NG'THU K'THUUK~ 30 - Cho Bible Common Language 2016

Akur ah Ng’thu gui

¹ Shin gui cu Jakeh ah hta Akur ah thuuk ciah ang thu gui ah kyak ci. Khanpughi kei awn kä om ci, Khanpughi kei awn kä om ci, kei cu am gein kaa ah ka kyak ci nei,

² Kei cu chang ah mäih ah kä kya ne ui ai ah mäih ka lawk ci. Chang ung om khai ah lu hnga kei ung kä om ci.

³ A i cüivai nak phi kä ka ng’thei man ci. Khanpughi ah mawng a i phi kä ka hmat ci.

⁴ Ani ung khankho hmuhmat nak lam ung abawi om ne ang? Ngami naw ami kut awn khokhi pha man u ne ang? tui phi pyon awn htun man u ne ang? Khomdek khan ung ng’gii mä tän man u ne ang? Ngami cu a u gui ang, na hmat gui ne ang? Ami hta nau gui cu a u gui ang?

⁵ Khanpughi naw abi ah shaitak phung cu k’pang khek ci, Ani ah shungvong nak shui ciah chang avan ah phäh ah ani cu shawi ah kyak ci.

⁶ Ani naw kä a pyen cu ani naw a pyen ah, na pyen ah a kyak ung, ani naw ning shedam na ne nang na hleei ciah m’dang khai.

Thuthuuk pi gui

⁷ Ka ning yoi ci Khanpughi, kä ka sih pha ung pahnih na pe ä,

⁸ Hleeihlak nak ungka nak pang ä, Kä na pyam sak, kä na mang sak en ä. Cun ah kyasei ka ng’yak hlü ng’büh khai ah ei vai bäng na pe ä.

⁹ Kei naw akdäm ka tak ung kei naw nang kä ka ning ya hlük ciah ka pyen khai. Kei ka dukhaih ah a kyak ung kei cu m’gu ne ka Khanpughi ah khan ah thüisei nak ka law püi khai nei.

¹⁰ Abawi ah ma ah changshäm cu kä nami täitawk vai. A cun ah phäh ah nang cu plah tam nak la geinvai nak na gah khai.

¹¹ Apa plahtam ne anu kä yum ngak ciah chang amshah om ci,

¹² Ami mät naw ami mät theingcim ciah ngai ciah chang gui om ci gui. Cun ung phi ngami cu lelawi ci gui.

¹³ Mi mät naw ami mät ni aih ciah ngai ciah chang gui om ci — a i hlawk ah kami nik ci ang? cine ami mät naw ngai ci gui.

¹⁴ Dukhaih ci la pyamtham ciah chang ah kaa m’ghämce ne guh pek ciah chang gui om ci, cun cu ngami naw ami hnun ami m’ghin nak ah lam ah kyak ci.

¹⁵ M’liit tumat ung a hta hnu hnih om ci, ani nik hnih cu, na peä, ciah ani ming sui goi ci! A i kä chüm hlawt ciah amawng phli om ci,

¹⁶ sih nak ah khaw, kä hta ciah hnumi, kho aa ng’ya hlük ciah m’dek chawng, kä m’sih hlawt ah mei k’law.

¹⁷ Apa gaih m’gin ne ghi lawk ciah anu päipih ciah chang cu langta gui naw ei khai gui nei, kaap gui naw amik kawih khai gui nei.

¹⁸ Kei ah phäh ah kä hmat hlawt vai ah ng’yih thuh ciah amawng phli om ci;

¹⁹ Khankhomik ung yong ciah hmu kyung, lung k’pou ung ng’yawi ciah k’phyu, Tuinu ah khan ah a lam shui ciah htinpaw, Ng’yumhni tuk ciah hnumi la pami.

²⁰ Shin cu kä bekhüt ciah hnumi ah hnunthawh ah kyak ci; chang ahei awn ng’yaw ni ne tui ng’si ba neta, “kei naw a i phi cheishoh nak kä ka bik ci nei” cik ci.

²¹ Khomdek amät naw kä a dou hning mawng phli om ci;

²² Ghangpughang ah kya lawk ciah changshäm, A ei vai ang yak hlü avan om ciah chang gu ang,

²³ thüi nak awn be ne ceimah ciah hnumi; A bawinu ah hnün ung ngok ciah changshäm hnumi,

²⁴ Khomdek khan ung a yaw hta ung phi ang htei ah lunglang ciah ak ghing ming phli om ci;

²⁵ M’liing: ngami cu ami k’tha ken ci, cun ung phi kho cha ah ami ei vai m’cun m’sep hning ci gui,

²⁶ lungvii; ngami cu kä gai ci gui, cun ung phi lung gui ah ng’lung ah ami im co ci gui.

²⁷ Khanpeh: Ami ghangpughang kä a om ung phi, masa ne ng’tän ne ng’gui ne hteit ci gui.

²⁸ Imphan; Tumat na kut ung na shum hning ci, cun ung phi mang ah im ung phi hmuh vai kyak ci.

²⁹ Ang müi ah hteit thei ciah ang ming mah paphli om ci:

³⁰ phongkawng khisa avan ung gai pikbäih ci, a i phi kä kyih ci.

³¹ Me ca gui; lam khai ne om ci gui, chang gui ah ma ung ghangpughang gui.

³² Nang cu gu ang ne changshe na ne, akshe pawng püi ne na kyak ung, ng’däm ne ta na ngaih vai!

³³ Suuktui cu na thäh ung, khläm cicu na gah khai, chang tumat ah hna na thah ung, si lut lawk khai. M’lungshe nak na m’thawh ung khüikha nak ung na gawk khai.