PHYAWN NAK 4 - Cho Bible Common Language 2016

Khanpughi naw Moses am Huham Akchün Pek ci

¹ Cun kawn ah Moses naw Bawipa am shan ba cu, “Israel chang gui naw kä ami na yum ah a kyak ung, ka ng’thu kä ami ngaih ah a kyak ung, ngami naw nang a i ah kä na dang khai ah ami pyen ah a kyak ung, a i ah ka kyak khai ang?

² Cun ci khäta Bawipa naw, “Na kut ung a i ang na kawh?” cine ng’shik ci. Ani naw, “Ng’shopawng” cik ci.

³ Bawipa naw, “M’dek ung yuk ghawt ä” ci sei, Moses naw a cun ah ghawt khäta k’phyu ah kya law sei ani cu a hei ah dawng ci.

⁴ Cun kawn ah Bawipa naw Moses am, “Ng’phäi ne ang mei ung k’pang ä” ci sei, Moses naw a cun ah ng’phäi ne k’pang khäta, cun cu ng’shopawng ah kya ba ci.

⁵ Bawipa naw, “A shicha ah Israel chang gui ah ma ah na bi ung, Bawipa, ami pupa gui ah Khanpughi, Abraham, Isaak la Jakob ni ah Khanpughi cu, nang ah ma ah dang ciah yum khai gui nei” cik ci.

⁶ Bawipa naw Moses am a pyen nak ba mä ne, “Na kut cu na htu khui ah k’tawn ä” ci sei, a cun ah k’tawn neta va saw ba khäta, khüi ah mäih ah bawk ne khei ci.

⁷ Bawipa naw, “Na kut cu na htu khui ah hei tawn ba mä ä” ci sei, acun ah hei tawn ba ne va saw ba khäta, asa cu akni ah kya ba ci.

⁸ Bawipa naw, “Ngami naw kä ning yum ne, a htük ung cäi aih vai cu kä ami ngaih ah a kyak ung phi tuhbäi ka cu yum khai gui nei.

⁹ Shin ah cäi aih vai goi awn phi kä ami ning yum ah a kyak ung, na ng’thu kä ami ngaih ah a kyak ung, acun na a kyak ung Nile tuinu ungka tui la ne, m’dek ung na yuk lon vai, tui cu si ah ng’lat khai nei” cine kyak ba ci.

¹⁰ Cun ung phi Moses naw, “Ka nei, Bawipa aw, kä na tüi en ä, kei cu ng’thu thei ciah kä ka kyak ci, nang naw na na ng’thu püi yah ung phi kä ka ng’thu thei ci. Kei cu kä ng’thu hlawt ne, shokshü ne, am kha gih ciah ka kyak ci.

¹¹ Bawipa naw ani am, “Chang ah m’gawng cu a u naw a pek ang? Akpang la ak ang cu a u naw a pyan ang? A u naw mik m’dauh sak ci ang? Cun cu kei Bawipa ah kyak ci nei.

¹² Tuhbäi hteit ä! Kei naw na ng’thu thei vai ah ka ning m’htei khai nei, a i cha ah na ng’thu vai ka ning m’thein khai nei.

¹³ Cun ung phi Moses naw, “Ka nei, Bawipa aw, na bä ni, chang a hei tüi ä” cik ci.

¹⁴ Cun ung Bawipa cu m’lungshe neta Moses am, “Na phäi, Levit chang, Aaron ah mawng cu a i hawkcha ang? Kei naw ka hmat ci, ani cu akni ah ng’thu thei ci, akcang ah tuhbäi ani cu, ning hmu lawk khai ah lawk ci, a ning hmuh law ung ani cu yeikyai khai nei.

¹⁵ Ani cu ng’thu püi ne a i cha ah ng’thu vai cu na m’thein tu vai. Nani nik hnih nani ng’thu thei vai ah ka ning m’htei goi khai, a i na ni bi vai cu ka ning m’thein goi khai.

¹⁶ Ani cu nang ah ng’thu k’phlan ciah kya ne, chang gui ah ma ah nang ah hmawk ah ng’thu pyen khai. Nang cu ani, a i cha ah ang thu vai ah m’thein ciah Khanpughi ah mäih ah na kyak khai.

¹⁷ Shin ah ng’shopawng cu la ne na kawh vai, a shin awn nang naw cäi aih vai gui na bik khai.

Moses cu Egypt Khaw ah Hteit Ba ci

¹⁸ Cun kawn ah Moses cu akawi Jethro ah hteit ba neta ani am, “Egypt khaw ah ka mätyah gui ah ka hteit ba hlük ci, ami ghin yah ung ka hmu ba hlü gui ci nei” cik ci. Jethro naw yum ne hteh ba sak ci.

¹⁹ Moses cu Midian ung a om sang ung, Bawipa naw ani am, “Egypt khaw ah hteit ba ä, nang ning ngawn hlük ci gui cu si yawp pyi ci gui nei.

²⁰ Cun kawn ah akchu la a hta gui cu ng’se ung m’kai gui ne, Egypt khaw ah hteh püi gui ci. Khanpughi naw a lak vai ah a pyen ah ng’shopawng phi la ne kawt ci.

²¹ Bawipa naw Moses cu ng’thu püi bamä ne, “Tuhbäi nang cu Egypt ah na hteit law ba ci, cäi aih gui vai avan cu ghangpughang ah ma ah na bi kheng vai nei. Cun ah na bi vai kei naw huham ka ning pek ah kyak ci. Cun ung phi kei naw ghangpughang cu ka ling sak khai, ani naw chang gui kä hteh sak gui khai.

²² Cun ung phi, Kei, Bawipa ah ng’thu nang naw na m’thein vai cu, “Israel cu kei ah ka htahtük ah kyak ci.

²³ Ka hta na hteh sak vai ah kei naw ka ning m’thein ci, cun ung ani naw kei na khawihnah khai, cungphi nang naw na mak ci, tuhbäi nang ah htahtük cu kei naw ka ngawn khai.

²⁴ Egypt khaw ah ami hteh ba nak lam ami ng’düm nak ung, Bawipa naw Moses cu hmu neta ngawn khai ah pawng ci.

^25-26 Akchu Zipporah naw, lung k’ghaat cu la ne a hta ah vun cu aat neta, Moses ah khaw ung taih ci. Cun ah vun a ah ah hmawk ah ani naw Moses am, “Nang cu si ah kyak ciah ka cei ah na kyak ci nei” cik ci. Cun ah kyasei Bawipa naw Moses cu luat sak ci.

²⁷ Cun sang ung Bawipa naw Aaron am, “Moses na hmuk khai ah bung ah hteit ä” cik ci. Cun ah kyasei ani hmuk khai ah khomhtung theing ah hteit ci, ani naw Moses cu hmu neta ng’ui ci.

²⁸ Cun kawn ah Moses naw Aaron am, “Bawipa naw Egypt khaw ah a hteh ba vai ah a pyen yah ung am thein gui avan cu m’thein tuk ci; Bawipa naw abi vai ah akbäi ah cäi aih gui vai ah mawng phi m’thein tuk ci.

²⁹ Cun kawn ah Moses la Aaron cu Egypt khaw ah a täng ah hteit ba ni neta, Israel chang vai gui cu ng’bum sak gui ci goi.

³⁰ Bawipa naw Moses ah ma ah a pyen ah ng’thu avan cu Aaron naw m’thein gui ci. Moses naw cäi aih vai gui avan cu chang gui ah ma ah m’dang ci.

³¹ Ngami naw yum ci gui, ngami ah om nak ah Bawipa a law vai la aktä ah ami shedam nak gui cu ani naw hmu gui ciah ng’ya u neta, ngami naw m’khuukdong ne khawihnah ci gui.