ROMAN 11 - Cho Bible Common Language 2016

Israel Chang Gui ah Khan ah Khanpughi ah Chimgein Nak

¹ Cun ah kya sei kei naw ka ning shi gui hlük ci: Khanpughi naw amät ah chang gui cu hnu ng’tuk püi gui ne maa! Kä hnu ng’tuk püi gui ci. Kei ka mät cu Israel chang, Abraham ah hta ng’shon, Benjamin pakhui ah ka kyak ci.

² Khanpughi naw ak htük ge ung a ghü ah ak chang gui cu kä hnu ng’tuk püi ci. Cacim theing ung Elijah naw, Israel chang gui cu hnu ng’tuk püi gui ne, Khanpughi ah maa ah ng’thu a pyein cu nami hmat khai nei.

³ Cun ah ng’thu ung Elijah naw, “Khanpughi aw, cän ah chang gui naw, na purofet gui cu ngawn ci gui nei; Na mangkiang phi plawh ci gui nei; Kei ka mät bäng ka om ba ci, kei cun phi na ngawn khai gui ah k’tha nak ci gui nei,” ciah pyein ci.

⁴ Cun ung phi Khanpughi naw Elijah ah ma ah thu a pyein ba cu, “Kei naw Baal khoshe ah gup kä khawihnah ciah, chang tämkäp chih cu, ka mät ah hmawk ah ka k’pawih na pyi ci nei,” ciah kyak ci.

⁵ Tuk bäi phi acun ah mäih ah Khanpughi naw am gein nak awn a ghü ah chang api k’pawih ba ci nei.

⁶ Khanpughi ah ghü nak cu amät ah m’gein nak awn ah kyak ci, cun ah chang gui ah bilawh nak awn ah kä kyak ci. Khanpughi ah ghü nak cu chang ah bilawh om ih nak awn ah a kyak vaisü ung, ani ah m’gein nak cu m’gein nak akcang ah kä kyak khai süte.

⁷ Cun ah kya sei a i ah pyein vai ang! Israel chang gui naw ami shui cu kä hmuk hlawt ci gui nei. Cun ah ami shui cu Khanpughi ah ghü, chang apihta bäng naw hmu hlawt ci gui nei; k’pawih ba ciah chang gui naw Khanpughi ah ng’khü k’aw cu kä ng’yak ci gui nei.

⁸ Cacim theing ung, “Khanpughi naw cun ah chang gui ah m’lung k’hnga cu aung ang sak gui ci, tuhngawi güt ung ngami cu a i kä hmu ng’ya thei ci gui.

⁹ Cun ah kya sei David naw; “A mi mang ei cu ngah mi ah hmawk ah, ami ng’awh gui la ami ng’cawh nak ah kya sei, Khanpughi naw m’shekat gui sä!

¹⁰ Teng ne kä ami hmuh nak thei vai ah ami mik mü sä; Ami yaica nak ah phuih gih awn, amik khei phi angtäi sei ng’khun sä,” cine pyein ci.

¹¹ Cun ah kya sei Jew chang gui cu, ami dimaih nak ung khüt khai ah plawh kheih gui ne maa! ciah ka ning ng’shi gui hlük ci. Cun ah kä plawh kheih gui ci. Ngami cu ami shetkat ah hmawk ah hun nak cu chang khui hei gui naw gah ci gui, cun ah kya sei Jew chang gui naw chang khui hei gui cu m’thüi nak ci gui.

¹² Jew chang gui ah shetkat nak naw, m’dek ah khanchang van am, bühmang ciah hrilham cu gah sak ci, Ngami ah mümcha ghawipai nak naw, chang khui hei gui am bühmang ciah hrilham cu gah sak gui ci. Cun ah kya sei Jew chang gui ami van Bawi Khrit ung ami ng’khäm law hnüüp ung, ngah mi naw hlüngtai pi ciah hrilham cu gah khai gui nei.

Chang Khui Hei Gui Naw Hun Nak Ami Gah ah Mawng

¹³ Kei naw nang chang khui hei gui ah maa ah ng’thu ka pyein ci nei. Kei cu chang khui hei gui ah hmawk ah ang düih püi ah ka kyak ci kya sei, ka mät ah bi nak awn ka khähghah ci nei.

¹⁴ Kei naw ka mät ah pakhui chang gui ung m’thüi nak ah m’lung om khai ah ka bi nak awn, ngami ungka chang amshah naw bawtah hun nak gah tuk khai gui nei.

¹⁵ Khanpughi naw ngami cu a nawng gui yah ung, hnicim chang gui cu, a gaa ah ami kyak nak ungka naw a teihpüi ah ng’thon sak gui yawp ci. Cun ah kya sei Jew chang gui cu Khanpughi naw a dou ba gui yah ung a i ah mäih ah kyak khai ang! Ak si gui ghin sak gui ah mäih ah cäicat vai ah kyak khai nei.

¹⁶ M’htut pum ät cu k’bou ne Khanpughi am ap ah a kyak ung m’htut pum avan cu ap ah kyak ci, Singghing tumat ah ang yung cu Khanpughi am ap ah a kyak ung ang ban avan phi ap ah kyak ci.

¹⁷ Chang gui naw olive sing k’tui ah ng’ban cu m’chün u netah, pyupying k’thui ah ng’ban awn m’dün ne ng’ling ci gui. Pyupying k’thui naw, pyupying k’tui ah ang’yung la a ghing ung kaa, a ei auk tu ah mäih ah, nang mi khui hei chang gui naw cu Jew chang gui ungka mümcha ghin nak cu nami gah tuk ci.

¹⁸ Cun ah kya sei nang mi naw chuk pit ah mäih ah kyak ciah ang ban gui cu kä nami päipih vai. Nang mi nami khähghah nak vai a i kä om ci, Nang mi cu ang ban ah nami kyak ci, nang mi naw ang yung a pyaa cu kä nami tu m’bei ci, ang yung a pyaa naw vah nang mi cu ning tu m’bei gui ci.

¹⁹ Cun ung phi nang mi naw, “Kei mi naw hmun kami gah vai ah hmawk ah pyupying ah ng’ban gui cu tu pit yawp ciah kä kya ne ang!” nami cik khai.

²⁰ Nang mi ah pyein cu ng’düng ci. Ngah mi chuk pit nak gui cu Khanpughi kä ami yum ah hmawk ah kyak ci. Nang mi cu Khanpughi na mi yum ah hmawk ah ang ban ah nami kya lawk ci. Cun ung phi nang mi chang ah kä nami ng’shei vai, chang kyih aa ne nami om vai.

²¹ Khanpughi naw ami nupuk ah ang ban gui ah kyak ciah Jew chang gui hngaw kä am düm gui ung, nang mi läi kä ning m’düm gui khai nei.

²² Shin ung Khanpughi cu a i hlawk ah chang m’gein ci la, a i hlawk ah nget ngawng ciah mi hmuk ci. Khanpughi naw katnak bik ciah chang gui cu ak nuipai ah m’khom chaa gui ci. Cun ung phi nang mi cu a ning m’gein gui khin vai ah nami om ah a kyak ung, Khanpughi naw ning m’gein gui khenggeng ci; cun ah kä nami om ah a kyak ung nang mi cun phi chu pit ne ning ghawt gui khai.

²³ Jew chang gui cu ami m’lung thawng sei Khanpughi ami yum ah a kyak ung, ak hmui cu m’dün ba ne geit kaw nak cu om khai, Khanpughi naw cun ah bi hning ci.

²⁴ Chang pakhui hei ah kyak ciah nang mi ah nami ng’tüipüi ah kyak ciah pyupying k’thui cu chu pit ne, nami ng’tüipüi ah kä kyak ciah pyupying k’tui ung m’dün ne geit hning ah a kyak ung; pyüpying k’tui ah ang tüipüi ah ang ban ah kyak ciah Jew chang gui cu, ang tüipüi ah pyupying ung a yäihta ah m’dün ne geit ba khai ah kä kya ne ang!

Chang Nüng ah Khan ah Khanpughi ah M’gein Nak

²⁵ Phäi nau gui aw, nami mät naw nami mät kami hmuhmat tei pyi ci, ciah kä nami ngaih en vai ah thuuk ne ng’kau ciah a mawng cu ka ning m’thein gui hlük ci. Cun cu, Jew chang gui cu angtäi sei ang laam khai gui ah kä kyak ci, Khanpughi ah lawk khai ah khui hei chang gui ami ng’küm ung khüt khai ah kyak ci.

²⁶ Cun kawn ah Israel chang avan cu hun nak gah khai gui nei, cun ah mawng cu cacim theing ung: “Hun Bawipa cu Zion khomhtung ah kaa kyum law ne, Jakob ah hta ng’shon gui ah shetkat nak avan cu nawt heng yawp khai nei.

²⁷ Kei naw ngami ah shetkat nak cu ka k’phiuawn gui hnüüpung ngami awn shin ah thukhän cu ka bik khai nei,” ciah om ci.

²⁸ Jew chang gui cu Thu Ni hnu ng’tuk püi u ne, Khanpughi ah gaa ah kya lawk ci gui. Cun cu nang mi khui hei chang gui ah yei nak vai ah hmawk ah kyak ci. Cun ung phi ngami cu Khanpughi naw a ghü gui te ah kya ne, ami pupa gui ung thukhän a peit nak gui awn ngami cu m’hni gui lä ci.

²⁹ Khanpughi naw a u chang phi ghü ne hrilham a peit kawn ah, Khanpughi naw am lung kä m’thawng ba ci.

³⁰ Nang mi khui hei chang gui cu a yan ä, Khanpughi kä nami läk man ci; cun ung phi nang mi naw tuk bäi m’gein nak nami gah cu, Jew chang gui naw Khanpughi kä ami läk ah hmawk ah kyak ci.

³¹ Cun ah nang mi naw m’gein nak nami gah ah mäih ah, Jew chang gui cun phi, Khanpughi ah m’gein nak ami gah vai ah Khanpughi cu kä läk ne om ci gui.

³² Khanpughi naw hnicim chang avan cu, thu kä läk ciah thawng k’cum ah pyang gui yawp ci. Cun ah abi cu chang ah hta avan am am gein nak am dang nak hlü ah kyak ci.

Khanpughi M’hlüngtai Nak

³³ Khanpughi ah bämang nak cu hlüngtai aih ci nei! Khanpughi ah lu ng’lang nak la hmuhmat nak cu thuuk aih ci nei! Khanpughi naw m’hnüt ne ak bäi cu a u naw a cangkha a m’dang hning khai ang! Khanpughi ah bilawh mawnglam cu a u naw shüm hmat hlawt khai ang!

³⁴ Cacim theing ung; “Bawipa ah m’lung ngaih cu a u naw hmat ci ang! Bawipa cu a u naw m’shüm hmuh tu hning ci ang!

³⁵ Bawipa naw a thung sah ba vai ah a u naw ani-am k’pu m’hnih khai ang! ciah om ciah mäih ah kyak ci.

³⁶ Ang tüi avan cu Bawipa ah tüi sho ah kyak ci. Ang tüi avan cu ani awn ghing ne, ani ah hmawk ah om ci gui. Khanpughi ah bämang nak cu angtäi sei cüi vai sä! Amen.