PHILIMON 1 - Cho Bible Common Language 2016

¹ Bawipa Jesuh Khrit ah hmawk ah thawng ung kium ciah kei Paul la mi nau Timothi naw — Kami teihpüi la a täng ah kami bilaw ciah Philimon ni,

² nang mi awn pum ci gui ah khrithabum ni, mi be Apphia la gakap mi teihpüi Archippus ni awn ca ka ning guk law gui ci nei.

³ Mi Pa Khanpughi la Bawipa Jesuh Khrit naw m’geinsei nak la dimdeeih nak cu ning pe gui sä.

Philimon ah M’hni nak la Yum nak

⁴ Phäihta Philimon, kak taigü päng ung nang ah ming ning pyein ne Khanpughi kam hlüngtai ci nei.

⁵ Khanpughi ah chang gui nam hni gui ah mawng la Bawipa Jesuh Khrit na yum ah mawng cu kang yak ci nei.

⁶ Kei ah taigü nak cu, yum ciah chang ah kya ne, nang awn mi kawngät nak naw, Bawi Khrit ung phi ghin nak awn a hrilham phung cu thuuk law pi sei mi hmat law pi vai ah kyak ci.

⁷ Kam hni ah phäihta, nam hni nak naw kei cu ang htei ah na yeikyai sak ne, nak thamah sak ci nei. Khanpughi ah chang gui phung cu phi ami m’lung na thawh sak gui ci nei.

Omnesimus ah Hmawk ah Ang paa nak

⁸ Shin ah a mawng ung Bawi Khrit ung na phäi ah kyak ciah kei naw, na bilawh gui vai mawng cu khän ne ka ning bi sak hning ci nei.

⁹ Cun pang ung phi Bawi Khrit ah ng’shä tüih, ani ah hmawk ah thawng ung ka kium ciah kei Paul naw ka ning m’hni nak ung ng’paa nak awn ka pyein ci nei.

¹⁰ Cun ah kyasei Bawi Chrit ung ka hta ah kyak ciah Onesimus ah hmawk ah kei naw ka ning pa nak ci a i ah kyasei ci ung, thawng ka kium nak ah kei cu, mümcha lam ung ani ah pa ah ka kyak lawk ci.

¹¹ A yan läi nang ah phäh cu a i ah kä mawng mei mante ci, tuhbäi nang la kei ah hmawk ah mawngmei lawk ci nei.

¹² Kei naw ani cu nang ah ka tüi law ba ci, ani naw kei ah m’lung ngaih cu law püi ci nei.

¹³ Thuni ah hmawk ah thawng ung ka kium yah ung, nang ah hnün ung om ne nam htei khai ah, ani cu ka om sak hlü te ci nei.

¹⁴ Cun ung phi kei naw nang ning hnem ne, nak püi vai ah kä ka ng’ya hlük ci, na mät naw nam hni ah na bilawh vai ah ka yum ci. Cun ah kyasei nang naw kä na yum tu cu kei naw api phi kä ka bik khai.

¹⁵ Onesimus naw nang cu a shäng hta a ning pai püi ah kyak ci, cun ah kyasei nang naw ani cu khü ba ne angtäi sei na om püi vai nei.

¹⁶ Tuhbäi ani cu changshäm düt ah kä kya ba ci, changshäm ah mä taai ba pi ne, Bawi Khrit ung phäi nau ah kya lawk ci nei. Chang shäm ah a kyak nak la Bawipa ung kam hni ah phäi nau ah a kyak nak awn kei ah hmawk ah ang htei ah bäi ci. Nang ah hmawk ah cun ah tah bä pi khai nei.

¹⁷ Cun ah kyasei kei cu na na püipaw ah na na ngaih ung kei na na dou ah mäih ah ani cu na dou vai nei.

¹⁸ Ani naw nang ah khan ah katnak abi ung phi bäi, a ning puhnih nak ung phi bäi, a om ah a kyak ung kei naw ka ning thung khai nei.

¹⁹ Shin ung kei ka mät naw ka kut awn ka guk ci nei, cun cu “Kei Paul ka mät naw ka ning thung khai nei.” (Nang naw kei ah khan ah na puhnih om ci cu, kei naw ka pyein vai ah kä hlü ciah na hmat ci.)

²⁰ Cun ah kyasei phäihta aw, Bawipa ah hmawk ah na bä nak awn cun ah na bi vai nei, Bawi Khrit ung phäi nau ah na kyak nak awn kei cu na thawlet sakä.

²¹ Shin ah ca ung ka guk ah mäih ah nang naw na bik khai ci lacun ah däm pi püi sei na bik khai ci cu, kei naw akcang ah ka hmat ci nei.

²² Cun kawn ah ka om nak vai na na shui peit vai nei. Khanpughi naw nangmi ah taigü nak cu ngai ne, kei cu nangmi ah om nak ah na law ba sak khai ah ka ngaih u ci nei.

Akhnu ah Yavaih ne Ang Thu nak

²³ Bawi Khrit Jesuh ah hmawk ah kei awn a täng ah thawng ung kium ciah Epaphras naw, yeikyai ne yavaih nak ning m’shäk law gui ci nei.

²⁴ Kei naw a täng ah kami bi ghawm ciah Makuh, Aristakas, Demas la Luka gui naw phi acun ah yeikyai ne yavaih nak pyein ci gui nei.

²⁵ Bawipa Jesuh Khrit ah m’geinsei nak cu nami van ah khan ah om sä.