PHYAWN NAK 5 - Cho Bible Common Language 2016

Egypt Ghangpughang ah Ma ah Moses la Aaron

¹ Cun kawn ah Moses la Aaron naw Egypt ghangpughang ah ma ah hteit ne ng’thu ani pyen cu, “Bawipa, Israel Khanpughi naw a pyen cu, ‘Ka chang gui na hteh sak gui vai nei, cun ung ngami naw bungpuk ah, pawi bi ne na m’taam khai gui” ciah kyak ci.

² Ghangpughang naw, “Bawipa cu a u ang? A i ah kyasei ani ah ng’thu ngai ne, Israel gui ka hteh sak gui vai ang? Kei naw Bawipa cu kä ka hmat ci, Israel gui cu kä ka hteh sak gui khai nei” cik ci.

³ Moses la Aaron naw, “Hebru gui ah Khanpughi naw keimi ung amät cu m’than lawk ci. Khaw hnüüp thum na m’hlawt gui ä, keimi bungpuk ah hteit ne Bawipa kami Khanpughi cu khawihnah nak kami pek khai nei. Cun ah kä kami bi ung ani naw, gawpyam nak la ng’tuk nak awn na ngawn gui khai nei” cik ci goi.

⁴ Ghangpughang naw Moses la Aaron am, “A i ah kyasei chang gui ami bii nami ng’düm sak gui ang? Cun ah changshäm gui bii bi ba sak gui vä!

⁵ Nangmi cu Egypt chang gui ah ta nami da law pi ci, Cun ah kya ne tuhbäi bii nami m’düm hlük ci.

⁶ A cu hnüüp ung ghangpughang naw changshäm k’tut ciah Egypt gui la Israel ng’vai gui cu khen gui ne:

⁷ “Uk pyan nak vai htang gong kä nami m’kawn ba sak gui vai. Ami mät am a hei ah nami shui sak gui vai.

⁸ Cun ung phi uk cu ayan ka chü nami pyan sak gui vai, kä ken en pi sä bäi. Ngami ami bi vai aktung kä om sei, ami Khanpughi khawihnah vawihpeh khai gui ah, hteh sak gui vai pyen ne k’thäh lawk ci gui.

⁹ Aktä pi bi sak gui ne tawt law sak gui vä, Cun ung hleei ciah ng’thu ami ngaih nak vai a khin kä om khai” cik ci.

¹⁰ Changshäm k’tut ci gui la Israel ng’vai gui cu Israel chang gui ah hteit u neta, “Ghangpughang naw htang gong kä ning pe ba gui khai pyen ci.

¹¹ Nami mät naw nami hmuh nak vai ah shui ne, nami m’kawn vai. Cun ung phi uk cu ayan ka chü bä lawk khai ah nami bi vai cik ci nei” cine pyen ci gui.

¹² Cun ah kyasei chang gui naw Egypt khaw avan ung hteit ne htang gong shui ci gui.

¹³ Htang gong ami pek gui yah ung uk ami gah chü, a hnüüp tä sei ami gah ba vai ah, changshäm k’tut ci gui naw k’tha na ne k’tut gui ci gui.

¹⁴ Changshäm k’tut ciah Egypt chang gui naw, ami khawngmang sak gui ah Israel ng’vai gui cu that gui u ne, “A i ah kyasei nami chang gui naw yan nä ami bi chü ah uk kä ami bi ba ang? cik ci gui.

¹⁵ Israel ng’vai gui cu Ghangpughang ah hteit ne chiu m’da ci gui, “Nang bawi, a i ah kyasei keimi ah khan ah shikcha ah na bi ang?

¹⁶ Htang gong phi kä nami na pe gui ci, uk phi nami na pyan sak gui ci, tuhbäi keimi na that gui ci gui nei, cun cu na chang gui naw katnak ami bi ah kyak ci nei” cik ci gui.

¹⁷ Ghangpughang naw, “Nangmi cu nami dam ci, a i kä nami bi hlük ci, cun ah kya ne, nami Bawipa nami khawihnah khai ah ka ning hteh sak gui vai ah nami na k’thäh ci.

¹⁸ Tuhbäi hteit ne bii bi vä! Htang gong kä ning pek ba gui vai, cun ung phi uk cu ayan ka chü ah nami pyan vai nei” cik ci.

¹⁹ Ayan ami pyan man chü ah uk cu a hnüüp tä sei ami pyan vai ah pyen na gui khäta Israel ng’vai gui naw, khüikha nak ung gawk pyi ci gui ah hmat ci gui.

²⁰ Ngami cu ng’hlat law ba u ne, ana ngäng gui ciah Moses la Aaron cu hmuh u neta,

²¹ Ngami naw Moses la Aaron am, “A i nani bi cu Bawipa naw hmuk ci nei, ghangpughang la bawi gui naw ami na gen gui vai ah nani bi ah hmawk ah ning m’kyuk goi khai nei. Ngami naw ami na ngawn nak gui vai ah, nangni naw a mawng akni nani bik ci nei” cik ci gui.

Moses naw Bawipa ah Ma ah Ng’Thu m’Da ci

²² Cun kawn ah Moses cu Bawipa ah ma ah ng’hlat ba mä neta, “Bawipa, a i ah kyasei na chang gui na shedam nak gui ang? A i ah kyasei shin ah na na tüih law ang?

²³ Ghangpughang ah hteit ne nang ah hmawk ah ng’thu ka pyen ung tün ne, ani naw shedam na gui ci nei. Cun ung phi nang naw api ah phi kä na m’htei gui ci” cik ci.