PHILIPPIAN 4 - Cho Bible Common Language 2016

M’shümthein Nak Gui

¹ Phäi nau gui aw, ang htei ah ning m’hni gui ne ka ning khaih na gui ci nei. Nang mi ah hmawk ah ang htei ah ka yeikyai ci nei. Kam hni ah phäi nau gui aw, Bawipa ung nami ghin nak khäng htek khai ah nami ng’düih vai nei.

² Euodia la Sintiche, nang ni cu Bawipa ung ng’pai nau goi ah kya ne, m’lung ngaih a kawng ät vai ah ka ning pyein na goi ci nei.

³ Ka ngaih u, ka ning paw nang naw, cun ah hnumi gui cu nam hteihtang tu gui vai nei. Ngah mi cu Thu Ni ng’shäu ne pyein nak ung kei awn a täng ah k’tha nah ne bilo ci gui ah kyak ci. Cun ah bi nak ung Clement la Khanpughi ah ghin nak ca-uk ung a ming om pyi ciah, a hei bilo tuk ciah chang gui phi om ci gui.

⁴ Nang mi cu Bawipa ung nami ghin nak awn yeikyai vä, ka pyein ba mä cu yeikyai vä!

⁵ Nami hniphnoi ng’awi ng’gi nak cu chang avan am hmuh sak vä. Bawipa a kyum law nak vai ng’et law pyi ci nei.

⁶ A i a mawng ama ung phi kä nami ng’ä ai vai, angtäi sei m’hlüngtai nak ah m’lung awn k’taigü u ne, nami ng’yak hlü gui cu Khanpughi ah nami ng’yoih vai.

⁷ Cun ah nami bi ung, hnicim chang naw ngaitüh ne kä k’phaa ah Khanpughi ah dimdeeih nak naw, Bawi Khrit Jesuh ung nami kawng ät nak awn, nami m’lung la nami ngaih avan cu ning m’htei gui khai nei.

⁸ Phäi nau gui aw, khüm nak ah ka pyein hlü cu, ni kyom nak, bäkhäk nak, cang nak, küika nak, ng’düng nak, theingcim nak, yumhni nak la m’tamkhah nak awn nami m’lung kyong cu be sak vä.

⁹ Kei ah ka ng’thu ung nami theithang la kei ah ka bilawh nami hmuhteng ah mäih ah nami bilawh vai nei. Cun ung dimdeeih nak na pe gui ciah Khanpughi cu nangmi awn a täng ah om khai nei.

M’cümhnah Nak Ah Hmawk Ah M’Hlüngtai Nak

¹⁰ Akhin shou hta khätah kei nami nam hteihtang nak cu nami m’dang law ba mä ah hmawk ah, Bawi Khrit ung ka ghin nak awn ang htei ah ka yeikyai ci nei. Cun cu nang mi naw kei nami nam hteihtang nak kä om ba ciah ah ka pyein ah kä kyak ci, cun ah nami nam hteihtang nak vai ah khin kä om te ciah ka pyein ah kyak ci.

¹¹ Kei nami na nawng düt ciah ngai ne shin ka pyein ah kä kyak ci nei, kei cu ka mät ung om ci awn, ka ng’büh vai ah ka thei pyi ciah kyak ci.

¹² Kei cu ka phü ung phi ka cawi ung phi, apihta a om ung phi, akdäm nu a om ung phi, a i a khin ung, a hawi ka om ung phi, a i ah mäih ah ka kyak ung phi, ng’büh thei ne ka om vai ah ka ng’thei pyi ci nei.

¹³ Bawipa Jesuh Khrit ah na peit ah k’thagui awn kei naw ang’tüi avan kam khüt hning ci nei.

¹⁴ Cun ung phi kei ka yaica yah ung nang mi naw nami nam htei cu ang htei ah bä ci nei.

¹⁵ Nang Philippian chang gui, Kei cu Macedonia kho ung pawng ne Thu Ni cu ng’shäu ne ka pyein law htük yah ung, nang mi ah Khrithabum tumat hta bäng naw nam hteihtang ci, nang mi bäng naw van shin ah bi ung, a ghawi law, abä law ung phi, kawng ät ne, nami na bi püi cu na mi mät naw nami hmat ci nei.

¹⁶ Thessalonika gawnu ung ka om yah ung kei ung hlü ci gui cu nang mi naw, hngü ät bäng ah kä kyak ciah nami nam khäh lawk ci nei.

¹⁷ Cun cu kei naw m’cümhnah ng’ya hlü ne ka pyein ah kä kyak ci, nang mi ah camhnüt ung a tang law pi vai ah ka pyein ah kyak ci.

¹⁸ Nang mi naw nami nam khäh law avan ka gah ah manwg cu shin ung kam dang ci nei. Cun gui cu kei ung hlü ciah mä däm pi ci nei! Nang mi ah m’cümhnah tu Epaphroditus ah law püi gui cu kei ung däm pui khai ah ka gah ci nei. Cun cu tuihlim ne ng’ui ciah Khanpughi bawihma nak la Khanpughi naw m’hni häihhäih ne a dou ah khawihnah nak ah mäih ah kyak ci nei.

¹⁹ Cun ah kya sei kei ah ka Khanpughi cu bühmang nak la bäkhäk nak awn kümbe ciah kya ne, nangmi am Bawi Khrit Jesuh awn, nami ng’yak hlü avan cu ning pe gui khai nei.

²⁰ Mi Pa Khanpughi ung abä khäk nak cu angtäi sei om sä! Amen.

A Yavaih Nak

²¹ Khanpughi ah chang gui ah kyak ciah Bawi Jesuh Khrit yum ci gui avan cu ka ning yavaih na gui ci nei. Kei awn a täng ah om ciah phäi nau gui naw phi ning yavaih gui ci gui nei.

²² Khanpughi ah chang gui ami van naw ning yavaih gui ci gui nei; Ghangpughang ah mang im kyong ah om ci gui ah Khritha gui naw ak tung pi ah ning yavaih na gui ci gui nei.

²³ Bawipa Jesuh Khrit ah m’geinsei nak cu nami van ah khan ah om sä.