NG'THU K'THUUK~ 8 - Cho Bible Common Language 2016

Cüivai m’taam nak

¹ Ngai vä! Cüivai nak cu ng’khü ci nei. Hmuhmat nak cu k’aw mah ne m’lau ci nei.

² Lam pei ah m’htung tai la lam kaan ne ani cu ng’düi ci nei.

³ Mang gaw luh nak la m’kat ah pei ung, ani ng’khü ci.

⁴ Kei naw nami van ka ning ng’pa na gui ci, khomdek khanchang nü ka khü ci.

⁵ Kä nami ng’langkha ne ma? Nami ng’langkha vai ah ng’thei vä. Nami gu-ang ne ma? Nami ng’lang vai ah ng’thei vä.

⁶ Bä pikbäih ciah ka ng’thu cu ngai vä, Ka ning m’thein gui avan cu hman ci nei.

⁷ Kei ah ka pyen phung cu ng’düng ci nei. Hleeihlak cu kei naw ka thüi nak ci.

⁸ Kei ah ka pyen päng cu düng ci, Thuvi nak la lam hma nak kä om ci.

⁹ Cun gui ah kyong ung cun gui avan cu hteicha ci. Akbä ah pyensak avan cu ng’kheing ci.

¹⁰ Ngui ah ta kei ah m’shüm thein nak cu nami ghü vai. Ghui akni ah ta kei ah hmuhmat nak cu nami ghü vai.

¹¹ “Kei cu cüivai nak ah ka kyak ci, pyülung ah ta ka bä pi ci; nami ng’yak hlü ungka kei nami na m’tumtäng nak vai a i kä om ci.

¹² Kei cu cüivai nak ah ka kyak ci, kei ung m’lungshüm nak om ci. Kei ung hmuhmat nak la hnip ciah m’khoichaa nak om ci.

¹³ Bawipa m’taam nak cu akshe thüi nak ah kyak ci. Kei naw chang ah ng’shei nak, m’gämce nak, akshe ah om nak la ak she ah ng’thu cu ka thüi nak ci.

¹⁴ Kei naw ng’bü nak pyang ne a cun cu ka bik ci. Kei ung hmuhmat nak om ci, kei ka khüighat ci.

¹⁵ Ghangpughang gui naw ami uk vai, Uktu gui naw thukhän akni ami pyan vai ah kei naw ka m’htei gui ci.

¹⁶ M’dek khan ung uktu phung naw kei ah m’htei nak awn uk ci. Bawi gui mang gui naw phi acun ah uk ci gui.

¹⁷ Na m’hni cicu ka m’hni ci: Na shui ci phung naw na hmuk khai.

¹⁸ Kei ung büh mang nak la m’tamkhah nak, bä nak la näng nak ka pek vai om ci.

¹⁹ Kei ah nami gah cu ghui akni ah ta bä pi ci; ngui akcüm ah ta ni pi ci.

²⁰ Kei cu düng ciah lam ung ka hteit ci; taga ciah lam ka läk ci.

²¹ Kei na m’hni ci am bämang nak ka pek ci; ami im cu m’käm khawh awn ka be sak ci.

²² “Bawipa naw avan ungka kei cu na tüi htük ci; cau pui, ani ah bi htük ah kyak ci.

²³ Kei cu a tün law nak ah ana pyan ah kyak ci; akhtükbäih ung khaw kä a om pha ung.

²⁴ Kei cu tuinu gui kä a om pha ung ka ng’tüi ci. Cun yah ung tuihta gui phi kä om phak ci.

²⁵ Kei cu khomhtung gui kä a om pha ung ka ng’tüi ci; Khogui gui a hmun ung kä a om pha ung ah kyak ci.

²⁶ Khanpughi naw khomdek la lolai gui M’dek khui shum ät phi kä a om pha ung ah kyak ci.

²⁷ Khomik a hmun ung atha yah ung kei cu acu ah ka om ci. Tuinu kaan khai ah kho ng’mui kä a k’phyat pha ung,

²⁸ khomik ung khong’mei gui kä a tha pha ung, Tuinu ungka tuihta m’kawt gui kä a hmawn pha ung,

²⁹ Tuinu ung tui gui naw ani ah pyen nak phlän ne kä ami k’plüm vai ah phäh ah kyak ci.

³⁰ Kei cu a hta m’shum ah mäih ah a pei ah ka om ci, Kei cu, ani ah a hnüüp tä ayei nak ah ang yung ah ka kyak ci, ani ah ma ah ak’phlüt sei ka yeikyai ci.

³¹ Khomdek khan awn ka yeikyai ci, hnicim chang awn ka lünlawi ci.

³² “Tuhbäi, chang nong gui, na ngai vä. Ka pyen ah na bi vai, cun ung na yeikyai khai.

³³ Ning m’theithang cu na ngaih vai. Na cüivai vai, kä na nawng en düt vai.

³⁴ Kei na ngai ciah chang cu — A hnüüp tä ka m’kawt pei ah ng’düi ne, ka im kawt ung lut khai ah ngäng ciah chang cu yeikyai nak om khai.

³⁵ Kei na hmuk ciah chang cu ghin nak hmuk ci. Bawipa cu ngami awn lünlawi khai.

³⁶ Kei kä na hmuk ciah chang cu a mät plah taam ciah kyak ci. Kei na thüi nak ciah chang cu sih nak m’hni ciah kyak ci.”