PHYAWN NAK 7 - Cho Bible Common Language 2016

¹ Bawipa naw, “Nang cu ghangpughang ah ma ah Khanpughi ah mäih ah ka ning pyang khai, na phäi Aaron cu ani ah ma ah nang ah prophet ah mäih ah ng’thu khai.

² Kei naw ka ning m’cäi phung cu Aaron am na m’thein vai, cun ung ani naw, Israel chang gui a khaw ungka kami hteh vai ah ghangpughang am m’thein khai.

^3-4 Cun ung phi ghangpughang cu kei naw ka ling sak khai, ani naw kä ning ngai khai, Egypt khaw ah kyihkyawk vai a i chü ka bi ung phi ani naw a i ah kä ngai khai. Cun kawn ah nuipai ciah m’kyuk nak cu Egypt ah khan ah law püi ne, ka changpakhui gui cu cun ah khaw ungka ka hteh püi ba gui khai.

⁵ Kei naw ngami hnungtuk püi gui ne, ka kut shäng ne, ami khaw ungka Israel chang gui ka hteh püi ba gui ung, kei cu Bawipa ah ka kyak ciah Egypt chang gui naw na hmat lawk khai gui.

⁶ Moses la Aaron naw, Bawipa naw am cäi goi ah mäih ah bik ci goi.

⁷ Ngani naw ghangpughang ah ng’thu ani pyen yah ung Moses cu kum cheitkip lawk ci, Aaron cu kum cheitkip lei thum lawk ci.

Aaron ah Ng’Shopawng

⁸ Bawipa naw Moses la Aaron am,

⁹ ghangpughang naw cäi aih vai tumat m’dang ne nami mät naw nami mät nami bä sak ci, a ci law ung, Aaron am ang shopawng nami lak sak vai, ani naw ng’shopawng cu ghangpughang ah ma ah a ghawh ung, cun cu k’phyu ah ng’lat khai” cik ci.

¹⁰ Cun ah kyasei Moses la Aaron cu ghangpughang ah hteit ni neta, Bawipa naw am cäi goi ah mäih ah bik ci goi. Aaron naw ang shopawng cu ghangpughang la a bawi gui ah ma ah ghawt sei, cun cu k’phyu ah ng’lat ci.

¹¹ Ghangpughang naw akchang cüivai gui la k’cee gui cu khü gui sei, ngami naw a cun ah mäih ah ami cee nak awn bik ci gui.

¹² Ngami naw ami ng’shopawng gui cu ghawt u sei, k’phyu ah ng’lat yawp ci. Cun ung phi Aaron ah ng’shopawng naw cun gui cu m’yaw yawp ci.

¹³ Cun ung phi ghangpughang cu king gäk gäk ne, Bawipa naw a pyen ah mäih ah ghangpughang naw Moses la Aaron cu kä ngai goi ci.

Leigai naw Egypt Tuk ci Si

¹⁴ Cun kawn ah Bawipa naw Moses am, “Ghangpughang cu ling aih ciah chang gui kä hteh sak gui ci.

¹⁵ Ani cu Nile tuinu ah a hteh yah ung khaw ngawi hta ah hteit ne hmuh vä, phyu ah ng’plouh ciah ng’shopawng cu hteh püi u neta, tuikem ah nami gin vai.

¹⁶ Cun kawn ah ghangpughang am, “Bawipa Hebru gui ah Khanpughi naw, a chang gui na hteh sak gui vai ah ka ning m’thein vai ah ana tüih law nei, cun ung va ngami naw ani cu bung ah khawihnah hning khai gui. Cun ung phi tuhbäi güt nang naw kä na ngai ci.

¹⁷ Tuhbäi ka bawi aw, Bawipa naw, ani a u ah a kyak la a i a bi law vai cu ning hmuh sak khai ah pyen ci. Teng ä, kei naw tui ah hmai cu shin ah ng’shopawng awn ka teei khai, tui cu si ah ng’lat khai.

¹⁸ Nga si yawp khai, tui thu ne ng’üng khai, Egypt chang gui naw cun ah tui kä aw ba hlawt khai gui.

¹⁹ Bawipa naw Moses am, “Aaron am na m’thein vai, ang shopawng cu la ne Egypt khaw ah tuinu avan, tuilawng avan la tui shawk avan ah khan ah a shääng vai nei. Tui gui cu si ah ng’lat yawp khai, khaw avan cu si ah kya yawp khai nei, sing kawk, lung khui ung phi si be khai nei” cik ci.

²⁰ Moses la Aaron naw Bawipa ah pyen ah mäih ah bik ci goi. Ghangpughang la a bawi gui ah ma ah Aaron naw ang shopawng cu shääng ne, tuinu ah hmai cu that ci, tui avan cu si ah ng’lat yawp ci.

²¹ Tui ung om ciah nga gui si yawp ci, tui avan thu ne ng’üng sei, Egypt chang gui naw a i kä aw ba ci gui. Egypt khaw avan ung si bäng ah kyak ci.

²² Ghangpughang ah k’cee gui naw phi a cun ah mäih ah bi tuk ci gui. Ghangpughang cu ling gäk gäk ci. Bawipa naw a pyen ah mäih ah ghangpughang naw Moses la Aaron cu kä ngai goi ci.

²³ A cun nak vaisü ung ng’hlat ne, a mang im ah hteit ba ne, shin ah mawng cu a i ah kä sui ci.

²⁴ Egypt chang gui ami van naw ami awk vai ah tuinu ah kem ah tui shawk ci gui, a i ah kyasei ci ung tuinu ung tui cu kä awk ba phyak ci.

²⁵ Bawipa naw tuinu a thah nak hnüüp chih phlän lawk ci.