PHYAWN NAK 1 - Cho Bible Common Language 2016

Egypt Khaw ah Israel chang gui ami Shedam nak gui

¹ Jakob ah hta gui ami kyongkhui bäng bäng ah amät awn a täng ah Egypt khaw ah hteit ci gui cu

² Reuben, Simeon, Levi, Judah,

³ Iskhar, Zebulun, Benjamin,

⁴ Dan, Naphtali, Kad, la Asher.

⁵ Jakob ah hta ng’shon gui ami van cu chih kip lawk ci gui. A hta Joseph cu Egypt khaw ah ana om ci.

⁶ Cun ah khin ung Joseph la a phäi gui ni, ami hta gui ni cu si pyi ci gui.

⁷ Cun ung phi ami hta ng’shon gui Israel chang gui cu akda ah hta u sei, chang khli ah püi ne khüighat u ne, Egypt khaw ung be ci gui.

⁸ Cun kawn ah ghangpughang akthai Joseph ah a mawng kä hmat cicu huham mah lawk ci.

⁹ Ani naw a chang gui am, “Shin ah Israel gui cu khli law u ne, khüighat u ne, nak tääp law gui ci gui nei.

¹⁰ Ng’tuk nak a om law ung ngami cu mi ga gui ung ng’dawn tu u ne, na tu gui khai gui, cun kawn ah shin ah khaw ungka luat khai gui, Ngami ami da law ung phi mikmi naw mi shum nak gui vai mi shuui khai nei” cik ci gui.

¹¹ Cun ah kyasei ngami güt ne deng ne täk ah gui khai cu Egypt gui naw tha ci gui. Israel chang gui naw Pithom la Ramesi mang gaw cu co u ne, ghangpughang ah phäh ah ei khei m’cun nak vai ah pyang ci gui.

¹² Egypt chang gui naw shedam law na gui pi u sei phi Israel gui cu da law pi u ne ami khaw ung püi ci gui. Egypt gui naw Israel gui cu kyih law gui u neta,

^13-14 aktä ah shedam na gui ne, akshe ah khleihtein na gui ci gui. Ngami naw im cawh sak gui u ne, lai bi sak gui u ne, api ah phi kä yei na gui ci gui.

¹⁵ Cun kawn ah Egypt ghangpughang naw Hebru hnumi gui m’hta tu gui ciah Shiphrah la Puah sei sayama goi cu ng’thu püi goi ci.

¹⁶ Ani naw, “Hebru hnumi gui nami m’hta tu ah a kyak ung, pami ah ami hta ung nami ngawn vai, hnumi ah ami hta ung nami ghin sak vai” cik ci.

¹⁷ Sayama gui cu Khanpughi kyih aa ci gui ah kya ne, ghangpughang ah ng’thu cu kä ngai ci gui, pami hta gui cu ghin sak ci gui.

¹⁸ Ghangpughang naw sayama gui cu khü gui neta, “A i ah kyasei shikcha ah nami bi ang? A i ah kyasei pamihta gui cu nami ghin sak gui ang?” cik ci.

¹⁹ Ngami naw, “Hebru hnumi gui cu Egypt hnumi gui ah mäih ah kä kyak ci gui, ngami cu ayäi ah hta ci gui, keimi kä kami gawk pha ung hta pyi ci gui,” cine m’hlan ba ci gui.

^20-21 A i ah kyasei ci ung, sayama gui cu Khanpughi kyih ci gui, Khanpughi cu ngami ah phäh ah nik ci, ami mät ah kyongkhui vai pe gui ci. Israel gui cu da law pi u ne khüighat law pi ci gui.

²² Ak hnu ah ghangpughang naw a chang gui am, “Ng’thumkhän ne a pek gui cu, “Hebru chang gui ami hta ung pami phung cu, Nile tuinu ung nami shum vai, hnumi hta gui cu nami ghin sak gui vai” ciah kyak ci.