NG'THU K'THUUK~ 31 - Cho Bible Common Language 2016

Ghangpughang m’cumcäi nak

¹ Shin cu ghangpughang Lemuel am anu naw am cäi nak ah thu thuuk ah kyak ci:

² “Nang cu ka ning m’hni ah ka hta, ka taigü ah ang dang nak ah na kyak ci. A i ka ning m’thein khai ang?

³ Na thagui avan cu ng’yawpawm nak awn kä na ng’pyi sak en vai. Na ngui avan cu hnumi ung kä na ng’pyi sak en vai. Cun gui naw ghangpughang cu m’di ci gui nei.

⁴ Ngai ä, Lemuel! Ghangpughang naw yu kä a awk vai, awktat vai phung kä a awk en vai.

⁵ Ami awk ah a kyak ung thukhän m’hnih ci gui, chang gui ah ng’yak hlü akcang cu nawng düt ci gui.

⁶ Agak cu si law hlük ci la geinvai ciah chang ah phäh ah kyak ci.

⁷ Ami dukhaih nak la kä ami yeikyai nak ami m’hnih vai ah nami awk sak gui vai.

⁸ “Ami mät kä ng’thu hlawt ciah chang gui ah phä ah ng’thu nami pyen pek gui vai, am gein kaa gui ah ami gah täng vai avan cu nami shungvong pek gui vai.

⁹ Ngami ah phäh ah ng’thu pyen ne, ng’düng khai ah ng’thumcha ne dukhaih ci la ng’ya hlük ciah chaw cu nami shungvong pek vai.”

Lunglang ciah chu

¹⁰ Lunglang ciah chu hmuh vai cu khak aih ci! Ani cu pyülung ah ta küikyang pi ci nei,

¹¹ Ani cu acei naw ngaih gep ci, a cei cu kä du khaih phung khai.

¹² Acun ah chu naw a ghin nak chuih a cei cu akni ah m’htei sedi geinvai nak kä om ci.

¹³ Ani cu htome mu bi ne linen sui tah ne, amät tawt law ci.

¹⁴ Sumlei ciah htinpaw ah mäih ah ani naw, a shou nak ah kaa ei vai cu im ah law püi ci.

¹⁵ Khaw kä thai pha sei tho law ne, akyong chang gui ah phäh ah ei shong ne, a changshäm gui naw ami bi vai cu m’cäi m’ä gui ci.

¹⁶ Ani naw kholo vai shui ne hleih ci, ani naw amät naw shui ne agah ah ngui awn sapyit lo bik ci.

¹⁷ Ani cu khüighat ciah bii k’bi ah kyak ci. Gaigawng ci, k’tha nak ci.

¹⁸ Ani naw abi lawh gui päng ah a phu ma cu hmat ci, ani cu kho cawih güt sei bii bik ci.

¹⁹ Ani naw amät ah pyai awn hmui bi ne, amät ah sui amät naw tah ci.

²⁰ Ani cu dukhaih ci gui la ng’ya hlük ci gui ah ma ah ng’khailang ci.

²¹ Ani cu khüi a bok ung phi kä ng’ä ci, a i ah kyasei ci ung ani ah kyongkhui ung sui ak oh gui om ci.

²² Ani naw yih phah pyang ne, am kim linen sui akni sui ci.

²³ Ani ah cei cu van naw hmat ci, kho chang ung ng’vaihta ciah kyak ci.

²⁴ Ani naw sui akni tah ne khei pat pyang ne sumlei ci gui am yoih na gui ci.

²⁵ Ani cu khüighat ci, chang phi chang m’sui tuk ci, ma lam hteh nak vai ah phäh ah kä kyik ci.

²⁶ Ani cu cüivai ne ng’awi gi khai ah ng’thu htau ci.

²⁷ Ani cu angtäi sei tawt aih ci, akyong khui ung hlü cicu teng ne m’htei ci.

²⁸ A hta gui naw yum ngak ci gui, acei naw m’tam khah ci.

²⁹ Ani naw pyen ci, “Hnumi gui akda cu chu ni ah kyak ci gui, cun ung phi avan ungka nang cu akbä pi ah na kyak ci.”

³⁰ M’däk nak cu lam hma nak ah kyak ci, kyom nak cu ng’kawn khai, cun ung phi Bawipa m’tamkhah ciah hnumi cu m’hlüngtai nak om khai.

³¹ Cun ah hnumi am a bi avan ah phäh ah ang lawn ah pek vai. Ani cu chang päng naw ak chang m’sui vai ah khin kha ci nei.