NG'THU K'THUUK~ 3 - Cho Bible Common Language 2016Chang Nong Gui M’cäi Nak 1 Ka hta, ka ning m’thein phung kä na m’hnih vai, na bia vai ah ka ning m’thein cu angtäi sei na shüm vai. 2 Kei ah ka m’thei thang naw ng’shi ciah ghin nak la bühmang nak cu ning pek khai. 3 Hläkkhäm nak la bekhüt nak cu kä na ng’dawn sak vai. Na k’hnü ung na awi vai, na m’lung ung na guk vai. 4 Cun ah na bi ung Khanpughi la chang naw ning yei na sei na bä khai. 5 Bawipa cu na m’lung kyong avan awn na yum vai, na mät ah hmuhmat nak ung kä na ng’khüng vai. 6 Na bi nak päng ung Bawipa om ciah na shüm vai. Ani naw düng ciah lam ning m’shüm khai. 7 Na mät na cüivai ciah na mät naw kä na ngaih va, Bawipa cu läk ne akshe cu na hlawi vai. 8 Cun ah na bi ung cun cu seitui ni ah kyak khai, na khei ning khan sak ne, na m’nen ning gei sak khai. 9 Na lo ung na geit avan ungka am theihpai htük akni pi cu Bawipa am douthak ne na m’tamkhah vai. 10 Cun ah na bi ung na kheei ung htang be ne, na sapyit am ung sapyit tui pleip khai. 11 Ka hta, Bawipa naw a ning m’shung hlawi ung na läk vai, khän ne a ning m’cäi ah na hmat vai. 12 Bawipa naw am hni ah chang cu m’shung hlawi ci, Apa naw am hni ah a hta am shung hlawi ah mäih ah kyak ci. 13 Cüivai nak hmuk ciah chang, lunglang nak gah ciah chang cu yeikyai nak om ci. 14 Cüivai nak gah cu ngui gah ah ta bä pi ci. Cun cu ghui ah phi bä pi ci. 15 Cüivai nam cu pyülung ah ta a phu küi pi ci. Cun awn m’täng vai na ng’yak hlü a i kä om ci. 16 Cüivai nak naw akshou ghin nak pek ci, bämang nak la m’tamkhah nak phi ning pek ci. 17 Cüivai nak naw na ghin nak cu yeikyai sak ci. Acun ah lam cu dim deeih nak ah kyak ci. 18 Cüivai ciah chang gui cu yeikyai ci gui, cüivai nak naw ghin nak pe gui ci. 19 Bawipa naw khomdek cu a cüivai nak awn tüi pyang ci. A hmuhmat nak awn khomik cu a hmun ung k’süm ci. 20 A cüivai nak naw tuinu gui lon sak ci, khongmei ungka kho aa cu m’dek ung yu kyak sak ci. 21 Ka hta, cüivai nak cu k’pang ne na kyong nak vai, nang ungka kä na ng’phleng en sak vai. 22 A cun gui naw ghin nak ning pek khai — bä nak la yei nak ah ghin nak ah kyak ci. 23 Nang cu phyawng ne na lam ung hteit ne, kä na m’thuih shawng phung khai. 24 Ih phak ung na ng’yän law ung kä na kyih khai amü pum ding gei sei na ip khai. 25 Nangmi naw cun ah mäih leigai cu kä nami kyihkyawk vai. Cun cu pui khaw khi ah mäih ah lawk ciah akshe kha ah kyak ci. 26 Bawipa naw k’pang ne ning k’phyawn gui khai, Ani naw cuun ung nami awh vai ah kä ning ci gui khai. 27 Bi lawh hning vai ah a kyak päng ung chang gui ung bi vai hlü ciah akni gui cu na bi vai. 28 Tuhbäi chang na m’htei tu hning vai ah a kyak ung na paw chang am ngawi ung güt na ging ngä cine kä na pyen vai. 29 Na pei leng ah ka naw am neh vai ah a i kä na pawng püi en vai. Ani cu na pei ah om ci, ning ngaih gep ci, 30 Nang naw na m’neh vai ah a i kä a bi men ung, amawng a i kä om ciah chang awn kä nani n g’vook vai. 31 M’ghämce ciah chang ung kä na vamneng vai, ami bi ah mäih ah bi tu vai ah kä na k’bäi en vai. 32 A i ah kyasei ci ung Bawipa naw akshe bik ci gui cu thüi nak ci. Cun ung phi ani naw düng ciah chang gui cu akcang ah yum ciah la gui ci. 33 Bawipa naw changshe gui ah im cu plah taam ci. Cun ung phi düng ciah chang gui ah im cu hrilham pe gui ci. 34 Ani naw chang shedam nak c i cu kä mang ci. Cun ung phi am lung neim sak cicu chang m’sui ci. 35 Cüivai ciah chang naw m’tam khah nak ah pakhui cu m’düng khai, cun ung phi chang shekha naw amät ah thui ng’aa nak hteh püi khai. |
Cho Bible Common Language © Bible Society of Myanmar, 2016.
Bible Society of Myanmar