PHYAWN NAK 3 - Cho Bible Common Language 2016

Khanpughi naw Moses Khü ci

¹ Hnüüp ät ung Moses naw akawi Midian taigüpa, Jethro ah htome gui shäm ne a om yah ung, ani cu htome gui hoi ne, kiangma phlän ne, khomhtung theing Sinai ah law ba ci.

² A cu ah Bawipa ah khanchang cu k’pluup ah ng’lung ah mei m’lei ah dang lawk ci. Moses naw k’pluup cu mei ah däi sei hmuk ci, cun ung phi kä ui ci.

³ Moses naw, Shin cu cäicat vai kyak ci, cine ngai neta, “A i ah kyasei shin ah k’pluup cu kä a uih ang? Hteit ne k’et ne ka teng khai” cik ci.

⁴ Bawipa naw Moses ang et law cu hmu neta, Pluup ah ng’lung ah om ne khü ci, “Moses! Moses!” Moses naw, “äi, shi ah ka om ci nei” cik ci.

⁵ Khanpughi naw, “Kä ang nawn nen law ä, Na phahnak suut ä, nang cu khaw hmun theing ung na ng’düi ci nei.

⁶ Kei cu na pupa gui ah na Khanpughi, Abraham, Isaak la Jakob ni ah na Khanpughi nei” cik ci. Moses cu Khanpughi a hmuh vai ah kyi neta a hmai k’bawm ci.

⁷ Cun kawn ah Bawipa naw, “Egypt khaw ah kaa chang gui a i hlawk ah ami shedam nak gui cu ka hmuk ci nei. Khleihtein shäm ci gui ah kut ungka gun gui vai ah ami kyah m’lau cu ka ng’yak ci nei, ngami ah geinvai avan ka hmuk ci nei.

⁸ Egypt gui ah kut ungka ka gun gui khai ah kei ka lawk ci, ngami cu Egypt khaw ah kaa bämang nak khaw, bühmang ne ng’lei nik ciah khaw, ami ng’shon nak, tuhbäi chü Kanaanit gui, Hittit gui, Amorit gui, Perizzit gui, Hivit gui la Jebusit gui ah om nak ah ka hteh püi ba gui khai.

⁹ Ka chang gui ah kyah cu akcang ah ka ng’yak ci, Egypt chang gui naw a i hlawk ah ami shedam nak gui phi ka hmuk ci.

¹⁰ Tuhbäi nang cu Egypt ghangpughang ah ka ning tüi ci. Cun ah kyasei nang naw, ka chang gui cu ani ah khaw ungka na khah püi ba gui khai” cik ci.

¹¹ Cun ung phi Moses naw Khanpughi ah ma ah, “Kei cu akholä ah ka kyak ci, kei naw a i hawkcha ah ghangpughang ah hteit ne, Israel chang gui Egypt khaw ungka ka hteh püi ba gui hlawt khai aw?” cik ci.

¹² Khanpughi naw, “Kei cu nang awn a täng ah ka om khai, nang naw ka chang gui Egypt khaw ah kaa na law püi ba gui ung, shin ah m’htung ung na na khawihnah khai. Cun cu kei naw ka ning tüih ah mawng ang dang nak ah kyak khai.”

¹³ Cun ung phi Moses naw, “Kei naw Israel gui ah hteit ne, ‘Nami pupa gui ah Khanpughi naw, kei cu nangmi ah na tüi lawk ci nei’ cine ka m’thein gui ung, ngami naw ani ah ming cu a u ang? cine ami na ng’shi ung, a i cine ka m’thein gui vai aw?” cik ci.

¹⁴ Khanpughi naw, “Kei cu Kei ah ka kyak ci” cicu na m’thein gui vai. ‘Kei ah ka kyak ci’ cik ci naw ana tüih law nei, na ci vai.

¹⁵ Kei, Bawipa, Ami pupa gui ah Khanpughi, Abraham, Isaak, Jakob ni ah Khanpughi naw, nangmi ah ana tüih law nei, cine Israel chang gui am na m’thein gui vai. Cun cu khonglän ung ka ming ah kyak ci. Cun cu ma lam ung hta ng’shon gui naw ami na khü vai ah kyak ci.

¹⁶ Hteit ne Israel ng’vaihta gui cu ng’bum püi gui ne, Kei, Bawipa ami pupa gui ah Khanpughi, Abraham, Isaak la Jakob ni ah Khanpughi, na ma ah ka dang cu na m’thein gui vai nei. Kei cu ngami ah law ne, Egypt gui naw ami khan ah ami bi gui cu ka hmuk ci nei, cicu na m’thein gui vai nei.

¹⁷ Egypt khaw, akshe ah ami ci cun nak gui ungka, ka hteh püi ba gui khai ciah kei naw ka k’bäi pyi ci nei. Kei naw büh mang ne anglei nik ciah khaw-Kanaanit, Hittite, Amorit, Perizzit, Hivit, la Jebusit chang gui ah khaw ah ka hteh püi gui khai.

¹⁸ “Ka chang gui naw na ng’thu cu ngai khai gui nei. Nang cu Israel ng’vai gui awn a täng ah Egypt ghangpughang ah hteit neta, “Bawipa, Hebru gui ah Khanpughi naw, amät cu keimi ung m’than lawk ci nei. Keimi bung ah hnüüp thum kami hteh vai na pe gui ä, bungpuk ah pe ta ne Bawipa Khanpughi cu kami khawihnah khai nei” nami ci vai.

¹⁹ Kä k’tut ah khoi ung Egypt ghangpughang naw kä ning tüi gui khai ah ka hmat ci nei.

²⁰ Cun ung phi kei naw ka huham mang ne, kyihkyawk gui vai awn Egypt cu ka m’kyuk khai nei. Cun kawn ah ani naw ning hteh sak gui khai nei.

²¹ “Egypt gui naw ami ning chang m’sui gui vai ah ka ci gui khai nei. Cun ung ka chang gui ami hteh law ba ung ami kut ghawng sei kä hteit ba khai gui.

²² Israel hnumi päng naw a im pei ah Egypt chang gui la a im ah om tuk ciah Egypt hnumi gui ah suisak, la ghui ngui ng’yoi khai gui. Cun gui cu ami hta gui am m’sui m’awi gui u ne, Egypt gui ah khawh cu hteh püi khai gui.