OBADIAH 1 - Cho Bible Common Language 2016

¹ Shin cu Obadiah ah ng’cäbang — Edom pakhui ah mawng, Uktu Bawipa ah ng’thu pyen ah kyak ci. Bawipa naw ang shächang cu pakhui nü ah tüi ci, cun kawn ah ang thu cu kami ng’ya pyi ci: “Pawng vä! Edom tuk vai ah mi hteit kaw!”

Bawipa naw Edom M’kyuk khai

² Bawipa naw Edom cu pyen nak ci, “Nang na k’tha ken khai ah ka ning cik khai, chang nü naw ning päipih khai.

³ Na khähghah naw ning m’hleei ci, Na mang gaw cu kheng lung ah m’liu ci; Na im cu khomhtung pha ne hlüng ci, cun ah kyasei na mät ng’htau ne, ‘A u naw kä na buh tawn hlawt khai ang?’ na cik ci.

⁴ Na im cu hmu kiung ah ng’bu ah mäih ah hlüng khai ah na cawh ung phi, cun naw aisi gui a han pha ung phi, kei naw ka ning buh tawn khai nei.

⁵ “Khomü ah m’guk ei gui ami law ung ami ng’yak hlü bäng hteh püi ci gui. Chang gui naw sing theih ami k’bih law ung api k’pawih na kheng geng ci gui. Cun ung phi nami ga naw akbe ah ning tu gui ci nei.

⁶ Esau ah hta ng’shon gui, nami khawh ning gut gui ci gui nei.

⁷ Nami ng’khawt püi gui naw ning m’hleei gui ci gui, Ngami naw nami khaw ungka ning k’täm gui ci gui, Ning dimdeeih püi gui ciah chang gui naw tuhbäi ning näng gui ci gui. Atäng ah nami ei awk ciah nami teihpüi gui naw nami awh nak vai cuun cuung ci gui. Ngami naw ning pyen na gui ci gui, ‘Ani ah lunglang nak cu a hawi ang?’ cik ci gui.

⁸ “Kei naw Edom ka m’kyuk hnüüp ung, Lunglang ciah ami chang gui cu m’di gui ne, ami cüivai nak avan cu ka m’shet khai.

⁹ Teman ng’tuk bi gui ng’thüng khai gui, Edom khaw ung gakap phung ngawn yawp vai nei.

Edom M’kyuk nak ah Mawng

¹⁰ “Nang naw Jakob ah hta ng’shon, na mätyah hniim ne na ngawn ah hmawk ah ngawi yä nang cu ning m’di ne kä ning chang m’sui ba khai.

¹¹ Ga gui naw m’kawt gui tu ne ami gäi hnüüp nang cu ang leng ah na ng’düi khai. Jerusalem ah khawh phui u ne ami mät naw ng’pai ci gui ah lam hteit chang gui ah mäih ah nang phi na shekhak ci.

¹² Judah khaw ah na mätyah gui ah ng’yoyaw nak cu kä na teng hlü vai. Ngami ah di nak ah hnüüp ung nang cu kä na yeikyai vai. Ngami ah cümbawng ah phäh ah kä na gaih vai.

¹³ Kei ah ka mang gaw ung kä na luh vai, ami geinvai nak kä na khih nak gui vai, ami leibei mah hnüüp ung ami bühmang man kä nami süsawng vai.

¹⁴ Phyawng khai ah k’thanak ciah chang cu lam ung mah ne kä nami pha vai. Ami geinvai hnüüp ung ngami cu ga gui am kä nami ap gui vai,

Chang Pakhui gui M’khoichak khai

¹⁵ “Kei, Bawipa naw pakhui avan ka m’khoicha nak vai ah a khin cu ng’et lawk ci nei. Edom, na bi gui phung cu nang ah khan ah bi ba vai nei. Na pek ah mäih ah na gah ba khai nei.

¹⁶ Ka chang gui naw m’kyuk nak ah khap a kha cu theingthap ciah ka khomhtung khan ah awk ci gui nei. Cun ung phi a peileng ah pakhui gui avan naw cun ah kha pi ciah m’kyuk nak ah khap cu awk khai gui nei. Cun gui avan cu aw yawp u neta akholä ah kyak khai gui nei.

Israel ah Näng nak

¹⁷ “Cun ung phi Zion m’htung ah am shah gui phyawng khai gui, cun cu theingcim ciah hmun ah kyak khai. Jakob ah chang gui naw ami gah vai ah khaw cu khäm khai gui.

¹⁸ Jakob la Joseph ah chang gui cu mei ah mäih ah kya u ne, Esau ah chang gui cu mei ah uih ah mäih ah m’di khai gui. Esau ah hta ng’shon a u kä pawih khai. Kei, Bawipa naw ka pyen nei.

¹⁹ “Judah a htum täng ah chang gui naw Edom cu khäm khai gui; akhei lam m’htung nawi ungka gui naw Philistia cu khäm khai gui. Ephraim la Samaria khopäng gui cu Israel gui naw kaa nak khai gui. Benjamin chang gui naw Kilead khaw cu lak khai gui.

²⁰ Israel asiip täng ah ka omtu gakap gui cu, law ba u ne, Phoenicia khaw cu Zerephat ung khüt sei khäm khai gui. Sardis ah om ci gui ah Jerusalem ah ka omtu gui ne, Judah a htum täng ah gawnu gui cu khäm khai gui.

²¹ Jerusalem ung chang m’gäi gui naw, Edom cu tu ne näng ne uk khai gui. Bawipa amät cu Ghangpughang ah kyak khai.”