit ung mi kawng ät nak awn pumsa tumat ah mi kyak ci, Mikmi cu ng’phyeek ng’pai ciah pumsa tumat ah mäih ah mi ng’khih ng’kaih yawp ci.

⁶ Cun ah kya sei Khanpughi naw m’geinsei nak a na peit gui ah ci ah, mi mät phäh phäh naw mi gah ah m’gein nak cu mi mang khai. Mikmi ah gah ah m’gein nak cu Khanpughi ah ng’thu pyein nak hning ah a kyak ung, mikmi naw mi yum nak ah ciah, cun ah m’gein nak awn mi bik khai ah kyak ci.

⁷ Mikmi ah gah m’gein nak cu, chang gui m’theithang nak gui vai a kyak ung mi m’theithang gui khai.

⁸ Chang gui k’thamah nak peit nak gui vai a kyak ung, mi pe gui khai. Chang am pektaak ciah chang naw, ng’khai ng’lang nak awn a pektaak vai, huham om sei ng’vai pi ci naw k’tha nakcang ne abilawh vai; geinvai ciah chang m’gein tuk ci naw m’lung gei yeikyai nak awn am hteihtang tu vai.

⁹ M’hni nak cu akcang ah yumhni nak ah a kyak vai nei. Shetkat nak cu thüi na u ne, ni kyom nak cu k’pang khüp vä.

¹⁰ Nang mi cu tumat la tumat khritha phäi nau ah mäih ah nami ng’khawtsheng vai, tumat la tumat chang m’sui nak tu cu ang ghit ah nami bi vai.

¹¹ Kä damduh ne k’tha na ne bi nami bi vai. Nami m’lung kyong avan ap ne Khanpughi ah khuut nami bi vai.

¹² Nami ngaih u om ci kya sei nami yeikyai vai, yaica geinvai nak nami aut law ung hnimgein nak om sä, angtäi sei nami k’taigü vai nei.

¹³ Pyam thaam ciah khritha phäi nau gui am nami khawhchaam nami tei pai tu gui vai, lam hteit ciah chang gui am nami im kawt nami k’hmawn peit gui vai.

¹⁴ Nang mi ning k’shedam na gui ciah chang ah hmawk ah Khanpughi naw hrilham a peit vai ah nami ng’yoih peit vai, cun ah chang gui cu kä yüigen u ne, hrilham nami peit vai.

¹⁵ Zeikiai ci gui nami yeikyai püi gui vai, thüikyap ci gui nami thüikyah püi gui vai.

¹⁶ Tumat la tumat nami ng’hteinghtang tu vai, kä nami m’ghäm’ce vai, yawken ciah bi phi nami bi vai, nami mät naw nami mät, nami hmuhmat aih ciah kä nami ngaih vai.

¹⁷ Nami khan ah akshe bi lawk ciah a om ung akshe awn kä nami thung ba vai, chang gui ah maa ah ni kyom nak nami bi vai ah nami k’tha nak vai.

¹⁸ Chang nüng nüng awn ng’gei gaan ne nami om vai nei,

¹⁹ Teihpüi gui aw, phu kä nami tuk nüng nüng vai, Khanpughi amät naw katnak cu m’htei khai nei. Cacim theing ung, “Kei naw phu ka tuk khai, katnak ah ciah kei naw ka thung khai,” ci ne Bawipa naw pyein ci.

²⁰ Cun ah kya sei, phu nami tuk nak vaisü ung nami bilawh vai ah cacim theing naw a pyein cu, “Nami gaa cu ei a cawi ung ei nami m’bei tu vai, tui a gha ung tui nami tuu tu vai, cun ah na bi nak awn nang naw na gaa cu na ng’aa sak khai nei,” ciah kyak ci.

²¹ Shetkat nak awn kä na ng’yom men vai, akni awn akshe cu na näng vai nei.