PHYAWN NAK 2 - Cho Bible Common Language 2016

Moses Angtüi ah Mawng

¹ Cun yah ung Levi pakhui ungka pami tumat naw amät ah pakhui chang hnumi cu chu na sei,

² cun ah hnumi cu pami hta ah hta lawk ci. A hta cu kyom khäta anu naw cha thum ung thup ci.

³ Cun ung phi kä thup law ba hlawt neta, mui dawn la ne, tuipan la sing pli awn hluk ne, küm ne pyang neta, acun ung a hmaw hta m’khäp ne, tuikem phiphät hmu ah hmoh ci.

⁴ A hmaw hta ah a pai naw ang shawng nak ah ng’düi neta a i ah a kyak law ah teng ci.

⁵ Ghangpughang ah hta hnumi cu tui ng’si khai ah tuinu ah law sei, a changshäm gui cu tuikemah ami hteh shüi yah ung, ang ghit ah phiphät hmu ah dawn cu hmu neta, a changshäm am lak sak ci.

⁶ Ghangpughang ah hta hnumi naw cun ah dawn cu hmawng neta a hmaw hta cu hmuk ci. A hmaw hta cu kyap sei ani naw m’gein neta, “Shin cu Hebru a hmaw hta ah kyak ci” cik ci.

⁷ A hmaw hta ah a pai naw, “A hmaw hta m’htei khai ah Hebru hnumi hteit ne ka ning khü pe vai aw?” cik ci.

⁸ Ghangpughang ah hta hnumi naw, “Na bä ni, na khü peä” cik ci. Cun ah hnumi hta naw a hmaw hta ah nu cu khü ne law püi ci.

⁹ Mang ah hta hnumi naw hnumi nu am, “Shin ah a hmaw hta la ne na na m’ghin pek vai, kei naw ka ning cheng khai nei” cik ci. Ani naw a hmaw hta cu la ne m’ghin ci.

¹⁰ A hmaw hta cu ng’vai law khäta, m’ghin ciah hnumi naw, ghangpughang ah hta hnumi ah hteh püi sei, ani naw a hta ah k’bäi ci. Ani cu amät ng’htau ne, “Tui ungka ka khui ah kyasei, Moses ah aming ka sui khai” cik ci.

Moses cu Midian ah Phiawng ne Hteit ci

¹¹ Moses cu ng’vai law ne a chang gui, Hebru gui ah hteit neta, aktä ah bii ami bi sak gui cu hmuk ci. Moses ah amätyah chang gui Egypt chang naw ana ngawn sei phi hmuk ci.

¹² Moses cu mang shüi neta ani hmuk khai a u kä om khäta, Egypt chang cu ngawn ne laigin hmu ah thup ci.

¹³ A ngawi ung mä hteit ba ne, Hebru chang goi ana ng’tu ni sei hmu goi ci. Ani naw hma ciah chang am, “A i ah kyasei na Hebru chang paw na thah ang?” cine ng’shik ci.

¹⁴ Cun ah chang naw, “A u naw ang nang cu uktu la suki ah a ning hmoh? Egypt chang na ngawn ah mäih ah kei na na ngawn hlük ci ma?” cik ci. Moses cu kyi neta amät ng’htau ne, “Kei ah ka bi cu chang gui naw hmat ci gui kyak ci nei” cik ci.

^15-16 Cun ah a mawng cu ghangpughang naw ng’ya neta, Moses cu ngawn vai ah k’tha nak ci. Cun ung phi Moses cu dawng ne Midian khaw ah hteit ne om tuk ci. Hnüüp ät ung Moses cu tuishawk pei ah ngok ci. Cun sang ung Midian Taigüpa, Jethro ah hta hnumi gui chih cu tui than khai gui ah law u ne, ami pa ah htome gui la me gui ah awk vai tuikan ung tui k’be ci gui.

¹⁷ Cun ung phi htome shäm gui naw cun ah hnumi hta gui cu k’täm gui ci gui. Cun ah kyasei Moses naw hteit ne gung tu gui ne, ami htome gui ah awk vai tui than tu pe gui ci.

¹⁸ Ngami cu ami pa ah hteit ba u khäta, ami pa naw, “A i ah kyasei tuh ngawi ang dawt ah nami law ba ang?” cine ng’shi gui ci.

¹⁹ Egypt chang naw htome shäm gui ah kut ung na gung gui ne, htome gui ah awk vai tui na than pe gui ci” cik ci gui.

²⁰ Ani naw a hta hnumi gui am, “Cun ah chang a hawi ang? A i vai nami nawng shüt düt ang? Ei ei tuk khai ah hteit ne khü ba vä” cik ci.

²¹ Cun ah kyasei Moses naw, a cu ah om tuk khai ah k’bäi ci. Jethro naw a hta hnumi Zipporah awn ng’chungla sak goi ci.

²² Ani cu pami hta ah hta ci. Moses cu amät ng’htau ne, “Kei cu shin ah khaw ung akhohei chang ah ka kyak ci, cun ah kyasei Kershon ah ang ming ka sui khai” cik ci.

²³ Khokum api sho hta khäta, Egypt ghangpughang cu sik ci. Cun ung phi Israel chang gui cu ami khleihtein ah kya ne geinvai lä u ne, m’gein gui vai ah kyap m’lau lä ci gui. Ngami ah kyah cu Khanpughi ah gawk ci.

²⁴ Khanpughi naw ami ng’hlou ei cu ng’ya neta, Abraham, Isaak la Jakob ung ang thukhän cu shüm ba ci.

²⁵ Ani naw Israel gui khleihtein ah ami kyak cu hmu gui neta ngaih pe gui ci.