Biblia Todo Logo
Bib sou entènèt

- Piblisite -

ROMAN 1 - Cho Bible Common Language 2016

1 Khanpughi naw Thu Ni ng’shäu khai ah ghü ne am’düih, Jesuh Khrit ah chang shäm, kei Paul naw ca ka gu lawk ci.

2 Cau pui ge ung Khanpughi naw, Thu Ni cu a purofet gui ung pek khai ah a shaitaak cu Cacim Theing ung om ci.

3 Cun cu Khanpughi ah Htapa, mi Bawipa Jesuh Khrit ah mawng ah kya ci; Ani cu ak hnicim chang nak ah David ah ng’shon ung ng’tüi lawk ci;

4 Ak khanchang theing nak ah, Khanpughi ah Htapa ah a kyak cu ang dang vai ah Khanpughi naw abämang hlüngtai nak awn sih nak ung kaa thawh ba sak ci.

5 Khanpughi naw ani ung ang düihpüi ah kyak nak vai ah akhin k’ni cu na pe ne, kho avan ung, chang avan naw Khanpughi cu yum ne ami läk vai ah kei cu m’düih ne na tüi ci.

6 Rom gawnu ung nami om ciah nang mi cun phi Jesuh Khrit ah chang gui ah Khanpughi naw a ning khü gui pyi ah ka sei, cun ah chang gui ah k’um ah nami kya pyi ci.

7 Cun ah kyasei Khanpughi naw ning m’hni gui ne a ning khü gui pyi ah Rom Khrithabum am shin ah ca cu ka ning guk law gui nei. Mi Pa Khanpughi la Bawipa Jesuh Khrit naw m’geinsei nak la dimdeeih nak cu ning pe gui sä.


Yeikyai M’hlüngtai ne Taigü Nak

8 Khomdek khan avan ung nang mi ah yum nak ng’ya pyi ci gui ah kia sei, ak htük bäih ah Zesuh Khrit ah ming ung Khanpughi cu kam hlüngtai ci.

9 Ahtapa ah mawng Thu Ni ng’shäu ne pyein ne, kam lung kyong avan ap ne, Khanpughi ah khuut cu ka bik ci.

10 Kei naw ka taigü khin päng ung ka ning shüm gui cu Khanpughi naw hmat ci. Khanpughi naw ang yak hlü a om ung kä shou pha sei nang mi ah om nak ah ka gawk law vai ah ka taigü ci nei.

11 Nami k’thamah nak vai ah mümcha hrilham cu ning pai tu gui hlü ne, ang htei ah ka ning hmu gui hlü khäät ci.

12 Cun ah ka pyein cu nangmi la kei, a täng ah mi ng’hmuh law ung, kei naw ka yum nak awn, nang mi naw nami yum nak awn, mi ng’hteihtang tu vai hmawk ah kyak ci.

13 Nami shüm ba vai nei, phäinau gui aw, nangmi ah om nak ah ka lawk khai ah akda vei ka pawng ci nei, cun ung phi apipi cüngvawn nak om ci, changpakhui hei gui ah lung ah ka bi nak ung ami ng’hlah law nak a om ah mäih ah nang mi ung phi a om vai ah ka ng’ya hlük ci nei.

14 Ng’awigi ci la ghaatghum ci, hmuhmat ci la kä hmuhmat ci, chang avan ah hmawk ah kei naw ka mawng nak ci kiasei;

15 Rom gawnu ung nami om ciah nangmi am phi Thu Ni cu ng’shäu ne ka ning m’thein gui hlü aih ci nei.


Thu Ni ah Hlüngtai Nak

16 Kei cu Thu Ni ung kam lung üp ngaih gep ci; cun ah Thu Ni cu yum ci gui ah, Jew chang gui la changpakhui hei gui cu, a hun nak ah Khanpughi ah hlüngtai nak ah kya ci.

17 Khanpughi naw chang gui, a i chaa ang düng sak gui ah mawng cu, Thu Ni naw m’dang ci: cun cu tün nak ungka naw khüt nak ung phleh khai ah yum nak bäng awn ah kya ci. Cun na kyasei, cacim ung, “Zum nak awn Khanpughi ung düng ciah chang cu ghing ne om khai,” ciah om ci.


Hnicim Chang ah Cheishoh Nak

18 Düng nak cu chang gui naw kä ami hmat vai ah cheishoh, shetkat nak gui ah khan ah, khankho ah khanpughi ah m’lung k’she nak a gawk ah mawng cu dang law pyi ci nei.

19 Khanpughi ah mawng hmat vai gui phung cu, Khanpughi amät naw a hmat sak gui nak awn Khanpughi naw ngami cu m’kat gui ci.

20 Khanpughi naw shin ah khomdek khan a tüi pyan ung tün ne ani ah ng’täi ciah kä hmuh hningah hlüngtai nak la Khanpughi ah a kiak nak ah ang yung cu chang gui naw ang dang ah hmuk hmat ci gui. Cun ah ami hmuhmat cu Khanpughi ah tüi pyan gui ami hmuhmat nak awn ah kya ci. Cun ah kyasei chang gui cu ami katnak ah hmawk ah kä küi hlawt ci gui.

21 Ngami cu Khanpughi hmat ci gui, cun ung phi Khanpughi ah bäkhäk nak m’hlüngtai khin ah kä m’hlüngtai ci gui. Ami m’hlüngtai nak vai sü ung a kholä ah kyak khai gui düt ngaih tüh ci gui, ngami ah ghawng ciah m’lung kyong cu hmüp nak naw küp yawp ci.

22 Ngami naw ami mät cu hmuhmat ci gui ah ami pyein ung phi, akcang ah a i kä hmuhmat ci gui ah kyak ci:

23 Kä si hning ciah Khanpughi khawihmah nak vai sü ung, si hning ciah chang, ni, k’phyu kha, khisa ni, k’phyu m’khaw ni gui ah müi gup gui düt pyang ne khawihnah ci gui.

24 Cun ah a mawng ung Khanpughi naw cun ah chang gui cu, ami m’lung kyong ah ng’yak hlü ah ami kyak nak vai la, tumat la tumat thui hmai nak ami bi nak vai ah nawng gui ci.

25 Ngami naw Khanpughi ah ng’düng nak cu ak she awn m’thawng ci gui, ngami naw tüi sho ciah Khanpughi cu nawng en u ne, a tüi sho gui düt cu khawihnah ci gui. Cun ah Bawimang cu angtäi sei hlüngtai sä! Amen.

26 Cun ah kya sei Khanpughi naw chang gui cu shekat pi ciah thuihmai nak ung ami hteh vai ah nawng gui ci. Hnumi gui cu pami la hnumi ah ng’yaw ng’koh man ah kä kya u ne, ami mät ng’yaw ng’koh ci gui.

27 Pami gui cun phi hnumi awn ng’yaw ng’koh man ah kä kya u ne, ami htuktui naw ui gui sei, ami mät ng’yaw koh ci gui. Pami gui cu tumat la tumat thuihmai nak vai bi ne ami shekat ah hmawk ah hma m’kat nak cu gah ci gui.

28 Cun ah chang gui cu Khanpughi kä shüm hmat u khätah, Khanpughi naw shekat nak ung nawng gui sei, kä a khin kä ak khaa ah kya lawk ci gui.

29 Ngami cu shekat nak a hlü hlü bi u ne, ngetngawng nak, shemshai nak, ng’yak hlü aih nak, om k’she nak, m’thüikhang nak, chang ngawn nak, ng’tuk nak, hleeihlak nak, ng’u hngeit nak, gui cu m’chei m’shoh ci gui. Ngami cu khleei u ne;

30 chang ah mawng cu ak she ah pyein sak ci gui. Ami mät ng’shedam na tu u ne, chang ah ng’shei ne, khähgah ci gui. Shekha law pi k’täi khai ah ngaih-tüh u ne, ami nupa ah thu phi kä ngai ci gui.

31 A mi om she yawp sei, ami shaitaak ah phi kä om ci gui, ami paw chang phi kä chimgein ci gui.

32 Cun ah om ciah chang gui cu sih nak ung hteit khai gui ciah Khanpughi ah thukhän cu ngami naw hmat ci gui. Cun ung phi, ami mät naw shin ah shekhaa gui ami bi bäng ah kä kyak ciah, acun ah mäih bik ci gui cun phi k’cang nak ci gui.

Cho Bible Common Language © Bible Society of Myanmar, 2016.

Bible Society of Myanmar
Swiv nou:



Piblisite