PHILIPPIAN 2 - Cho Bible Common Language 2016

Bawi Khrit ah Ng’neim Nak La Hlüngtai Nak

¹ Bawi Khrit ung nami ghin nak naw ning khüighaat sak gui ne, ani ah m’hni nak naw nami m’lung ning üp sak gui ci. Nang mi cu Mumcha awn ng’geicam nak om ci; tumat la tumat chimgein nak la m’hteihtang nak tu phi om ci.

² Cun ah kya sei a täng ah nami ngaih-tüh nak, nami yum hni nak la nami m’lung ngaih a kawng ät nak awn, kei cu kümbe khai ah nami na yeikyai sak vai ah ka pyein hlük ci.

³ Khäghah nak hlü la mät ah ng’yak hlü shui nak awn a i phi kä nami bi vai, chang cu mät ah mä, bä tu ba ci, ciah ngaih tüh ne, nami m’lung nami ng’neim sak vai nei.

⁴ Nami mät ah hmawk bäng ah kä ng’ä ne, nami pawchang ah hmawk ah phi nami ng’ä vai nei.

⁵ Bawi Khrit ung om ciah m’lung ngaih cu nang mi ung phi om sä:

⁶ Ani cu angtäi sei Khanpughi nupuk nak ci, Cun ung phi Khanpughi ah mäih ah ka kyak khai ciah ling ne kä k’tha nak ci.

⁷ Cun ah a kyak nak vaisü ung amät ah bämang nak cu a bü ah nawng shüt ne, changshäm cu nupuk nak ci. Ani cu chang ah mäih ah law ne, ak hnicim chang nak cu m’dang ci.

⁸ Ani cu am lung neim sak ne kutlam tung ung asih nak ung khüt sei, Khanpughi ah ng’thu cu läk ci.

⁹ Shin ah a mawng ung Khanpughi naw Bawipa cu, thawh ba sak ne, Ak hlüng pi k’bäih ah Khankho hmun ung, ming thang ni ciah hlüngtai pi ciah, ming cu pek ci.

¹⁰ Cun ah kiasei khankho la khomdek ung om ci nüng ni, khomdek ah ka ah om ci nüng ni naw, Bawi Zesuh ah ming cu m’tamkhah u ne,

¹¹ M’khuukdoong ne bawihma u netah, Ak ghing om avan naw, “Zesuh Khrit cu Bawipa nei,” cine ng’shäu u ne, Pa Khanpughi ah bämang nak cu m’dang khai gui.

M’dek ah Khan ung Akdei ah Khang Nak

¹² Cun ah kya sei teihpüi gui aw, kei ka om yah ung ka ng’thu nakmi ngaih ah mäih ah, tuhbäi kei kä ka om yah ung ka ng’thu nami ngaih vai cu ak küikyang pi ah kyak ci. Nangmi naw hun nak ak be ah nami gah nak vai ah kyih aa nak awn nami bilawh vai,

¹³ A i ah kya sei ci ung Khanpughi naw ang yak hlü ah nami bi vai la ng’thu nami läk nak hning vai ah nang mi ung angtäi sei bi bik ci.

¹⁴ Nami bi vai om ci phung cu kä ng’sutsi kä ng’cuhcan ne nami bi vai nei.

¹⁵ Cun ung nangmi cu cheishoh ne katnak bik ci gui ah om nak ah khaw ung Khanpughi ah kümbe ciah hta gui ah kya ne, katnak kä om ne theingthap ciah chang gui ah nami kyak khai.

¹⁶ Nangmi naw angtäi ghin nak ah mawng ng’thu cu pyein u ne, cun ah chang gui ah ng’lung ah khomik ung aisi ah ng’shü ah mäih ah nami khang khai nei. Cun ah nami bi ah akyak ung kei naw k’tha na ne ka bilawh gui cu a kholä ah kä kya sei, Bawi Khrit a kyum law Hnüüp ung, nangmi ung kei ah khäghah nak vai cu om khai nei.

¹⁷ Nami yum nak awn Khanpughi am nami peit ah khawihnah nak ah khan ah, kei ah ka hnun si cu kam soi ah a kyak ung phi kei cu ka yei ci nei, nangmi phi ka ning yei sak gui ci nei.

¹⁸ Cun ah mäih ah nang mi phi nami yeikyai vai nei, nang mi awn atäng ah kei phi nami na yeikyai sak vai nei.

Timothi La Epaphroditus

¹⁹ Bawipa naw ang yak hlü a om ung kä shou pha sei, Timothi cu nangmi ah ka tüi lawk khai ah ka ngai ci nei. Cun ung kei naw nangmi ah mawng ng’ya ne k’thamah nak ka gah khai nei.

²⁰ Ani bäng cu kei awn kani m’lung ngaih kawng ät sei, nang mi ah hmawk ah bi bi hlük ciah chang ah kyak ci nei.

²¹ A hei chang gui läi cu ami mät ah hmawk bäng ngaih-tüh u ne Bawi Jesuh Khrit ah bi cu kä k’tha nak ci gui nei.

²² Nang mi naw Timothi ah hnün thawh la kei ni naw ng’pahta goi ah mäih ah Thu Ni ng’shäu ne kani bilawh cu nangmi naw nami hmat ci nei.

²³ Cun ah kya sei kei ah ka mawng cu a i ah kyak ciah ka hmat vai am, ani cu nang mi ah ka tüi lawk khai ka ngai ci nei.

²⁴ Kei ka mät cun phi kä shou pha sei nang mi ah ka law hning vai ah Bawipa ung ka ng’ap ci nei.

²⁵ Kei awn a täng ah kani bik ci, kei awn a täng ah ng’düi ne ng’khüi ci, kei nam hteihtang khai ah nami tüih law ah, mi nau Epaphroditus cun phi nang mi ah ka tüih law vai ah hlü ciah ka ngai ci nei.

²⁶ Ani naw nang mi cu ning khaih na gui ci, ani ah gawpai ah mawng nami ng’yak ah hmawk ah ani cu am lung kä ni ngai ngai ci nei.

²⁷ Ani cu akcang ah si ghepghep ne gawpai te ci nei. Cun ung phi ani cu Khanpughi naw m’htei ci nei, ani bäng ah kä kyak ci kei phi nam htei ci nei. Cun ah kya sei kei cu thüisei nak kä ka buitang ba ci.

²⁸ Cun ah kya sei nang mi naw ani cu hmu ba ne nami yeikyai nak vai la kei ah thüi sei nak gui ang kawn nak vai ah, kei naw ani cu nang mi ah ak yä ah ka tüi law hlük ci nei.

²⁹ Nangmi naw ani cu Bawipa ung phäinau ah yeikyai ne nami dou vai nei. Ani ah mäih ah chang phung cu nami chang m’sui vai nei.

³⁰ Ani naw Bawi Khrit ah khuut cu a sih awng ah k’tha nah ne bik ci nei. Cun cu nang mi naw kä nami peit hlawt ah bi cu kei am ana pei vai ah hmawk ah a bi ah kyak ci nei.