NG'THU K'THUUK~ 9 - Cho Bible Common Language 2016

Cüivai nak la gu-ang nak

¹ Cüivai nak naw a im co ne k’tung chih ng’ling ci.

² Ani naw pawi nak vai ah seime ngawn ne, sapyit tui pyang k’caw ne pyang ne, tawnglang m’düih ci.

³ Ani naw pigaw ng’lung ah a hlüng nak pi ung ng’khü khai gui ah hnumi hta gui cu tüi gui ci.

⁴ “Law tu vä, a i kä hmat ciah chang gui! Ani naw chang gu-ang cu pyen nak ci.

⁵ Aw ä, ka ei ei ä, ka pyan ah sapyit tui cu aw ä.

⁶ A i kä hmuhmat ciah chang gui cu nawng gui ne ghing ä. Hmuhmat nak cu läk ä.”

⁷ A u a i ah ka hmu tuk ciah chang m’cäi m’ä tuk cicu thui ng’a nak gah ci. Chang shekha m’cäi m’ä tui ciah chang cu shedam nak gah ci.

⁸ A u a i ah kä hum tuk ciah chang cu kä nami m’cäi tu vai. Ani naw ning thüi nak gui khai. Cun ung phi cüivai ciah chang nami m’cäi m’ä tu ung ani naw ning chang m’sui gui khai.

⁹ Cüivai ciah chang na ng’thu püi ung, cüivai law pi khai. Düng ciah chang na m’thein m’kan ung ani cu hmuhmat law pi khai.

¹⁰ Khanpughi kyioh aa nak cu cüivai nak ah a phung ang yung ah kyak ci. Atheingcim Bawipa hmat nak cu hmuhmat nak thei ah kyak ci.

¹¹ Cüivainak naw na ghin nak ah khokum ng’shäi sak khai.

¹² Nang ung cüivai nak a om ah a kyak ung nang cu na lawn khai. Cüivai nak na hnungtuk püi ah a kyak ung nang cu na khüikha khai.

¹³ Ang-lam cicu ng’hawh ne, a u a i ah kä hmu tu ne, kä thui ng’aa ciah hnumi awn täng ci.

¹⁴ Ani cu a im m’kawt ung, käcung, pigaw ah a hlüng nak pi ung ngo neta,

¹⁵ Ami mät ah bi phäh phäh ngaih-tüh ne, hteit hton ci gui cu khü gui ci.

¹⁶ “Lut law vä! A i kä hmat ciah chang gui!” Ani naw chang gu-ang am,

¹⁷ “M’guk ah tui cu tuui ci, m’guk ah ei cu hlim pi ci” ci nak ci.

¹⁸ Ani ah chang gui naw a im ung lut ciah chang gui ami sih la lut pyi ciah chang gui tuhbäi akthuuk pikbäih sih nak ah kho ung ami om cu kä hmat ci gui.