PHYAWN NAK 6 - Cho Bible Common Language 2016

¹ Cun kawn ah Bawipa naw Moses am, “Ghangpughang ah khan kei naw a i ka bi cu tuhbäi nang naw na hmuk khai nei. Ka chang gui a hteh sak gui vai ah ka k’tut khai nei. Ani naw a khaw ungka aktäm gui vai ah akcang ah ka k’tut khai nei” cik ci.

Khanpughi naw Moses Khü ci

² Khanpughi naw Moses cu ng’thu püi ne, “Kei cu Bawipa nei,

³ Abraham, Isaak la Jakob ni ah ma ah M’gäi ciah Khanpughi ah ka ng’dang ci. Cun ung phi ka ming theing cu Bawipa ah ami na hmat vai ah ka mät naw ka mät kä ka bik ci.

⁴ Ngami awn ka thumkhän phi ka bik ci, Kanaan khaw cu ka pe gui khai ah shai ka tak ci. Cun ah khaw cu akhohei chang ah kya ne ami om nak ah kyak ci.

⁵ Egypt gui naw ami khleihtein nak gui, Israel gui ah ng’hlou ng’ei cu ka ng’yak ci nei, ka thumkhän phi ka shüm ci nei.

⁶ Israel gui am ka pyen nak gui ah ng’thu cu m’thein gui vä, “Kei cu Bawipa nei, kei naw ka ning gung gui khai, Egypt gui ah changshäm ah nami kyak nak ungka, ka ning m’hlawt gui khai. Kei naw m’gäi ciah ka ban shäng ne, ngami ah khan ah kyih vai ah m’kyuk nak cu ka law püi khai, nangmi cu ka ning hun gui khai.

⁷ Nangmi cu ka mät ah chang ah ka ning pyang gui khai, kei cu nangmi ah Khanpughi ah ka kyak khai. Egypt khaw, khleihtein ungka ka ning m’hlawt gui kawn ah, kei cu Bawipa, nami na Khanpughi ah nami hmat khai nei.

⁸ Abraham, Isaak la Jakob ni am ka pek gui vai ah, ang müi ah ka shaitak ah khaw ung, nangmi cu ka ning hteh püi gui khai; cun cu nami mät ah khaw ah kyak khai ah ka ning pe gui khai. Kei cu Bawipa nei” cik ci.

⁹ Moses naw cun gui cu Israel gui am m’thein gui ci. Cun ung phi ngami naw kä ngai ci gui, a i ah kyasei ci ung, ngami cu akshe ah ami khleihtein nak gui awn ami m’lung cu di yawp pyi ci.

¹⁰ Cun kawn ah Bawipa naw Moses am,

¹¹ “Egypt ghangpughang ah hteit ne na pyen vai, Israel gui cu a khaw ungka a hteh sak gui vai” cine pyen nak ci.

¹² Moses naw, “Israel chang gui hngaw naw ka ng’thu kä ami ngaih ung, a i cha ah ghangpughang naw ana ngaih vai ang? Kei cu kä ka ng’thu thei ci nei” ci tu ba ci.

¹³ Bawipa naw Moses la Aaron am khän ne a pyen nak goi cu, “Israel chang gui am nani m’thein gui vai, Egypt ghangpughang am phi nani m’thein vai, Israel chang gui cu Egypt khaw ungka hteh püi ba gui vai ah kei naw ka k’bäi ci nei” cik ci.

Moses la Aaron ah Kyongkhui ah Mawng

¹⁴ Jakob ah htahtük Reuben cu phli ah hta ci. Cun gui cu; Hanok, Pallu, Hezron, la Karmi ah kyak ci gui.

¹⁵ Simeon cu chuk ah hta ci. Cun gui cu; Jemuela, Jamin, Obad, Jachin, Zohar la Shual ah kyak ci, ngami cu Kanaan hnumi ah hta gui ah kyak ci. Ngami cu ami ming sui gui ciah pupa ah pahta ah kyak ci gui.

¹⁶ Levi cu thum ah hta ci, cun gui cu; Kershon, Kohath, la Merari, ngami cu ami ming sui gui ciah pahta ah kyak ci gui. Levi cu kum 137 ghing ci.

¹⁷ Kershon cu hnih ah hta ci, Libni la Shimei, ngani cu akda ah ng’shon ci goi.

¹⁸ Kohath cu phli ah hta ci, ngami cu; Amram, Izhar, Hebron la Uzziel ah kyak ci gui. Kohath cu kum 133 ghing ci.

¹⁹ Merari cu hnih ah hta ci, Mahli la Mushi ah kyak ci. Shin gui cu Levi ah pahta ng’shon gui ah kyak ci.

²⁰ Amram naw apa ah be Jochebed chu nak ci. Ani cu Aaron la Moses ah hta ci. Amram cu kum 137 ghing ci.

²¹ Izhar cu thum ah hta ci, Korah, Nepheg la Zichri ah kyak ci.

²² Uzziel phi thum ah hta ci, Mishael, Elzaphan la Sithri ah kyak ci.

²³ Aaron naw Amminadab ah hta, Nashon ah be, Eisheba cu chu nak ci; ani cu Nadab, Abihu, Eleazar la Ithamar ah hta ci.

²⁴ Korah cu thum ah hta ci, Assir, Elkanah la Abiasaph ah kyak ci gui. Ngami cu Korah pahta pupa ng’pai gui ah kyak ci.

²⁵ Eleazar, Aaron ah hta naw Putiel ah hta tumat chu nak ci, ani cu Phinehas ah hta ci. Shin gui cu ami kyongkhui ng’vai gui Levi pakhui ah pahta gui ah kyak ci.

²⁶ Aaron la Moses cu, “Israel pakhui gui Egypt khaw ungka hteh püi ba gui ni ä” cine Bawipa naw am cäi ah chang ah kyak ci goi.

²⁷ Ngani cu Israel chang am hlawt gui vai ah Egypt ghangpughang ah ma ah ng’thu pyen ciah chang ah kyak ci goi.

Moses la Aaron am Bawipa ah Thumkhän

²⁸ Egypt khaw ah Bawipa naw Moses ang thu püi sang ung,

²⁹ ani naw, “Kei cu Bawipa nei, ka ning m’thein phung cu, Egypt ghangpughang am na m’thein vai nei” cik ci.

³⁰ Cun ung phi Moses naw, “Kei cu kä ka ng’thu thei ciah nang naw na hmat ci nei; a i hawkcha ah ghangpughang naw kei cu na ngai khai ang?” cik ci.