NG'THU K'THUUK~ 4 - Cho Bible Common Language 2016Cüivai nak ah a ng’ lawn 1 Ka hta gui, nami pa ah ning m’thein gui cu nami ngaih vai, nami ngaih nak vai, cun ung nangmi ung hmuhmat nak om khai. 2 Kei ah ka ning m’theithang gui gui cu akni ah kyak ci, avan nami shüm vai. 3 Ka nupa ah hta tumat kei ka hmaw hta yah ung, 4 kapa naw na m’theithang ci, ani naw pyen ci, “Ka ng’thu cu na shüm vai, kä na m’hnih phung vai, ka pyen ah mäih ah na bi vai, cun ung na ghing khai.” 5 Cüvai nak gah vai ah na m’lung ung na tha vai, ka pyen cu kä na m’hnih vai kä na nawng en vai. 6 Cüvai nak cu kä na ng’leng tak en vai, acun naw ning m’htei khai, kä na m’hnih vai ani naw ning phyawn khai. 7 Cüivai nak gah cu aküikyang pi nang ah bi vai ah kyak ci, na gah phung cu na m’lung kyong ung na tha vai. 8 Cüivai nak cu na m’hni vai ah cun naw ning dämduh sak khai. Ani cu nakpan khek vai, acun naw ning tamkhah khai. 9 Ani cu nang ah bämang lukhu ah kyak khai. 10 Ka hta, na ngai ä, ka ning m’thein ah ng’thu cu ak thuuk ah na dou va, cun ung akshou na ghing khai. 11 Kei naw cüivai nak la dang ciah ghin nak cu ka ning m’theithang ci. 12 Cüivai ne na hteh ung na lam kä ng’gaw khai, na dawng ung phi kä na vawn tam khai. 13 Na ng’theithang phung cu angtäi ah na shüm vai. Na cimghang nak cu na ghin nak ah kyak ci. 14 Changshe ah hteh nak ung kä na hteh tu vai, chang shekha bang ne kä na läk vai. 15 Akshe cu na ng’pheng taak vai, kä na bi en vai, lek ne na lam ung na hteh vai. 16 Chang shekha gui cu cheishoh nak kä ami bi ung kä ip hlawt ci gui. Chang tumat kä ami m’di ung kä cimgang ci gui. 17 Shekat nak la m’ghämce nak cu tui ei nak ci gui. 18 Düng ciah chang ah hteh nak ah lam cu hni pyü ah mäih ah kyak ci. Dei law pi pi ne hni a luh law güt ung khang ci. 19 Chang shekha gui ah hteh nak ah lam cu khawmü ah mäih ah hmüp ci. Ami ng’tän ung phi ami ng’vawn nak cu kä hmuk ci gui. 20 Ka pyen cu na geing nak vai, ka hta, ka ng’thu na ngaih vai. 21 Na mät awn kä na ng’shawng en sak vai. Shüm ba ne na m’lung ung na khän sak vai. 22 Acun gui naw hmu hmat ci gui amn ghin nak la gai nak pe gui ci. 23 Na m’lung ngaih cu na geing nak vai, na ghin nak cu na m’lung ngaih naw ghaat sak ci. 24 Kä düng ciah ng’thu kä na pyen phung vai, hleeihlak la ng’thushe cu kä na pyen phung vai, 25 Bä ciah m’lung yum ne ma lam ung düng sei na teng vai. Na hmai kä na thui ng’aa sak vai 26 Na bi vai cu geing na ne na pawng püi vai. Na bi phung cu hman ne ng’damng khai. 27 Akshe cu hlawi ne ng’düng sei ma ne na hteh va, eng täng k’pat täng ah kä na ng’phleng en vai. |
Cho Bible Common Language © Bible Society of Myanmar, 2016.
Bible Society of Myanmar