Biblia Todo Logo
Bib sou entènèt

- Piblisite -

PHYAWN NAK 8 - Cho Bible Common Language 2016


K’u gui

1 Cun kawn ah Bawipa naw Moses am, “Ghangpughang ah hteit ne Bawipa ah ng’thu na m’thein vai, ‘Ka chang gui hteh sak gui ä, cun ung na khawihnah khai gui nei.

2 Cun cu na maa ah a kyak ung na khaw cu k’u bäng awn be sak ne, ka ning m’kyuuk khai nei.

3 Nile tuinu ung k’u gui bäng ah be khai, ngami cu tui nawng en u ne, na mang im kyong ah lut lawk khai gui, na ih nak a khan, na ih phak ni, na bawi gui la na chang gui ah im gui ni, na eishon im kyong ni, na um k’am avan ung lut khai gui nei.

4 Cun gui cu nang ah khan ah, na chang gui ah khan la na bawi gui ah khan ah ng’pet ne yong khai gui nei’ cik ci” na ci vai.

5 Bawipa naw Moses am, “Aaron na pyen nak vai, ang shopawng kawt ne, tuinu gui, tui m’hlon gui, tui shawk gui ah khan ah k’shäng ne Egypt khaw avan küm khai ah k’u gui a kai sak vai” ci nak ci.

6 Cun ah kyasei Aaron naw tui avan ah khan ah ang shopawng shäng khäta, k’u gui cu lut law u ne, khaw avan küm ci gui.

7 Cun ung phi k’cee gui naw ami cee nak m’dang u ne, khaw avan cu k’u awn be sak ci gui.

8 Ghangpughang naw Moses la Aaron cu khü goi neta, “Shin ah k’u gui k’täm gui vai ah Bawipa ah taigü ni ä, cun ung nami chang gui ka hteh sak gui khai, cun ung ngami naw ami Bawipa cu khawihnah pe tak hlawt khai gui nei” cik ci.

9 Moses naw, “Nang ah phäh ah ka ning taigü pek ah phäh ah ka yei khai. Nang la na bawi gui, na chang gui ah hmawk ah taigü nak vai ah khin cu na k’bäi vai nei. Cun ung nang naw k’u gui cu phai gui ci sei, Nile tuinu bäng ung om khai gui nei.

10 Ghangpughang naw, “Kei ah hmawk ah ngawi ung taigü ä” cik ci. Moses naw, “Na k’thäh ah mäih ah kei naw ka bik khai, Bawipa, kami Khanpughi ah mäih a hei khanpughi kä om ci, cicu nang naw na hmat khai.

11 Nang la na bawi gui, na chang gui naw k’u gui cu nami phai gui khai, Nile tuinu ah kawn ah a hawi phi kä om ba khai gui nei” cik ci.

12 Moses la Aaron cu hteit ba ni neta, Moses naw Bawipa ah ma ah, ghangpughang ah khan ah a chah ah k’u gui cu a lak ba vai ah taigü ci.

13 Bawipa naw Moses ah pyen ah mäih ah bi khäta, im kyong gui, mangkiang ung la lai ma ah k’u gui cu si yawp ci gui.

14 Egypt chang gui naw k’u si gui cu k’bum u sei khaw avan ung thu ne ng’üng ci.

15 K’u gui ami sih cu ghangpughang naw hmu neta, ani cu ling ba mä ci. Bawipa ah pyen ah mäih ah Moses la Aaron cu ghangpughang naw kä ngai goi ci.


Khogang gui

16 Bawipa naw Moses am, “Aaron naw ang shopawng awn m’dek a thah vai ah na pyen nak vai, Egypt khaw avan ung m’vut khui cu khogang ah kya yawp khai” cik ci.

17 Aaron naw khomdek cu ang shopawng awn that khäta, Egypt khaw avan ung m’vut cu khogang ah kya yawp ne, chang gui la khisa avan cu küm yawp ci.

18 Cee gui naw phi ami cee nak awn khogang gui acun ah mäih ah ang dang law vai ah tha nak ci gui, cun ung phi shung ci gui. Khaw nü ung khogang bäng ah kyak ci.

19 Cee gui naw ghangpughang am, “Shin cu Khanpughi ah bi nei!” cik ci gui. Cun ung phi ghangpughang cu ling ne, Bawipa ah pyen ah mäih ah Moses la Aaron cu kä ngai goi ci.


Pi Kying gui

20 Bawipa naw Moses am, “Ngawi ung khaw ngawi hta, ghangpughang tui ah a hteh nak lam ah hteit ne, hmu neta, Bawipa ah ng’thu na m’thein vai cu, ‘Ka chang gui na hteh sak gui vai, cun ung ngami naw na khawihnah hning khai gui.

21 Kei naw ka ning k’bäi cu, nang naw na maa ah a kyak ung, nang la na bawi gui, na chang gui ah khan ah pikying gui yuk chah ne ka ning m’kyuk khai. Egypt chang gui ah im gui avan cu pikying awn be ne, m’dek khan avan cu pikying naw küm khai.

22 Cun ung phi ka chang gui ah om nak Koshen khaw hmun cu kei naw ka m’htei khai, cun ah khaw ah pikying kä om tuk khai. Cun ah ka bi ung shin ah khaw ung Kei, Bawipa naw bii ka bik ciah nang naw na hmat khai.

23 Kei naw kei ah chang la nang ah chang ah ng’lak ung, ng’lak mah khai ah ka bik khai nei. Shin ah cäi aih vai cu ngawi ung ah kyak khai nei” cik ci.

24 Bawipa naw pikying mawng mah cu ghangpughang ah mang im la a bawi gui ah im gui ung yuk chah ci. Cun ah pikying gui naw Egypt khaw avan cu m’di ci gui.

25 Ghangpughang naw Moses la Aaron cu khü goi neta, “A shin ah khaw ung nani Khanpughi cu hteit ne pe tak ne khawihnah ni ä” cik ci.

26 Moses naw, “Cun ah bi vai cu kä hman khai nei, a i ah kyasei ci ung, keimi naw Bawipa kami Khanpughi, kami pektak khawihnah nak ah seime gui cu, Egypt chang gui naw m’shemshai khai gui nei, keimi naw seime gui mang ne, Egypt gui naw ami na hmuh gui vai ah kami khawihnah ah a kyak ung, ngami naw lung awn vawi ne na ngawn gui khai gui nei.

27 Keimi naw hnüüp thum hteit neta bung ah Bawipa kami Khanpughi cu ana thumkhän gui ah mäih ah kami pektak khawihnah khai nei” cik ci.

28 Ghangpughang naw, “Bung ah Bawipa nami Khanpughi nami petak khawihnah khai ah ka ning hteh sak gui khai, a shou nak ah kä nami hteh en vai nei. Kei ah hmawk ah nami taigü vai nei” cik ci.

29 Moses naw, “Kei ka heth ba vai am, nang la na bawi gui la na chang gui ungka, pikying gui cu ngawi ung ge ami maih ba vai ah Bawipa ah ka taigü khai nei. Cun ung phi keimi kä na na theileh en nak ba gui vai, Bawipa khawihnah taigü khai gui cu kä na maa en nak ba gui vai” ci nak ci.

30 Moses naw ghangpughang hteh ta neta Bawipa ah taigü ci.

31 Moses naw akthäh ah mäih ah Bawipa naw bik ci. Pikying gui cu ghangpughang la a bawi gui, a chang gui ungka maih yawp ci gui, k’pi tumat phi kä om ba ci.

32 Shin hlawk ah kyasei phi, ghangpughang cu ling ne, Israel chang gui cu kä hteh sak ba gui ci.

Cho Bible Common Language © Bible Society of Myanmar, 2016.

Bible Society of Myanmar
Swiv nou:



Piblisite