NG'THU K'THUUK~ 5 - Cho Bible Common Language 2016

Pawmyau Shedam Nak

¹ Ka hta, na ngaih nak vai, ka cüivai nak la ka m’lungshum nak cu na ngaih vai,

² Cun ung nang naw a i hawkcha kümbe vai cu na hmat khai. Na ng’thu gui naw nang ung hmu hmat nak om ciah dang sak khai.

³ Chang ahei ah chu ah am nei cu khoitui ah mäih ah tui khai. Ang ui cu oliv-situi ah mäih ah hnip khai.

⁴ Cun ung phi ani a hteh ba ung akha liit ta m’neh nak ning nawng pe shüt khai.

⁵ Ani naw sih nak ah khaw ung ning yuk kyak khai, ani ah hteh nak lam cu sih nak lam ah kyak ci.

⁶ Ani cu ghin nak lam ung kä ng’düm ci, ng’vaak shüi shüi ne a i ah kya lawk khai cicu kä hmat ci.

⁷ Tuhbäi na ngai vä ka hta gui aw, kei naw ka pyen cu kä nami m’hnih phung vai nei.

⁸ Acun ah mäih ah hnumi cu na hteh tak vai nei.

⁹ Cun ah na bi ung nang ung om man ciah chang m’sui nak cu ahei gui naw lak khai gui, na chang nong sang ung am gein kaa gui ah kut ung na sik khai,

¹⁰ ä, chang lam hteit gui naw na khawh avan lak khai gui, na bi phung cu chang ahei naw kaa nak khai.

¹¹ Sih nak ah na ih phak ung kä thou ne na ng’yän khai, na m’cisa la nak thang cu ning ei yawp khai,

¹² Cun ung nang naw “A i ah kyasei kei kä ka theithang ang? A i ah kyasei chang ah na m’düng nak kä ka dou ang?

¹³ Ka saya gui phi kä ka ngai gui ci, A i ah kä ka sui gui ci.

¹⁴ Cun kawn ah chang hli ah ng’lung ah ka thüi cu, ang ghit ah ka mät naw ka mät ka hmuk ci” cine na kyak nak khai nei.

¹⁵ Na chu ah khan ah na bekhüt vai, na chu bäng na m’hni vai.

¹⁶ A hnumi hei awn na hta nak ah a hmaw gui naw kä akni ah ning om nak khai gui.

¹⁷ Na hta gui naw däm ng’vai u ne ning m’htei khai gui, ahei naw kä ning m’htei khai.

¹⁸ Cun ah kyasei nak chu awn na yei vai, hnumi hta na ng’khap püi cu na yei nak vai,

¹⁹ Ani cu kyom ne bä ciah kigang ah mäih ah kyak ci. Ani ah suuk naw ning tuihlim sak khai. Ani ah m’hni nak naw a ning koi vai.

²⁰ Ka hta, a i ah kyasei na m’hni nak cu ahei hnumi am na pek vai ang? A i ah kyasei chang hei ah chu ah suuk cu na yap tu vai ang?

²¹ Bawipa naw na bi phung cu hmuk ci nei, na hteh nak päng ah ning ngäng ci nei.

²² Changshe ah katnak cu m’hling bang ah kyak ci. Ani cu a mät ah katnak ah ng’vaai ung amät awk ba ci,

²³ Ani cu amät naw amät kä pang hlawt ne sik ci. Kä a k’üüp hlawt ah a cheishoh nak naw ang ciim hmun ah hteh püi khai.