NG'THU K'THUUK~ 7 - Cho Bible Common Language 2016

¹ Ka hta, ka pyen ah ng’thu cu na shüm vai, na bi vai ah ka ning m’thein cu kä na m’hnih phung vai.

² Ka pyen ah na bi vai, nang cu na ghing khai, na mik na m’htei ah mäih ah kei ah m’theithang nak na läk vai cu na geing nak vai.

³ Ka m’theithang cu akphlüt ah na shüm vai, na m’lung ung na guk vai.

⁴ Cüivai nak cu na be ah mäih ah na om püi vai, na teihpüi ah mäih ah na m’lung ung na chum vai.

⁵ Cun gui naw chang ah chu la hlim khai ah ng’thu ciah hnumi ung ning shawng sak khai.

Lawklak Ciah Hnumi

⁶ Hnü ät ung kei cu ka im kawt ung yu mang neta,

⁷ a i kä bui awt man ciah chang nong akda ka hmuk ci. Cun ung changshe kha tumat om tuk ci.

⁸ Ani cu lam k’täi ung law ne, cun ah mäih hnumi ah om nak m’kawt pei ah gawk lawk ci.

⁹ Khaw mühun ne hmüp lawk ci.

¹⁰ Cun ung hnumi naw ani cu hmuk ci, cun ah hnumi naw hlawhhlaang ciah mäih ah sui awi ne, ng’bü ge ci.

¹¹ Ani cu shanlap aih ne kä lü ng’aa ci. Lam ung angtäi sei hteit shüi shüi ci.

¹² Kä cun ung cawk kem ung, lam ng’lung ung, sumlei hmun ung ng’düi ne ngäng ci.

¹³ Ani naw cun ah pami hta cu pha ne a kut awn ven ne kyawp ne, ng’ui ne amik awn kheing ne teng neta,

¹⁴ “Kei naw tuh ngawi pektak nak ka bi pyi ci, khawihnah nak ah meh phi om ci,

¹⁵ cun ah kyasei nang ning shui vai ah ka lawk ci, kei naw nang ka ning hmu hlü te ci. Shin ung na om ci.

¹⁶ Kei naw ka ih phak ung Egypt ah ka cüiche ah yih ka phah c i.

¹⁷ Muran, aloes la cinnamon tui ng’ui gui awn ka k’peh ci.

¹⁸ Law ä, mü lüng ne ning yum hni tu kaw, Tumat la tumat ban ung ng’khum tu ne ni yeikyai khai nei.

¹⁹ Ka cei im ah kä om ci nei. Ani cu a shou nak ah hteit ci nei.

²⁰ Ani ngui akda k’bah ne hteit ci, hnüüp gha lei phli ah kyong ung kä law ba khai” cik ci.

²¹ Ani naw aktü phlawh nak awn tüihtok khäta, pami cu ng’awi sei ng’thu ciah hnumi ung lut ci.

²² Ani naw ang ghit ah hnumi cu läk ne, seipat cu asih nak vai ah a hteh ah mäih ah, kigang cu m’hliing ung awk sei,

²³ m’la naw am lung aken ah mäih ah, kha cu ng’vai ung awk khai ah a hteh ah mäih ah, a ghin nak sih nak ung a luh cu ani naw kä hmat ci.

²⁴ Tuhbäi ka hta na ngai ä, a i ka pyen cu na geing nak vai.

²⁵ Cun ah mäih hnumi am na m’lung kä na näng en sak vai. Ani ah hnu ah ng’vak shüi ne kä na läk vai.

²⁶ Ani cu chang akda ah di nak, kä khei tai vai ah sih nak ah kyak ci.

²⁷ Ani ah im ah na hteh tu ung, nang cu sih nak ah khaw ah na hteit ciah kyak ci. Cun cu sih nak yät ah kyak ci.