PHYAWN NAK 10 - Cho Bible Common Language 2016

Khanpeh

¹ Bawipa naw Moses am, “Hteit ne ghangpughang cu na hmuh vai. Kei naw ani la a bawi gui cu ka ling sak gui ci. Cun cu ami ng’lung ah cäi aih vai ka bi nak awn la

² kei naw cäi aih vai ka bi sang ung Egypt chang gui a i hlawk ah ka gu ang sak gui cu nami hta gui la nami tu gui am nami m’thein gui vai ah hmawk ah kyak ci. Nangmi nami van naw kei Bawipa ah ka kyak cu nami hmat khai nei” cine pyen nak ci.

³ Cun ah kyasei Moses la Aaron naw ghangpughang ah hteit ni neta ng’thu ani pyen cu, “Bawipa, Hebru gui ah Khanpughi ah ng’thu cu kei ah na ng’paa law nak vai cu a i güt na mak khai ang? Ka chang gui cu hteh sak gui ä, cun ung ngami naw na khawihnah khai gui nei.

⁴ Nang cu na maa laih laih ah a kyak ung ngawi ung na khaw ah khan ah khanpeh gui ka law püi khai nei.

⁵ Cun gui cu da aih u ne khomdek avan küm khai gui nei. Gääinu naw kä am di k’pawih ba ci avan ei yawp khai gui, k’pawih ba ciah sing ghing gui phi ei yawp khai gui.

⁶ Cun gui cu na mang im ung be khai gui, na bawi gui ah im gui la na chang gui ung be khai gui. Nami pupa gui ah hmuh tu man nü ung a shekha pikbäih ah kyak khai nei” cik ci. Cun kawn ah Moses cu ng’hlat ne hteit ba ci.

⁷ A bawi gui naw ghangpughang am, “Shin ah chang naw a i güt khüikha nak na pe gui khai ang? Israel chang gui hteh sak gui ä, cun ung ngami naw Bawipa ami Khanpughi cu khawihnah hning khai gui nei. Egypt khaw adi law cu kä na hmat ci ma?” cik ci gui.

⁸ Cun ah kyasei ghangpughang naw Moses la Aaron cu khü goi neta, ani naw, “Nangmi hteit ne Bawipa nami Khanpughi cu nami khawihnah vai. Cun ung phi akcang ah a u gui hteit khai ang?

⁹ Moses aw, “Keimi kami van kami hteit khai, kami hmaw gui la a ghi ng’vai gui mah ah kami hteit khai. Kami hta pami, hnumi gui, kami htaw gui, me gui la, sei gui kami hteh püi khai. A i ah kyasei ci ung a cu ah Bawipa m’taam nak pawi kami bik khai” cik ci.

¹⁰ Ghangpughang naw, “Kei naw Bawipa ung ka pyen cu nami hnumi gui la a hmaw gui cu kä ka ning hteh püi sak gui khai! Nangmi cu hnungtuk vai ah nami bik ci.

¹¹ Ka! Pami gui bäng hteit ne Bawipa cu nami khawihnah vai, cun cu nami ng’yak hlü ah kyak ci” ci neta, Moses la Aaron cu k’täm goi ci.

¹² Cun kawn ung Bawipa naw Moses am, “Egypt khaw ah khan avan ung na kut shäng ne khanpeh gui cu thäm gui ä. Ngami cu law ne phung ghing ci phung cu ei khai gui, gääi a book yah ung k’pawih ci phung cu ei khai gui.

¹³ Cun ah kyasei Moses naw a ng’shopawng shäng khäta, Bawipa naw ami khaw ah khan ah, mü lüng hnüüp lüng ne khaw khi law sak ci. Khaw ngawi ah kya law khäta khanpeh gui yong lawk ci gui.

¹⁴ Ngami cu ng’hläm ne yong law u ne, khaw avan ah khan ah ngok ci gui. Cun cu acau phi kä hmuh man, a ngawi ah phi kä hmuh ba vai ah akdäm pikbäih khanpeh bum ah kyak ci.

¹⁵ Ngami naw m’dek cu le law güt sei ngoh shi ci gui. Ngami naw gääi yah ung k’pawih ba ci la sing theih gui avan cu ei yawp ci gui. Egypt khaw avan ung sing ghing khu m’ghaw a hnah m’kim kä om ba ci.

¹⁶ Ghangpughang naw Moses la Aaron cu ang ghit ah khü goi neta, “Kei naw sheka ne Bawipa nami Khanpughi la nangmi cu ka ning hnungtuk püi gui ci nei.

¹⁷ Tuhbäi ka katnak cu na geinsei ne, shin ah kyih vai ah m’kyuk nak cu a thuuk ah a lak ba vai ah Bawipa nami Khanpughi ah taigü vä” cik ci.

¹⁸ Moses cu ghangpughang nawng shüt ne Bawipa ah taigü ci.

¹⁹ Bawipa naw a kiang khokhi cu chün ciah khei khokhi ah lat ne, khanpeh gui cu thawk ne yon ne, Suez tui ng’khep ah khüt ne yon gui ci. Egypt khaw ah khanpeh tumat phi kä om ba ci.

²⁰ Cun ung phi Bawipa naw ghangpughang cu ling sak sei, Israel gui cu kä hteh sak gui ci.

Hmüpnak

²¹ Cun kawn ah Bawipa naw Moses am, “Na kut cu khomik ah han shäng ä, shah aih ciah hmüpnak nu naw Egypt khaw avan cu küm khai nei” cik ci.

²² Moses naw a kut cu khomik ah han shäng sei, Egypt khaw avan ung hnüüp thum ung khaw mü ne hmüp ci.

²³ Egypt chang gui cu tumat la tumat kä ng’hmu tuba ci gui, Cun sang ung a u phi a im ungka kä lut lawk ci. Cun ung phi Israel gui ah om nak phung ung khaw cu dei ci.

²⁴ Ghangpughang naw Moses cu khü neta, “Nang cu hteit ne Bawipa cu na khawihnah vai, Nami hnumi gui la nami hmaw gui phi nang awn a täng ah hteit tu u sä. Cun ung phi nami htaw gui, me gui la nami sei gui cu a shi ah om u sä” cik ci.

²⁵ Moses naw, “Bawipa, Kami Khanpughi aw, kami khawihnah nak vai la m’khih ne kami pek nak vai ah kami sei me gui cu na na pek gui vai nei.

²⁶ Kami seime gui kami hteh püi gui khai, tumat phi kä kami nawng shüt khai nei. Keimi kami mät naw va, Bawipa kami Khanpughi kami khawihnah nak vai seime cu kami ghü khai” cik ci.

²⁷ Bawipa naw ghangpughang cu ling sak sei, ani naw kä hteh sak gui ci.

²⁸ Ani naw Moses am, “Kama ungka ng’düi law ne hteit ä, a pi ah phi kä ka ning hmu ba vai ah na om vai, ka ning hmuh ba hnüp na sik khai nei” cik ci.

²⁹ Moses naw, “Nang na hman ci, nang naw kei cu kä na na hmu ba khai nei” cik ci.