NG'THU K'THUUK~ 6 - Cho Bible Common Language 2016

Khäntam Nak Pikhteh

¹ Ka hta, chang tumat ah puu ah phäh ah maa na ne shai na tak om ne ang?

² Cun ung nang cu na mät ah ng’thu naw a ning pha, na mät ah shaitak ung na awk ciah kyak ci.

³ Cun ung, ka hta, nang cu cun ah chang ah huham ung na lut ciah kyak ci. A cun ungka ng’pät nak ba vai cu, ang ghit ah hteit ne a ning chah ba vai ah na ng’paa nak vai.

⁴ Na mät hteit ne kä na ih düt vai, kä na ng’düm düt vai.

⁵ Sakap ah cuun ungka luat ciah kha ah mäih ah, kigang ah mäih ah cun ah cuun ung na luat khai.

⁶ Chang dam, m’ling ah hteit ne, ghin nak ah mawng na ng’thei vai,

⁷ ngami ung bawi, mang, uktu kä om ci.

⁸ Cun ung phi ngami naw khaw cha yah ung khaw htui ah ami ei vai m’sep ci gui.

⁹ Chang dam, a i güt ih phak ung na ng’yän khai ang? a i khä ta na thou lawk khai ang?

¹⁰ A shäng ka ng’düm khai, ka kut kep ne a shäng hta ka ng’düm khai, na cik ci.

¹¹ Cun ung phi na ih yah ung ghawi pai nak naw m’guk ei ah kut ah mäih ah ning k’pang khai nei.

¹² Akholä ah changshe kha gui cu ami hleei pyen ne ng’thu aih ci gui nei.

¹³ Ami mik m’chip ne, ami kut khaw tum ne, ning m’hleei ci gui nei.

¹⁴ Kä ng’düng ciah m’lung awn akshe avan pawng püi ci gui. Khaw hmun päng ung ng’tuk nak thawh let sak ci gui.

¹⁵ A cun ah phäh ah kä ngaih ah hungsai naw m’di gui sei, ciin ne ng’pyi khai gui.

^16-19 Bawipa naw a thüi nak, kä am hni gui mawng chih om ci, cun gui ci: yawshe na ne teng, hleei ciah m’lei, changningawn ciah kut, akshe ngaih-tüh ciah m’lung, akshe bi avai ah yangkhai ciah khaw, hleei pyen ne saksi nak la teihpüi gui ng’tuk vook sak ciah chang ah kyak ci.

Pawmyau nak khäntam nak

²⁰ Ka hta, napa ah ning m’thein cu na bi vai, na nu ah ning m’cäi cu kä na m’hnih phung vai.

²¹ Ami ng’thu cu angtäi sei shüm ne na m’lung ung na küm vai.

²² Ngami ah m’theithang naw na hteh nak lam ning m’shüm khai, mü ah ning ngäng khai, hnüüp ah ning m’cäi khai.

²³ Ngami ah m’shüm thein nak cu ng’shü ne dei ci: ami m’shung m’düng nak naw a i cha ah ghin vai cu ning m’thei ci.

²⁴ A cun naw hnumi she la ang thu hlim ciah chang ah chu awn ning shawng sak khai.

²⁵ Ngami ah kyom nak naw kä ning tüihtok en gui sä, phüvüih ciah ami mik naw kä ning pha en gui sä.

²⁶ Chang tumat naw hlawhlaang ciah hnumi cu m’htut pum ät ah phu awn gah khai. Cun ung phi pawmyau ciah hnumi naw a khawh avan pyi pek khai.

²⁷ Na sui kä ui khai ah na ng’kyaang ung meikdäi na kep hning khai aw?

²⁸ Na khaw kä ning ui khai ah meicak ung kai ne na hteit hning khai aw?

²⁹ Chang hei ah chu ih püi vai cu a cun ah mäih ah kyih vai ah kyak ci nei. Acun bik ci phung cu khüikha nak gah khai nei.

³⁰ Chang gui aw, ei ah cawi ne ei vai m’guk cicu kä nami päipih vai.

³¹ Cun ung phi nami pha ah a kyak ung am guuk ah ak chih ah am thung vai — ani ung om ciah a khawh phung ang lawh vai.

³² Chang ah chu kat püi cicu a i kä hmat ciah kyak ci. Amät naw amät m’di ciah kyak ci.

³³ Ani cu shedam nak la m’neh nak gah khai, ani cu angtäi sei kä yeikyai khai.

³⁴ Acei cu am thüikhang ah ta däm pi sei m’lungshe ci. Ani ah chu m’sou nak cu kä ng’pyi hlawt ci.

³⁵ Ani naw a i ami pek ung phi kä dou khai. A i chü m’cümhnah ung phi am lung kä pyei hlawt khai.