PHYAWN NAK 12 - Cho Bible Common Language 2016

Phyawn nak Pawi

¹ Bawipa naw Egypt khaw ah Moses la Aaron cu ng’thu püi goi ci;

² “Shin ah cha cu khokum ung nangmi ah hmawk ah ak htük bäih cha ah kyak khai nei.

³ Israel chang avan am shin ah m’cäi nak cu pe vä. Shin ah cha ah a hnüüp gha hnüüp ung, a chang sing naw amät ah kyong khui ah phäh ah htome hta, kä cung me hta cu a ghü vai.

⁴ Amät ah kyong naw chang ken u ne kä ami ei yawp ah a kyak ung amät la a pei ng’leng ah ka naw cun ah meh cu ami ng’pai vai. Chang ami khei ah ci ah, ami ng’küm ah ami chaw phäh phäh ami ei vai.

⁵ Nangmi naw htome hta baw, mehta baw nami ghü vai. Cun cu kum ät lüng ciah a hlahta, kä kheihlik en ciah kyak khai.

⁶ Cun ah cha ah a hnüüp gha lei phli hnüüp khaw kä a hmüp pha ung, Israel gui ami van naw htome gui cu ami ngawn vai.

⁷ Chang gui naw asi gui cu la u neta, acun ah sa ei nak im kawt pangli goi la im kawt khan gui cu ami hluk vai. Acun ah im cu a cun ah sa ei nak ah kyak ci.

⁸ Acu mü cun ah meh cu ng’shai neta, ankha la k’co kä shum ah m’htut awn meh ne ei vai.

⁹ Ak ching la hmin pawlat cicu kä ei vai. Alu, a khaw gui la akchi kyong, apum avan cu hmin khai ah ng’shai neta ei vai.

¹⁰ Khaw kä a thaih pha ah chuih a i phi kä nami nawng shüt vai, nami nawng shüt vai a om ung mei awn nami m’khih vai.

¹¹ Ang ghit ah meh cu nami ei vai, a i ah kyasei ci ung dung hteit ge khai ah mäih ah suisa u ne, nami khaw ung phahnak ng’cum ne, nami kut ung shopawng nami kawh vai. Shin cu kei Bawipa nami na m’taam nak phyawn nak pawi ah kyak ci.

¹² “Cun ah mü ung Egypt khaw avan yäu ne ka hteit khai, chang gui la seime gui ah hta htük gui phung ka ngawn khai. Egypt gui ah khanpughi gui avan ka m’kyuk khai. Kei cu Bawipa nei.

¹³ M’kawt ah khan ah si awn mek phung cu nangmi ah om nak ah im ah m’hnüt nak ah kyak ci nei. Kei naw si ka hmuh ah a kyak ung ka phlän tak khai, Egypt chang gui ka m’kyuk law gui ung kä ka ning nat sak gui khai.

¹⁴ Shin ah hnüüp cu yumnak ah pawi ah nami bi vai. Cun ah nami bi cu kei Bawipa naw ka bi gui, nami shüm ba nak ah nami bi ah kyak ci. Ngawi yä nami bi lä vai nei” cik ci.

K’Caw kä Shum ah M’htut awn Pawi

¹⁵ Bawipa naw, “Khaw hnüüp chih ung k’caw shum ah m’htut kä nami ei en vai, k’caw kä shum ah m’htut bäng nami ei vai. A hnüüp ät hnüüp nami im ungka k’caw avan nami ghawh vai. Cun ah hnüüp chih ah kyong ung chang tumat mat naw, k’caw shum ah m’htut a ei ah a kyak ung ani cu kei ah chang ah kä kya ba khai.

¹⁶ A hnüüp ät hnüüp la a hnüüp chih hnüüp ung kei awn ng’hmuh vai ah nami na khawihnah vai. Cun ah hnüüp gui ung a i phi kä nami bi vai, ei vai bäng nami pyan tham vai.

¹⁷ Shin ah pawi cu nami k’pan kheng vai, a i ah kyasei ci ung cun ah hnüüp ung na pakhui gui cu, Egypt khaw ungka ka k’plawk ba gui ci nei. Ngawi yä shin ah hnüüp ung pawi nami bi vai nei.

¹⁸ A cha ät nak a hnüüp gha lei phli hnüüp mühun ah tün ne, a hnüüp m’ku lei ät nak mühun ung khüt khai ah k’caw shum ah m’htut cu kä nami ei phung vai.

^19-20 Hnüüp chih ah kyong ung nami im kyong ah k’caw kä a om en vai, tumat mat ung a om ah a kyak ung, khaw mah ah a kyak ung phi, khaw hei chang ah a kyak ung phi, k’caw shum ah m’htut ei ci phung cu, kei ah ka chang ah kä kya tuba khai nei” cik ci.

A Htükbäih ah Phyawn nak Pawi

²¹ Moses naw Israel chang ng’vai gui ami van khü gui neta, “A chang sing naw htome hta baw, me hta baw ghü neta, nami ngawn vai, cun ung nami kyong chang naw phyawn nak pawi nami bik ciah kyak ci.

²² Hisop sing hnah pawk ät cu la ne, htome ah si ami hmoh ah khawk ung yuk hniim neta, nami im m’kawt la m’kawt khan gui cu si awn nami hluk vai. A ngawi ung khaw ngawi güt kä lut law ne nami om vai.

²³ Bawipa naw Egypt gui ngawn gui khai ah Egypt khaw ah a law ung, m’kawt ung la m’kawt khan ung nami hluk ah si cu ani naw hmuk khai, cun ung ani naw sih nak ah khanchang cu nami im ung kä luh law sak khai, kä ning ngawn gui khai.

²⁴ Nang la na hta nau gui naw shin ah thum cu ngawi yä nami läk vai.

²⁵ Bawipa naw a ning pek gui vai ah a shaitak ah khaw ung nami luh law ah a kyak ung shin ah bi cu nami bi vai.

²⁶ Nami hta nau gui naw, “Shin ah mawng bi cu a i ang?” cine ami ning shi law gui ung,

²⁷ Nami m’thein gui vai cu, “Shin cu Bawipa m’taam ne sonhnah nak ah phyawn nak pawi ah kyak ci, a i ah kyasei ci ung Bawipa naw Egypt khaw ah Israel gui ah im cu ak phyawn nak gui ah kyak ci. Ani naw Egypt chang gui cu ngawn gui ci, mikmi cu nak phyawn gui ci” cik ci. Israel chang gui naw m’khukdong ne khawihnah ci gui.

²⁸ Cun kawn ah ngami cu hteit ne, Bawipa naw Moses la Aaron am ang thumkhän cu bik ci gui.

Htahtük gui ah Sih nak

²⁹ Khaw cawih ding ah Bawipa naw Egypt khaw ah ami htahtük gui avan cu ngawn gui ci. Mang im ung ghangpughang ah hta ung tün ne, thawng im ung thawng kyum ah hta ung khüt ci la seime gui ah ami htahtük gui phi ngawn gui yawp ci.

³⁰ Cun ah mü ung ghangpughang, a bawi gui la Egypt chang gui ami van cu tho lawk ci gui. Egypt khaw avan ung m’lau ne kyap ci gui, a i ah kyasei ci ung a hta kä si tuk ciah im a u kä om ci.

³¹ A cun ah mü ung ghangpughang naw Moses la Aaron cu khü goi neta, “Hteit vä, nang la na Israel chang gui! Ka khaw hteh ta vä, nami k’thäh ah mäih ah hteit ne Bawipa cu khawihnah vä.

³² Nami htome gui, me gui la sei gui hteh püi ne hteit vä, kei phi taigü ne hrilham na pek vä” cik ci.

³³ Egypt gui naw Israel gui cu ang ghit ah ami khaw ungka ami hteh vai ah pyen u ne, “Nangmi kä nami hteh ung keimi kami si law yawp khai nei” cik ci gui.

³⁴ Cun ah kyasei chang gui naw, k’caw kä ami k’caw pha ah m’htut den cu la ne yih awn htun u neta ami k’phleing ung kawt ci gui.

³⁵ Israel gui naw Moses ah pyen ah mäih ah bi u ne, ghui, ngui pyülung la suisak gui cu Egypt chang gui ah k’thäh ci gui.

³⁶ Israel chang gui cu Egypt chang gui naw, chang m’sui gui u ne, ami k’thäh cu ami pek gui vai ah Bawipa naw bik ci. A cu cha ah Israel chang gui naw Egypt chang gui ah ami khawh cu hteh püi ci gui.

Israel gui naw Egypt khaw Hteh Tak ci gui

³⁷ Israel chang gui cu Ramese ungka naw Sukkoth hmun ung khüt sei ami khaw awn hteit ci gui. Ngami cu hnumi la a hmaw kä khei tu ung tämkäp phia chuk lawk ci gui.

³⁸ A chang akda gui phi htome, me la sei gui awn a täng ah hteit tuk ci gui.

³⁹ Egypt khaw ah ka ami law püi ah k’caw kä shum ah m’htut den cu ng’shai ci gui, a i ah kyasei ci ung ngami cu ang ghit ah Egypt khaw ungka ami k’täm gui ah kya ne, ami ei vai ami pawng püi nak vai, m’htut ami pyan nak vai ah akhin kä ami gah ah hmawk ah kyak ci.

⁴⁰ Israel gui cu Egypt khaw ah kum 430 ung om tuk ci gui.

⁴¹ Kum 430 ang pyi hnüüp ung Bawipa ah pakhui chang avan cu Egypt khaw ungka hteit ci gui.

⁴² Cun ah mü cu Bawipa naw ngäng gui ne, Egypt khaw ungka a lak nak gui ah kyak ci. Cu mü cu amü pum akhin avan ung Bawipa ung ng’ap nak ah kya ne, Israel gui naw ami ngäng nak ah mü ah kyak ci.

Phyawn nak Pawi ah Thungyo

⁴³ Bawipa naw Moses la Aaron am, “Shin gui cu phyawn nak pawi ah thungyo ah kyak ci: A khawhei chang naw phyawn nak ei cu kä a ei tu vai.

⁴⁴ Cun ung phi vun ah nak nami pek awn ah nami chang hleih läi naw ei tu sä.

⁴⁵ Chang omktu la chang ghüh naw kä ami ei tu vai.

⁴⁶ Ei avan cu ami shon cih nak ah im kyong ung ei vai, ak pung ah kä luh püi vai. Sei me ah guh cu api ah phi kä ci gep vai.

⁴⁷ Israel chang avan naw shin ah pawi cu a bi vai.

⁴⁸ Cun ung phi vun-ah nak kä bi phak ci naw, kä a ei tu vai. A khaw hei chang nami ng’lung ah om tu ne, Bawipa m’taam nak ah phyawn nak pawi a bi tu hlü ah a kyak ung ani ah im ungka pami avan cu vun-ah nak nami pek ma vai. Ani cu Israel chang khaw ng’lei mah ah mäih ah nami om püi ung shin ah pawi cu a bi tu vai.

⁴⁹ Israel chang khaw ng’lei mah la nami ng’lung ah om tuk ciah a khaw hei chang ung thungyo cu täng khai” cik ci.

⁵⁰ Israel chang gui ami van naw ngai u ne, Bawipa naw Moses la Aaron am thumkhän a pek goi ah mäih ah bik ci gui.

⁵¹ Cun ah hnüüp ung Bawipa naw, Israel pakhui gui cu Egypt khaw ungka k’plawk ba gui ci.