ROMAN 10 - Cho Bible Common Language 2016

¹ Phäi nau gui aw, kei naw ka chang gui hun nak ami gah vai cu ka m’lung kyong avan awn ng’ya hlü aih netah, ngami ah hmawk ah Khanpughi ah ka taigü ci nei.

² Ngah mi naw Khanpughi ami kyih aa ah mawng cu kei naw akcang hmat ne ka pyein ci nei. Cun ung phi ngami ah kyih aa nak ah lam cu kä ng’düng ci nei.

³ Ngami naw, Khanpughi naw chang gui ang düng sak nak gui ah lam cu kä hmu u netah, cun ah lam ung kä hteh ah, ami mät naw k’tha na ne ami pyan ah lam ung hteit ci gui.

⁴ Bawi Khrit naw thukhän ah a khin cu ang pyi sak pyi ah kya sei, yum ciah chang nüng am Khanpughi ung ng’düng nak cu pe pyi ci nei.

Hun Nak Cu Chang Van ah Hmawk ah Kyak Ci

⁵ Moses naw thukhän läk nak awn, Khanpughi ung düng nak ah mawng a guk cu; “Thukhän ung thu küi läk ciah chang phung cu ghing khai,” ciah kyak ci.

⁶ Cun ung phi cacim theing naw, yum nak awn Khanpughi ung düng nak ah mawng a pyein cu, “A u-ang khankho ah a hang kai kaw! (Cun cu Bawi Khrit hang khü vai ah kyak ci).

⁷ “A u ang kaa khaw ah a yu kyum kaw! (Cun cu Bawi Khrit sih nak ung a thawh ba vai ah phawng vai ah kyak ci), cine nami mät naw nami mät kä nami ng’shi en vai.

⁸ Cacim theing ah pyein hlü cu: Khanpughi ah ng’thu cu nami pei ah om ci; Cun ah thu cu nami m’gawng awn pyein ne, nami m’lung ung nami m’küm ci,” ciah kyak ci. Cun ah thu cu kei naw ka ning m’thein gui ah Khanpughi yum nak ah mawng ah kyak ci.

⁹ Bawi Jesuh cu Bawipa nei, cine ng’kyaa ne, Ani cu Khanpughi naw sih nak ungka thawh ba sak ci nei, cine nami m’lung ung nami yum ah a kyak ung, nang mi cu hun nak nami gah khai.

¹⁰ Mi yum ak awn Khanpughi ung ng’düng nak mi gah ne, mi ng’kyaa nak awn hun nak mi gah ci.

¹¹ Cacim theing ung, “A u chang phi Bawipa yum ciah chang cu thüisei nak kä om khai,” ciah om ci.

¹² Khanpughi cu hnicim chang van ah Bawipa ah kya ne, ani khü ne ng’yoi ciah chang phung am bämang ciah hrilham yuk m’kyum lawk ci. Cun ah kya sei, Jew chang, khui hei chang ciah m’khoichaa nak kä om ci.

¹³ Cacim theing naw “Bawipa khü ne ng’yoi ciah chang phung cu hun nak gah khai,” cine pyein ci.

¹⁴ Cun ung phi ngami naw kä ami yum ung a i chaa khü ne ng’yoi khai gui ang! Thu pyein kä a mi ng’yak ung, a i chaa yum khai gui ang! Thu ng’shäu ne pyein ci kä a om ung, a i chaa ng’yak khai gui ang!

¹⁵ Thu ng’shäu khai a u naw kä a tüih ung, a u naw thu ng’shäu ne pyein khai ang! Cacim theing naw, “Thu Ni yon lawk ciah thukpüi gui ah law nak cu ng’khän häih häih ci nei”,

¹⁶ Cun ung phi Thu Ni cu chang van naw kä dou ci gui. Isaiah amät naw, “Bawipa, Keimi ah thu pyein cu a u naw yum ci ang!” cine pyein ci.

¹⁷ Cun ah kya sei thu ng’yak nak awn yum nak cu lawk ci, Bawi Khrit ah mawng ng’shäu ne pyein nak ung, thu cu chang naw ng’yak ci.

¹⁸ Cun ung phi chang gui naw cun ah thu cu kä ng’ya u ne ang! Ka ning ng’shi gui hlük ci: Ngahmi naw akcang ah ng’yak ci gui. Cacim theing ung; “Thu Ni ng’shäu ci gui ah k’aw cu khomdek khan avan ung Thang ne gawk ci; Ngah mi ah Thu m’kha cu kho cawi kheng ah khüt ne gawk pyi ci nei” ciah om ci nei.

¹⁹ Cun kawn ah ka ning shi ba gui hlü cu, “Israel chang gui naw cun ah a mawng cu kä hmuhmat man u ne maa! Khanpughi naw Moses ung ak htük bäih ah am hlan nak cu; Kei naw ka khü ah changpakhui gui cu mang ne Ka chang gui cu kam thüi sak gui khai; Chang pakhui k’she gui awn Ka chang gui cu kam lung k’she sak gui khai,” ciah kyak ci.

²⁰ Khanpughi naw Isaiah am cun ah tai pi khai ah a thu pyein cu; Kei kä na shui ciah chang gui naw Kei cu na hmuk ci gui; Kei ah mawng kä k’tä, kä shui ciah chang gui naw Kei cu na khawihnah ci gui,” ciah kyak ci.

²¹ Cun ung phi Israel chang gui ah mawng ung, “Kei na hnu ng’tuk püi ne, kei ah ng’thu kä läk ciah chang gui cu, kei naw amü ak hnüüp ka kut shäng ne ka na dou gui ci nei”, ciah Khanpughi ah ng’thu om ci, cine Isaiah naw pyein ci.